Колькі гадоў жыцця можна выйграць, калі кінуць курыць? Разлікі навукоўцаў
Нават калі вы кінеце курыць у 75 гадоў, вы зможаце падоўжыць працягласць жыцця.
Амерыканскія навукоўцы прааналізавалі ўплыў курэння на працягласць жыцця, каб вызначыць станоўчы эфект адмовы ад гэтай звычкі для людзей ва ўзросце ад 35 да 75 гадоў. Вынікі былі апублікаваныя ў American Journal of Preventive Medicine.
Каб вылічыць, колькі гадоў жыцця губляюць курцы і колькі набываюць тыя, хто кінуў курэнне ў розных узростах, навукоўцы выкарысталі даныя па смяротнасці і распаўсюджанасці курэння ў ЗША за 2018 год. Яны параўналі працягласць жыцця людзей, якія кураць, кінулі курыць і ніколі не кураць.
Даследчыкі стварылі так званыя «табліцы жыцця», выкарыстоўваючы матэматычныя разлікі, заснаваныя на рызыках смяротнасці для розных узростаў. Гэта дазволіла падлічыць, колькі гадоў жыцця чалавек губляе ці набывае ў залежнасці ад таго, працягвае ён курыць ці кінуў у канкрэтным узросце.
Нават у сталым узросце можна павялічыць працягласць жыцця. Напрыклад, чалавек, які кінуў курыць у 65 гадоў, можа дадаць у сярэднім 1,7 года, а ў 75 гадоў — 0,7 года. Пры гэтым амаль у кожнага сёмага (14,2%) 75-гадовага чалавека ёсць шанец набыць як мінімум дадатковы год жыцця.
Вынікі паказалі, што амаль кожны дзясяты чалавек, які кінуў курыць ва ўзросце 65 гадоў, можа набыць мінімум 8 дадатковых гадоў жыцця, а кожны дванаццаты (8%) чалавек, які кінуў курыць у 75 гадоў, можа набыць 4 гады.
Такім чынам адмова ад курэння на любым этапе жыцця прыносіць істотныя перавагі і дапамагае палепшыць якасць жыцця, зніжаючы рызыкі цяжкіх захворванняў.
Мастакі Шчамялёва і Рымашэўскі ў СІЗА па народным артыкуле
Каментары