«Сітуацыя пакуль працягвае пагаршацца». Расійскія ваенкары пішуць пра поспехі УСУ
Расійскі ваенкар Юрый Падаляка даў у сваім тэлеграм-канале сваё бачанне сітуацыі ў Курскай вобласці па стане на 19:00 чацвярга. Паводле яго слоў, хваліцца расійскім войскам пакуль няма чым, дынаміка не на іх карысць.
Паводле інфармацыі ваенкара Юрыя Падалякі, УСУ здолелі на многіх кірунках на толькі прасунуцца наперад, але і замацавацца.
У Суджы ўкраінцы паступова выцясняюць расіян з усходняй часткі горада, бо ўзялі пад кантроль мост праз раку Суджа на поўнач ад горада.
«Цяпер, калі паміж імі ўжо няма ракі, думаю, [расійскі гарнізон] канчаткова выціснуць за межы гарадской рысы», пасля чаго горад цалкам мае перайсці пад кантроль УСУ, піша Падаляка.
Пасля таго, на думку ваенкара, украінцы будуць валодаць мастамі, якія маюць стратэгічнае значэнне, і Суджа зробіцца найважнейшым лагістычным цэнтрам, дзе будзе зручна канцэнтраваць сілы і сродкі.
Далейшае развіццё наступлення ён чакае па трасе на Курск, дзе расійскія перадавыя пазіцыі знаходзяцца ў раёне вёскі Вялікае Салдацкае. Каб забяспечыць тут далейшы рух, украінцы нібыта штурмуюць сяло Чаркаскае Парэчнае.
На Льгоўскім кірунку ўкраінцы замацаваліся за сяло Малая Локня і спрабуюць далей развіваць свой наступ па трасе на Льгоў.
У Кораневе Падаляка не бачыў асаблівых зменаў, але мяркуе, што ўкраінскія вайскоўцы рыхтуюцца ноччу паўтарыць спробу заходу ў гэты райцэнтр. Зрэшты, ужо пасля выдання справаздачы ён напісаў, што УСУ на бронемашынах ужо пачалі атаку на Коранева.
«У цэлым сітуацыя пакуль працягвае пагаршацца і нават з'яўленне першых нашых рэзерваў на Курскім кірунку пакуль здольнае сітуацыю толькі крыху стабілізаваць, але не больш за тое», — падсумоўвае ваенкар.
Між тым у тэлеграм-каналах з'явілася інфармацыя пра тое, што вядзецца сур'ёзны бой за вёску Мартынаўка.
У той жа час тэлеграм-канал «ВЧК-ОГПУ», спасылаючыся на мясцовых жыхароў, сцвярджае, што памежныя вёскі Коранеўскага раёна УСУ ўтрымліваюць нібыта малымі сіламі. У небе поўнае панаванне ўкраінскіх дронаў, а тэрыторыю патрулююць групы па некалькі чалавек.
Самі ж украінцы выставілі свае фота, зробленыя каля вёсак Новаіванаўка і Любімаўка. Новаіванаўка знаходзіцца ў Суджанскім раёне, а Любімаўка — у Коранеўскім.
Герасімаў пад атакай тэлеграм-каналаў: пра Курск папярэджвалі, але ён нічога не зрабіў
Сырскі за сёння зрабіў Зяленскаму тры даклады — «менавіта такія, якія патрэбныя»
Рыбар: Сітуацыя ў Суджанскім раёне цяжкая
У Курскую вобласць з Малі перакідваюць баевікоў ПВК «Вагнер»
З'явілася ВІДЭА таго, як расійскія памежнікі здаліся ў палон
«Агрэсар заўсёды пажынае адпаведныя плады». Міхаіл Падаляк — пра «недатыкальнасць расійскай тэрыторыі»
Раніца 8 жніўня: Украіна кантралюе Суджу, Коранева ўзяць не ўдалося, УСУ рухаюцца ў кірунку Льгова
Баі ў Курскай вобласці — якія мэты могуць пераследваць УСУ?
Коля Лукашэнка сыграў на раялі на «Дні народнага адзінства». Яго тата перад гэтым прыгразіў Трэцяй сусветнай вайной31
Каментары