У Кітаі за махлярствы з лекамі ад раку арыштавалі кіраўніка AstraZeneca
Акрамя яго, пад следствам знаходзяцца некалькі топ-менеджэраў кітайскага падраздзялення кампаніі.
Як піша The Wall Street Journal, 6 лістапада кампанія AstraZeneca паведаміла аб затрыманні свайго выканаўчага віцэ-прэзідэнта Леона Вана, адказнага за Кітай і азіяцкі рэгіён. Акрамя Вана, пад следствам знаходзяцца два цяперашнія і два былыя топ-менеджара AstraZeneca ў Кітаі.
На мінулым тыдні кампанія заявіла, што супрацоўнічае са следствам. Гэтая навіна прывяла да падзення яе акцый адразу на 8%, а за тыдзень — на 12%.
Адпаведна заяве, якую распаўсюдзіла сама кампанія, улады Кітая расследуюць выпадкі незаконнага імпарту прэпаратаў для лячэння раку грудзей Enhertu і печані Imjudo з Ганконга, а таксама незаконны збор даных аб пацыентах.
Абодва прэпараты былі адобраныя ў Ганконгу, але на момант расследавання не мелі ліцэнзіі на мацерыковым Кітаі. Enhertu атрымаў адабрэнне ў ліпені 2023 года.
Кітай з'яўляецца важным рынкам для AstraZeneca. Яе прыбытак за першае паўгоддзе ў гэтай краіне склаў 13% ад агульнай выручкі.
Да гэтага, як піша WSJ, кампанія трапіла ў скандал, звязаны з махлярствам яе супрацоўнікаў адносна медыцынскага страхавання.
У пачатку 2022 года Нацыянальнае ўпраўленне медыцынскага страхавання Кітая выявіла, што супрацоўнікі AstraZeneca ў змове з лабараторыямі фальсіфікавалі генетычныя тэсты, каб пацыенты маглі атрымаць страхоўку за набыццё прэпарату Tagrisso, прызначанага для лячэння раку лёгкіх пры наяўнасці пэўнай мутацыі. Пры адсутнасці гэтай мутацыі лек не дае эфекту.
Кітай упершыню адобрыў Tagrisso ў 2017 годзе і з 2018 года дазволіў яго набыццё па значна ніжэйшых коштах для пацыентаў з пэўнымі паказаннямі з кампенсацыямі ад страхавых кампаній.
Каб увайсці ў дзяржаўную праграму медыцынскага страхавання, AstraZeneca неаднаразова паніжала цану, што прывяло да вельмі нізкай прыбытковасці. Каб яе павялічыць, кампанія давяла супрацоўнікам высокія планы продажаў, што, як сцвярджаюць некаторыя супрацоўнікі, стварыла моцны ціск на іх і стала прычынай махлярскіх схем.
Гэтая справа лічыцца найбуйнейшым страхавым махлярствам у фармацэўтычным сектары Кітая за апошнія гады. Кітайскія ўлады выявілі каля ста былых супрацоўнікаў AstraZeneca, якія былі замяшаныя ў махлярстве са страхаваннем, некаторыя з іх атрымалі турэмныя тэрміны.
Адпаведна распаўсюджанай заяве кампаніі, цяперашняе расследаванне мае іншы характар і не звязана з ранейшым скандалам.
Мінчанка пакінула станоўчы водгук на сумку — і раптам выкрыла здраду чужога мужа10
Каментары