Як цяпер жыве падлетак Рома Кагадоўскі, які 3 гады таму ледзь не загінуў, ратуючы брата з пажару?

У красавіку 2021 года ў сям’і Кагадоўскіх, якія жылі ў вёсцы Сідаровічы Мядзельскага раёна, здарылася трагедыя: іх хата загарэлася. Дома ў той момант былі толькі два хлопчыкі: 12-гадовы Рома і яго маленькі брат.

Да прыбыцця ратавальнікаў Рома паспеў вынесці з агню брата на руках. Брыгада хуткай дапамогі даставіла Рому з апёкамі рознай ступені цяжкасці (было пашкоджана 50% цела) і парэзамі рук і твару ў бальніцу. Некалькі месяцаў стан хлопчыка заставаўся вельмі цяжкім, ён перанёс больш за 20 аперацый, але дактары змаглі выратаваць падлетка. Восенню таго ж года хлопчыка ўзнагародзілі ордэнам «За асабістую мужнасць».

Пра цяперашняе жыццё Ромы распавялі на СТБ. На яго рахунку ўжо больш за 30 аперацый, да гэтага часу падлетак знаходзіцца пад кантролем лекараў. Рома вучыцца ў ліцэі МУС.

Павялічыць

— Дзень, калі ўсё адбылося, я не вельмі памятаю, — прызнаўся падлетак. — Так, кропка-прабел-кропка-прабел. Памятаю некалькі секунд. Як нёс яго (брата. — «НН»), як ляжаў, як забрала хуткая — усё.

Пра малодшага брата, якога Рома выратаваў, курсант распавядае сціпла. Кажа, што таму ўжо чатыры гады, ён ходзіць у дзіцячы садок і любіць гуляць з братам. Але Рома ўпэўнены, што, калі хлопчык падрасце, не трэба яму распавядаць праўду пра пажар і тое, якую цану заплаціў старэйшы брат за яго выратаванне.

— Значыць, так павінна было здарыцца, — з сумам у вачах дадаў Рома. Згадваючы, як цяжка было першы год пасля трагедыі маме, ён не можа стрымаць слёзы. Хлопец распавёў, што за час бясконцых аперацый дактары сталі яму ўжо амаль роднымі людзьмі.

Падлетак скончыў 9 клас, здаў экзамены. Кажа, што з прадметаў яму больш за ўсё падабаецца гісторыя, а вось хімія даецца цяжэй за іншыя прадметы.

Павялічыць

Ён таксама дадаў, што ў ліцэі МУС курсантаў адпускаюць дадому на выходныя ў тым выпадку, калі сярэдні бал за тыдзень вышэйшы за 7 балаў. Калі менш — трэба заставацца ў навучальнай установе. Падлетак шчыра кажа, што праз гэтае правіла даволі часта быў пазбаўлены магчымасці правесці з роднымі выходныя.

Рома распавёў, што хацеў вучыцца ў нейкай такой установе, яшчэ будучы ў 4-5 класе. Але прапанова стаць курсантам ліцэя МУС паступіла пасля трагедыі.

— Правялі экскурсію — і я паступіў. Мама сказала, што я добры выбар зрабіў, што я малайчына. Тут, у прынцыпе, вучыцца няцяжка, галоўнае — цярпенне, старанне, праца.

Павялічыць

Яшчэ крыху пра ліцэйскія будні:

— Вучоба ў ліцэі гартуе, дысцыплінуе. Кожны дзень устаём рана. У нас пад'ём у 6.50. Апрануцца, заслаць ложак, пастроіцца на зарадку. Пасля сняданку — навядзенне парадку ў пакоі, падрыхтоўка да навучальнага працэсу. Пасля абеду ў нас ёсць асабісты час: мы можам пагуляць у футбол, баскетбол. Тэлефоны выдаюць у 19.50, забіраюць у 20.30. У асноўным я ўвесь гэты час размаўляю з мамай. Сацыяльныя сеткі я не вяду, не люблю публічнасць.

Падлетак кажа, што нават не паглядзеў ніводнага інтэрв'ю, якія з ім запісвалі.

Пасля заканчэння ліцэя Рома плануе пайсці ў Акадэмію МУС, а пасля працаваць у міліцыі. Тры гады таму ён казаў у інтэрв'ю: «Я хачу быць выратавальнікам. А яшчэ навукоўцам, мантажорам, баксёрам».

• 3
• 16
• 3
• 0
• 4
• 18
• 2
• 4