Кошт капусты ў Беларусі б'е рэкорды. Узбекская каштуе больш за 4 рублі, а беларускую паспрабуй знайдзі
У Беларусі за апошні год прыкметна падскочылі цэны на белакачанную капусту. На айчынную ўлады ўсталявалі «столь» па цэнах, пасля чаго паўсталі пытанні з наяўнасцю. А на імпартную капусту тым часам цэннік перавышае 4 рублі ў асобных гандлёвых сетках. Цяпер улады і зусім забаранілі вывозіць гэты тавар з краіны. Zerkalo.io правяло расследаванне, якая цяпер сітуацыя з цэнамі, якасцю і наяўнасцю капусты.
Якая сітуацыя з айчыннай капустай
Нагадаем, улады з 26 студзеня ўвялі максімальныя аптовыя і рознічныя цэны на некаторую гародніну, у іх лік трапіла ў тым ліку і капуста. Дзяржрэгуляванне цэнаў увялі на фоне таго, што ў 2021 годзе яны апынуліся ў лідарах па падаражанні. Гэта якраз свежая белакачанная капуста, цыбуля, буракі, морква, бульба.
Так, максімальны цэннік на свежую белакачанную капусту ў студзені не мог перавышаць 1,67 рубля, у лютым — 1,68 рубля, у сакавіку — 1,71 рубля, у красавіку — 1,73 рубля, а ў траўні — 1,75 рубля. Але ў многіх гандлёвых сетках цэны на гэты тавар прыкметна перавышалі уведзеную «столь». Гандлю дазволілі распрадаць запасы ўжо закупленага тавару па старых цэнах, а новыя пастаўкі рэалізоўваць па «зрэзаным» кошце.
Што тычыцца беларускай капусты, то некаторыя крамы на працягу некалькіх дзён «адкруцілі» цэннікі, іншыя ж вырашылі не спяшацца і распрадаць тавар даражэй, чым «столь». У гэтай сітуацыі паўстала пытанні з наяўнасцю айчыннай капусты ў некаторых крамах і на рынках.
«Як загадалі «адкруціць» цэны, то гандаль гэта зрабіў, знізіў да 1,68 рубля. Але пасля гэтага беларускую капусту больш не завозілі ў краму «Еўраопт» каля дома. У «Кароне» ў пятніцу яшчэ было некалькі качаноў нашай капусты. Але боршч цяпер — дэлікатэс», — кажа мінчанка Марыя.
«На мінулым тыдні купляла па 2,57 рубля за кілаграм, купляла беларускую капусту, ледзь з крэсла не ўпала, больш за 5 рублёў за качан выйшла. Але ў пятніцу ўжо бачыла па 1,68 рубля за кілаграм. Звярнула ўвагу, што Беларусь на цэнніку напісаная», — паведаміла яшчэ адна чытачка.
«У краме» Віталюр» на вуліцы Кашавога ў Мінску пакупнікі не знайшлі капусту ўвечары 4 лютага», — расказаў чытач.
«У чацвер у Віцебскай вобласці была нарада з гэтай нагоды, капусты ў пастаўшчыкоў няма, на чарзе — морква і буракі», — сцвярджае крыніца.
«Аб'ехаў учора тры супермаркеты і рынак — капусты няма. Знайшоў у выніку ў «Санце» па 3,5 рублі, тыдзень таму купляў па 2,99 рубля», — паведаміў яшчэ адзін чытач. Мы атрымалі некалькі дзясяткаў падобных паведамленняў аб тым, што давялося пахадзіць па крамах у пошуках капусты.
Узбекская — даражэй за 4 рублі. Цэны на імпартную капусту б'юць рэкорды
У Менску ў краме «Суседзі» прадаюць узбекскую капусту па 4,18 рубля за кілаграм.
У «Дыянісе» ў сталіцы іранская капуста каштуе па 3,44 рубля, а ў «Санта Рытэйл» — 3,33 рубля. «У Менску ў «Санта» на вуліцы Багдановіча была капуста з Ірана, амаль уся трэснутая, але выбраць можна. І відавочна здымалася шмат верхніх лістоў. А ў «Суседзях» побач наогул без капусты, але ў краме сказалі, што днямі прывязуць нячышчаную капусту», — падзялілася чытачка з Мінска.
У краме Green гандлёвага цэнтра Dana Mall у Мінску расійская капуста каштуе 3,88 рубля за кілаграм.
Чытач з Брэста знайшоў польскую капусту па 2,99 рубля за кілаграм у краме Mart Inn. Такі ж цэннік на расійскую ў краме «Еўраопт» у Мінску і Гомелі.
«У чацвер у краме «Аўгуст» у Пінску капуста прадавалася па 2,99 рубля за кілаграм. Калі я абурылася, чаму такая дарагая, бо тыдзень таму выйшаў закон аб рэгламентаванні цэнаў, супрацоўніца глянула на цэннік і з гонарам заявіла, што гэта расійская капуста, — расказала чытачка. — Дарэчы, у гэтай жа краме гэтую ж капусту 21 студзеня купляла за 2,05 рубля. Гэта значыць, за гэта час кошт не зменшыўся, а вырас амаль на 50%, цуды! Пытаюся, а чаму ж вырас? А яны ў адказ: дык гэта мы новы завоз атрымалі па больш высокай цане. Спыталася, а чаму беларускую не закупляюць. Адказалі: ды хто тады ў нас гэтую за 2,99 рубля купіць? Як гаворыцца, без каментароў».
«Шукалі ў аўторак з жонкай капусту. На прылаўку па старой цане 1,67 рубля спыталі ў работніка, ці ёсць. Вынеслі качан са склада ўжо 2,98 рубля, але расійскую. Самі ў шоку, у аграрнай краіне імпартную капусту купляем», — здзіўляецца чытач.
Чытайце таксама:
Урад абмежаваў вываз з Беларусі цыбулі, белакачаннай капусты і яблык. А раней Галоўчанка казаў, што ўсяго хапае
Галоўчанка: У Беларусі няма дэфіцыту гародніны. Чаму тады дзяржава рэгулюе цэны?
Цэны на імпартную гародніну і яблыкі таксама будуць рэгулявацца
«Калі дэфіцыту няма, то чаму растуць цэны?» Прафсаюзы непакояцца падаражаннем прадуктаў, асабліва гародніны
За год цана капусты вырасла на 120%. Чаму ў Беларусі так моцна падаражэла гародніна
Што за чамадан носіць каля Лукашэнкі ягоны ахоўнік? Не, там не ядзерная кнопка20
Каментары