З 1 красавіка ў Расіі пачнецца новы набор кантрактнікаў у войска, для гэтага Міністэрства абароны разаслала ў рэгіёны разнарадкі з указаннем колькасці людзей, з якімі павінны быць падпісаныя адпаведныя дакументы.
Адразу некалькі рэгіянальных СМІ публікуюць агульную лічбу кантрактнікаў, якімі, па планах Мінабароны, неабходна папоўніць войскі — 400 тысяч, піша «Радыё Свабода».
Сцвярджаецца, што асноўная частка працы ляжа на супрацоўнікаў вайсковых камісарыятаў, а ў канчатковым выніку адказваць за выкананне плана будуць губернатары. Па планах Мінабароны, у Чалябінскай і Свярдлоўскай абласцях на прафесійную службу павінны паступіць па 10 тысяч чалавек, у Пермскім краі — 9 тысяч.
Паведамляецца таксама, што ў аўторак жыхарам Варонежскай вобласці зноў пачалі ўручаць позвы ў ваенкаматы, як гэта было ў верасні мінулага года пасля абвешчанай Уладзімірам Пуціным так званай «частковай мабілізацыі». Улады рэгіёна сцвярджаюць, што гэта робіцца «выключна для актуалізацыі даных воінскага ўліку».
Ваенкаматы спрабуюць кампенсаваць страты расійскага войска ў дэфіцытных вайсковых спецыяльнасцях, цяпер гэта кіроўцы бронемашын і артылерысты. У сваю чаргу прэс-сакратар прэзідэнта Расіі Дзмітрый Пяскоў адхіліў, як і раней, планы па правядзенні другой хвалі мабілізацыі. «У Крамлі няма такіх абмеркаванняў», — заявіў Пяскоў.
Чуткі пра пачатак другой хвалі мабілізацыі ў Расіі ў сувязі з недахопам жывой сілы для працягу поўнамаштабнай вайны ва Украіне перыядычна з'яўляюцца ў СМІ з канца мінулага года. Аб правядзенні падобных мерапрыемстваў папярэджвалі, у прыватнасці, разведкі некалькіх заходніх краін і ўлады Украіны. У Крамлі адмаўлялі і адмаўляюць гэтыя планы.
Паводле афіцыйных звестак, з верасня мінулага года ў рамках «частковай мабілізацыі» на вайсковую службу прызвалі звыш 330 тысяч расіянаў, якія знаходзяцца ў запасе. У канцы кастрычніка міністр абароны Расіі Сяргей Шайгу даў справаздачу аб завяршэнні мабілізацыі. Пасля гэтага Пуцін таксама абвясціў пра заканчэнне прызыву, аднак не падпісаў адпаведнага ўказа. Такім чынам, афіцыйна мабілізацыя ў Расіі працягваецца.
У студзені міністр абароны Расіі Сяргей Шайгу абвясціў аб задачы павялічыць колькасць расійскага войска да паўтара мільёна чалавек на працягу трох гадоў. Мяркуецца, што амаль палова з іх будзе кантрактнікамі. Разам з тым напярэдадні ў Дзярждуму быў унесены законапраект аб павышэнні гранічнага ўзросту службы ў прызыўной арміі з 27 да 30 гадоў.
Стала вядома, хто жаніх былой дэпутаткі Марыі Васілевіч26
Каментары