На востраве Пхукет у Тайландзе ратавальнікі дапамаглі 23-гадоваму беларусу выбрацца з горнага лесу, пасля таго як ён заблукаў там ноччу. Пра гэта паведамляе «Беларусь і свет» на падставе паведамлення мясцовай прэсы.
Увечары мінулага панядзелка наш суайчыннік, які жыў у гатэлі ў раёне Тхаланг, адправіўся ўздоўж пляжу Най-Тхон да найбліжэйшай пакрытай лесам гары, карыстаючыся картай на сваім мабільным тэлефоне. Адлегласць, як турыст расказаў пазней, была як бы і невялікая, але праз некаторы час ён зразумеў, што страціў арыентацыю і не можа знайсці дарогу назад.
Таму ў 23.18 малады чалавек патэлефанаваў на гарачую паліцэйскую лінію для турыстаў 1155. Мясцовыя праваахоўнікі высветлілі ўсе абставіны і пацвердзілі каардынаты месцазнаходжання беларуса з дапамогай даных GPS на яго смартфоне.
На дапамогу згубленаму адправіліся на лодках ратавальнікі, якія ўжо пасля паўночы знайшлі яго, аказаўшы дапамогу.
Каментары