Генеральны сакратар НАТА Марк Рутэ мяркуе, што дзяржавы Альянсу не павінны баяцца ядзерных пагроз, якія практыкуе расійскі лідар Уладзімір Пуцін у спробе аслабіць вайсковую дапамогу Украіне з боку Захаду.
На пытанне, ці варта саюзнікам па НАТА звяртаць увагу на расійскае «бразганне ядзернай зброяй», Рутэ адказаў, што не.
«Не, не варта, ды яны і не звяртаюць», — сказаў Марк Рутэ, якога цытуе Sky News.
Паводле слоў генсака Альянсу, ядзерныя вучэнні краін НАТА Steadfast Noon, якія пачынаюцца на наступным тыдні, прадэманструюць гатоўнасць арганізацыі адказаць на пагрозы Крамля.
«НАТА моцная. Мы можам супрацьстаяць любому суперніку. У нас ёсць усё неабходнае, каб гарантаваць бяспеку НАТА, супрацьстаяць любой пагрозе. І нас ніколі не запалохаюць краіны, якія не ўваходзяць у NATO, якія спрабуюць нам пагражаць. Гэта бескарысна, хай ён (Пуцін) лепш спыніць гэта рабіць», — падкрэсліў Марк Рутэ.
Таксама ён звярнуў увагу на тое, што цяпер важна, каб краіны правяралі і ўмацоўвалі абарону.
«Мы таксама ясна далі зразумець нашым праціўнікам, што гатовыя адказаць на любую пагрозу», — дадаў ён.
З панядзелка, 14 кастрычніка, НАТА пачне свае штогадовыя ядзерныя вучэнні Steadfast Noon. Раней Марк Рутэ ўжо заклікаў не слухаць ядзерныя пагрозы Расіі і падкрэсліў, што саюзнікі цяпер не бачаць прамых рызык прымянення ядзернай зброі.
Адказваючы на пытанне, ці не аслабляе Украіну тое, што саюзнікі, такія як Вялікабрытанія і ЗША, дагэтуль не далі дазволу Кіеву на выкарыстанне сваіх дальнабойных узбраенняў, напрыклад, крылатых ракет Storm Shadow, супраць цэляў на тэрыторыі Расіі, кіраўнік НАТА сказаў: «Я не ўпэўнены, што гэта так».
«Каб быць абсалютна зразумелым: галоўнае пытанне тут заключаецца ў тым, каб вайсковая дапамога працягвала паступаць ва Украіну, каб мы нарошчвалі таксама прамысловую вытворчасць ва Украіне, дапамагалі ім з гэтай масіўнай лагістыкай. Адна сістэма ўзбраенняў не зменіць зыход вайны», — мяркуе Рутэ.
Папулярны тыктокер з Расіі тусіць у дарагіх рэстаранах Мінска: «Быццам бамжу падалі. Жарыце, на здароўе»1
Каментары