Работнікі лакаматыўнага дэпо разам з саўдзельнікамі выкралі звыш 12,5 тон дызпаліва.
Па даных следства, шэсць машыністаў цеплавоза і памочнікі машыністаў Бабруйскага абаротнага дэпо з пяццю жыхарамі гарадскога пасёлка Акцябрскі Гомельскай вобласці кралі разам дызпаліва.
У пачатку працоўнай змены лакаматыўныя брыгады цеплавозаў атрымлівалі неабходны абʼём дызельнага паліва. На маршруце яны эканомілі паліва, умешваліся ў механізмы прыбораў бяспекі, упісвалі ва ўліковыя дакументы недакладныя звесткі аб расходзе паліва.
У пачатку рэйсу работнікі Бабруйскага дэпо звязваліся з саўдзельнікамі з суседняй вобласці. Жыхары гарпасёлка падʼязджалі на аўтамабілі ў загадзя абумоўлены пункт на бязлюдным участку пуці ў лясным масіве на тэрыторыі Акцябрскага раёна. Адзін з іх падсаджваўся на цеплавоз, на хаду зліваў паліва ў палімерныя каністры і скідаў іх на зямлю. Затым каністры загружалі ў машыну і адвозілі ў прыватны гараж у гарпасёлку.
«Налётчыкі» плацілі лакаматыўнай брыгадзе за кожны выкрадзены літр. Пры кожным разе атрымлівалі ад машыністаў каля 20 літраў бясплатна ў якасці «бонуса». У Кастрычніцкім выкрадзенае паліва перапрадавалі знаёмым па цане, ніжэйшай за рынкавую.
З ліпеня 2021 года па сакавік 2022 года абвінавачаныя, паводле СК, выкралі больш за 12,5 тон дызельнага паліва на суму звыш 29 тысяч рублёў.
Адзін з фігурантаў вызвалены ад прыцягнення да крымінальнай адказнасці ў сувязі з амністыяй, другі — прыцягнуты да адміністрацыйнай адказнасці, бо яго выпраўленне магчыма без прымянення мер крымінальнай адказнасці.
На падставе сабраных па справе доказаў следства кваліфікавала дзеянні васьмі фігурантаў зыходзячы з ролі кожнага па ч.ч. 2, 3 арт. 211 (прысваенне і растрата маёмасці асобай, якой яна даручана, учыненая групай асоб па папярэдняй змове, у буйным памеры) Крымінальнага кодэкса.
На стадыі папярэдняга расследавання абвінавачаныя часткова кампенсавалі страты — звыш 19 тысяч рублёў. На маёмасць фігурантаў накладзены арышт на агульную суму больш за 100 тысяч рублёў.
Яшчэ адзін фігурант да ўзбуджэння крымінальнай справы зʼехаў за мяжу. Ён абʼяўлены ў вышук.
Як пасля канца свету. Аграсядзібу ў Салігорскім раёне занесла зямлёй3
Каментары