Жыхара расійскага Новасібірска асудзілі на 25 гадоў за падпал ваенкамата, якога не было. Гэта рэкордны тэрмін
Пры тым, што хлопцу ўсяго 24 гады.
2-і Усходні акруговы вайсковы суд у Новасібірску прысудзіў 24-гадовага Іллю Бабурына да 25 гадоў калоніі строгага рэжыму. Гэта самы суровы прысуд па справах аб падпалах ваенкаматаў у Расіі — прычым за падпал, якога не было, піша Бі-бі-сі.
Бабурына арыштавалі ў верасні 2022 года паводле абвінавачвання ў замаху на арганізацыю тэракту з-за падпалу ваенкамата, які не адбыўся. Пазней яму выставілі яшчэ пяць абвінавачванняў: у дзяржздрадзе, тэракце, удзеле ў дзейнасці незаконнага ўзброенага фармавання і дзейнасці тэрарыстычнай арганізацыі і незаконнай праслухоўцы.
Суд прызнаў Бабурына вінаватым па шэрагу артыкулаў, у тым ліку аб дзяржздрадзе і замаху на арганізацыю тэрарыстычнага акту. Пяць гадоў 25-гадовага тэрміну ён павінен будзе правесці ў турме, астатнія 20 — у калоніі строгага рэжыму.
Сам ён не прызнае віну. Адвакат Бабурына Васіль Дубкоў патрабаваў апраўдаць свайго падабароннага.
Максімальнае пакаранне, якое пагражала 24-гадоваму Бабурыну па пяці артыкулах КК РФ, — 30 гадоў пазбаўлення волі. 8 мая абвінавачванне запытала для яго 26 гадоў калоніі.
«Калі пракурор запытаў гэты тэрмін, Ілля ўхмыльнуўся і трохі ўсміхнуўся, была такая рэакцыя, — казаў адвакат Дубкоў. — 14 мая я быў у яго ў СІЗА, ён сказаў, што быў унутрана гатовы да гэтага. Але тым не менш гэта жудасны тэрмін. — больш, чым Іллі гадоў».
З чаго пачалася справа Бабурына
Новасібірцу Іллі Бабурыну 24 гады. Да свайго арышту ў верасні 2022 года ён працаваў у сферы IT і шмат падарожнічаў. Яго жонка жыла ва Украіне, ён часта ездзіў да яе, пакуль муж і жонка не рассталіся. Гэта адбылося яшчэ да пачатку вайны ва Украіне, але развод яны юрыдычна не аформілі. Апошні раз Бабурын быў ва Украіне ў кастрычніку 2021 года.
Як распавядала сяброўка Бабурына Ганна, уварванне Расеі ва Украіну ён успрыняў негатыўна і быў супраць вайны, хоць і не ўдзельнічаў ні ў якіх антываенных акцыях і мітынгах.
22 верасня 2022 года, на наступны дзень пасля абвяшчэння ў Расіі частковай мабілізацыі, Бабурына затрымалі ў Новасібірску супрацоўнікі ФСБ, неўзабаве ён быў арыштаваны.
Тады ў справе Іллі быў толькі адзін эпізод. Па версіі следства, Бабурын спланаваў падпалы ваенкаматаў у Новасібірскай вобласці па заданні неўстаноўленых асоб з украінскага батальёна «Азоў» (Для гэтага ён знайшоў двух выканаўцаў і перадаў ім бутэльку з «кактэйлем Молатава».
Самога падпалу пры гэтым так і не адбылося, у справе нават няма інфармацыі, аб якім канкрэтным ваенкамаце нібыта ішла гаворка, адзначае адвакат.
Меркаваныя «выканаўцы» Шорын і Арлоў (пад гэтымі прозвішчамі яны фігуруюць у матэрыялах справы, гэта знаёмы Бабурына і знаёмы знаёмага, тлумачыць адвакат) добраахвотна прыйшлі ў ФСБ і распавялі пра тое, што нібыта планаваў Бабурын.
Як лічыць адвакат Дубкоў, тое, што адбылося далей, падобна на правакацыю злачынства з боку ФСБ. Як ён распавядае, Бабурын сапраўды прапанаваў свайму знаёмаму Шорыну зняць відэа, як у будынак ваенкамата ляціць «кактэйль Молатава», але пасля першай жа размовы перадумаў гэта рабіць.
«Але Шорын да таго моманту ўжо звярнуўся ў ФСБ і на патрабаванне супрацоўніка ФСБ стаў угаворваць Бабурына перадаць яму бутэльку з запальнай сумессю. Фактычна гэта правакацыя», — сказаў адвакат Бі-бі-сі.
Пасля ўгавораў, са слоў Дубкова, Бабурын усё ж перадаў Шорыну бутэльку з «кактэйлем Молатава». Ілля гэтага не адмаўляе, падкрэслівае ягоны адвакат, але, на ягоную думку, кваліфікаваць гэта як падрыхтоўку да арганізацыі тэракту няправільна: Бабурын схіляў Шорына не да тэракту, а да хуліганства.
Новыя артыкулы ў справе Бабурына
У 2023 годзе, калі Бабурын ужо знаходзіўся ў СІЗА, у яго справе пачалі з'яўляцца новыя артыкулы.
Праз год пасля затрымання яго абвінавацілі ў падпале дзіцячай музычнай школы ў Новасібірску, які адбыўся 1 ліпеня 2022 года. Справа была заведзена па факце падпалу, падазраваных у ёй не было, яна доўга ляжала без руху. Але следчыя па справе Бабурына знайшлі ў яго тэлефоне відэа з падпалам нейкага будынка, супаставілі яго з будынкам музычнай школы, прыйшлі да высновы, што гэта адзін і той жа аб'ект і прад'явілі Бабурыну абвінавачванне ў яе падпале, распавёў Дубкоў Бі-бі-сі.
Экспертыза паходжання відэа не праводзілася, доказаў, што яго здымаў сам Бабурын, няма, кажа адвакат.
Пры гэтым падпал быў кваліфікаваны як тэракт (ч.1 арт. 205 КК РФ), нягледзячы на тое, што школа не з'яўляецца адміністрацыйным аб'ектам, пры падпале ніхто не пацярпеў, а матэрыяльны ўрон склаў менш за 20 тысяч рублёў (каля 240 даляраў).
Бабурын сваю датычнасць да гэтага падпалу адмаўляе.
Пры гэтым, па версіі следства, здзейсніўшы «замах на арганізацыю падпалу неўстаноўленага ваенкамата» і падпал музычнай школы, Бабурын дзейнічаў у інтарэсах або па заданні «Азова». Да такой высновы следчыя ФСБ прыйшлі, абапіраючыся на тое, што Бабурын раней ездзіў ва Украіну і што ў яго там ёсць знаёмыя, якія пазней, пасля пачатку поўнамаштабнага ўварвання Расеі ва Украіну далучыліся да «Азова», кажа адвакат.
Так у справе Бабурына з'явілася трэцяе абвінавачванне — у дзяржздрадзе (арт. 275 КК РФ).
Нарэшце, з факту знаёмства з удзельнікамі «Азова» следчыя зрабілі выснову аб тым, што Бабурын і сам уступіў у «Азоў», кажа адвакат. На гэтай падставе Бабурыну прад'явілі адразу два абвінавачванні: ва ўдзеле ва ўзброеным фарміраванні і ў тэрарыстычнай арганізацыі.
Вярхоўны суд Расіі прызнаў батальён «Азоў» тэрарыстычнай арганізацыяй 3 жніўня 2022 года, але Бабурын, па версіі следчых, быў у ім як да гэтага рашэння суда, так і пасля. Адсюль і два розныя артыкулы КК, тлумачыць Дубкоў логіку следства.
У магілёўскай калоніі памёр 22-гадовы палітзняволены Дзмітрый Шлетгаўэр9
Каментары