Працадаўца сачыў за супрацоўнікам праз геалакацыю. А што, так можна было?
Працадаўца адсочваў перасоўванні супрацоўніка з дапамогай сэрвісаў геалакацыі, якія былі ўсталяваныя на асабісты тэлефон. Пра такі выпадак расказаў Цэнтр персанальных даных, куды звярнуўся абураны беларус. Чым усё скончылася?
Невядома, калі і чаму супрацоўнік пагадзіўся на такія дзіўныя ўмовы працы і дазволіў усталяваць на ўласны смартфон дадатковыя дадаткі для сачэння. Але ж, відавочна, у нейкі момант татальны кантроль з боку працадаўцы пачаў яго напружваць. І чалавек падаў скаргу ў Цэнтр персанальных даных.
Там разгледзелі сітуацыю і вырашылі, што ў гэтым выпадку апрацоўка персанальных даных супрацоўніка была залішняй і неадпаведнай заяўленай мэце кантролю працоўнага часу. Яна ажыццяўлялася без прававых падстаў, бо асабісты нумар тэлефона работніка выкарыстоўваўся ў працоўных мэтах без афіцыйнай згоды чалавека.
Наймальніку адправілі патрабаванне ліквідаваць парушэнні. У выніку працадаўца паведаміў, што спыніў сачыць за падначаленым праз геалакацыю, а таксама аб тым, што будзе ў далейшым атрымліваць згоду работнікаў для выкарыстання іх асабістых нумароў у працоўных мэтах.
Каментары