«Я хачу пазбавіцца ўсіх кліентаў з ноўтбукамі!»: уладальнік сталічнай кавярні падзяліўся болем
Градус нянавісці паміж аматарамі працаваць у кавярнях і іх уладальнікамі працягвае павышацца. У гэта раз канфлікт адбыўся ў адной з кавярань у сталічнай Грушаўцы.
Пра непрыемную сітуацыю распавёў Мікіта Несцераў, уладальнік кавярні Varka на праспекце Дзяржынскага. Мужчына прызнаўся, што ўпершыню моцна раззлаваўся. А нагодай для гэтага стала наведвальніца з ноўтбукам. Мікіта зрабіў ёй заўвагу і адзначыў, што ў яго кавярні дазваляецца карыстацца лэптопамі толькі ў адным месцы (за цэнтральным сталом) — гэта нават пазначана на налепках на сталах.
— На што яна мне адказвае: «Я ведаю, што да вас нельга з ноўтбукамі». Але яна прынцыпова прыйшла з ноўтбукам, бо ёй падабаецца ў нас. Падабалася, я спадзяюся.
Мікіта кажа, што доўга спрачаўся з наведвальніцай, спрабаваў растлумачыць правілы кавярні. Але адзначыў, што людзі з ноўтбукамі «з нейкай іншай планеты».
— Проста: «Мне ўсе павінны. І вы таксама павінны. І пляваць я хацела на барысту, на вас і на іншых гасцей, якія хочуць пасядзець». Дайшло да таго, што яна проста кажа: «Вось вы цяпер згубілі кліента». Я кажу: «Дык я і хачу згубіць усіх кліентаў з ноўтбукамі!».
Але ж кліентка не супакоілася і папрасіла разетку.
— Я кажу: можа вам станчыць яшчэ? Вось так і сказаў. На падвышаных танах. Там яшчэ людзі сядзелі навокал. Проста ўжо бамбіць.
Гэтае відэа ў YouTube-шортсах набрала каля 650 тысяч праглядаў і 145 тысяч у інстаграме. У каментарыях Мікіта растлумачыў, чаму супраць ноўтбукаў у кавярні. Галоўная прычына ў тым, што да таго, як у іх з’явілася забарона, людзі з ноўтбукамі запаланілі кавярню:
— Пяць з сямі столікаў былі занятыя людзьмі з ноўтамі. І 80% з іх возьмуць адну каву ці ваду і сядзяць па 5-7 гадзін. Нехта нават працаваў па зуме і вёў стрымы.
Праз гэта ў нейкі момант сталыя наведвальнікі кавярні пачалі скардзіцца і пісаць негатыўныя водгукі — і Мікіта вырашыў, што трэба нешта змяніць.
Дарэчы, у Мінску ўжо некалькі кафэ, якія цалкам абвешчаны laptop-free-месцам. Напрыклад, пякарня LЁN сёлета ў сакавіку паведаміла, што для «падтрымання сяброўскай атмасферы» забараняе наведвальнікам карыстацца ноўтбукамі і планшэтамі. Тады навіна сабрала шмат негатыўных каментарыяў у інстаграме пякарні. Але, мабыць, эксперымент атрымаўся ўсё ж паспяховым, бо забарона працягвае дзейнічаць.
Яшчэ раней — у 2023 годзе — моднае бістро Mon Nom (яго называюць «З русалкамі») пазначыла ў сваіх сацсетках, што становіцца laptop-free. Падкрэслівалася, што каманда кафэ хоча, каб наведвальнікі атрымлівалі асалоду ад ежы і камунікацыі, а не працавалі.
Кавярня-экакрама Tiden, мабыць, была першым laptop-free месцам у Мінску, бо ўвяла такі фармат ажно ў 2021 годзе. Але там забарона на лэптопы дзейнічала выключна ў выходныя дні, у будні да аматараў працаваць з кубачкам кавы ставіліся лаяльна.
«Анлайнер» раней цікавіўся ў юрысткі Таццяны Равінскай, наколькі легальна забарона на карыстанне нейкімі гаджэтамі ў кафэ.
— Кафэ мае права самастойна вызначаць умовы абслугоўвання наведвальнікаў. Як правіла, такія ўмовы замацоўваюцца ў лакальных прававых актах і даступныя гасцям на інфармацыйным стэндзе або пры дапамозе рознага роду таблічак у памяшканні, на сайце ўстановы або ў сацсетцы. Такім чынам, забарона на выкарыстанне ноўтбука ў кафэ або абмежаванне часу знаходжання з ім — гэта самастойнае рашэнне ўстановы, якому наведвальнік павінен падпарадкавацца.
Але ёсць цікавы нюанс. Прымушаць кліента зрабіць заказ работнікі не маюць права. То-бок тэарэтычна наведвальнік можа прыйсці ў любы зручны для яго час (з улікам рэжыму працы кафэ) і проста сядзець, вывучаючы меню ажно да зачынення.
«Сказаў: я тут нічога прасіць не буду». Жонка расказала, як Верамейчыка прызналі пагрозай у Літве5
Каментары