Хутчэй за ўсё, 44-гадовага шоўмэна Івана Вабішчэвіча затрымалі яшчэ ў верасні 2024 года.
Музычная тусоўка Мінска актыўна абмяркоўвае затрыманне шоўмэна і спевака Івана Вабішчэвіча, вядомага як Дзядзя Ваня.
Няма пэўнасці ў тым, што канкрэтна яму інкрымінуецца і дзе канкрэтна ён цяпер знаходзіцца.
Хутчэй за ўсё, прычынай гэта палітыка — маўляў, па Вабішчэвіча прыйшлі за падзеі 2020 года. Рэч у тым, што ў сілавікоў і раней узнікалі пытанні да яго, але гэтыя прэтэнзіі нібыта ўдалося ўрэгуляваць і Дзядзя Ваня працягнуў музычную дзейнасць. Праўда, выступаў ён перадусім у Расіі. Калі паглядзець у яго інстаграме анонсы яго канцэртаў, то там спрэс маскоўскія пляцоўкі.
Дый увогуле складвалася ўражання, што Вабішчэвіч жыў на дзве краіны, але першаснай была ўсё ж Расія.
Знаёмыя Вабішчэвіча пакуль тэарэтычна дапускаюць, што прычынай арышту маглі стаць і іншыя пытанні — напрыклад, грашовыя.
Інстаграм спевака апошні раз абнаўляўся 26 верасня 2024 года. Прыкладна з таго ж часу ён неактыўны і ў іншых сацыяльных сетках, і ў месенджарах.
***
Іван Вабішчэвіч нарадзіўся 26 ліпеня 1980 года ў Мінску. Музыкант, спявак, шоўмэн, вядучы «Папашы-Шоу» на Радыё АНТ, саліст гурта One Hell Thing. У свой час быў удзельнікам каманды КВЗ «ЧП».
Каментары