Маштабны распродаж пад назваю «чорная пятніца», які праходзіць у розных краінах у канцы лістапада, адбудзецца і ў Беларусі. Праўда, многія крамы не сталі чакаць канца месяца і абвясцілі сезон скідак ужо ў гэтыя выходныя, а асобныя — яшчэ раней. «Люстэрка» паглядзела, якія акцыі прапануюць буйныя крамы.
Зніжкі на прадукты даходзяць да 50%
Сетка «Еўраопт» аб'явіла дні «чорных цэн» ужо на гэтым тыдні — з 10 па 11 лістапада. Зніжкавы асартымент даволі вялікі, у яго ўвайшлі розныя групы тавараў. Гэта, ў тым ліку, агародніна і садавіна, малочныя, мясныя і каўбасныя вырабы, рыба, бакалея, напіткі, кансервацыя, дзіцячае харчаванне, корм для жывёл. Акрамя прадуктаў, туды ўключылі касметыку, бытавую хімію, тавары для дзяцей (у асноўным падгузнікі), ёсць некалькі найменняў бытавой тэхнікі і іншае.
Рытэйлер паведаміў, што ў спісе ўказаны цэны на тавары па стане на 10 лістапада, але ўжо на наступны дзень цана можа быць зменена. Адзначаецца, што акцыйныя тавары можна будзе набыць толькі ў гіпермаркетах.
Рытэйлер «Гіпа» абвясціў «чорную пятніцу» з 10 па 12 лістапада. Тавараў па «суперцэнах» там прапануюць менш, чым у «Еўраопце», але ўсё ж выбраць ёсць з чаго.
У лістападзе ў крамах «Грын» акцыйныя тавары прадаюць з 9 па 21 лістапада, але заўтра, 11 лістапада, гандлёвая сетка абвясціла акцыю «Сусветны дзень шопінгу». Мяркуючы па каталогу, пад акцыю патрапілі 66 тавараў. Пачынаюцца скідкі ад 14%. Самы вялікі мінус у цане паставілі на буякі — 38%, скрыначку вагой 125 грам можна будзе купіць за 7,99 рубля замест 12,99 рубля.
З 14 па 16 лістапада гандлёвая сетка «Карона» абвясціла «марафон скідак». На некаторыя тавары знізілі цану на 40-50%. Напрыклад, кілаграм пяльменяў са свініны і курыцы ўласнага прыгатавання прададуць за 5,77 рубля, а ў звычайныя дні яны каштавалі 10,5 рубля.
На некаторую касметыку мінус 60%
Інтэрнэт-крама 21vek.by з 23 па 26 лістапада правядзе распродаж, скідкі дасягнуць 40%. Праўда, пакуль не паведамляецца аб тым, што канкрэтна патрапіць пад акцыю.
Сталічны ГУМ ладзіць дзень шопінгу ў суботу, 11 лістапада. Зніжкі там будуць ад 25 да 35% на мужчынскае і жаночае адзенне і трыкатаж.
А вось у ЦУМе зніжкавыя дні былі на гэтым тыдні - з 8 па 10 лістапада. Яны даходзілі да 40% на нехарчовыя тавары. На буйную бытавую тэхніку зніжка 15% будзе да 30 лістапада.
Гандлёвы дом «На Нямізе» абвясціў «чорны распродаж» з 10 па 12 лістапада. Гэтымі днямі зніжка будзе даходзіць да 60% на нехарчовыя тавары з рознічнай цаной больш за 5 рублёў. Болей за ўсё цану скінуць на некаторыя мадэлі мужчынскага і дзіцячага адзення турэцкіх брэндаў, вырабы са срэбра і асобны асартымент касметычных сродкаў.
У цэнтры распродажаў Outleto на праспекце Жукава ў Мінску «чорная пятніца» пройдзе з 24 па 26 лістапада . Пакупнікам абяцаюць «неверагодныя скідкі» ў крамах Sinsay, Waikiki, Gloria Jeans, Big Star, Kari, Kari kids, Marko і іншых. На колькі панізяцца цэны, пакуль не паведамляюць. Інфармацыю аб гэтым размесцяць 21 лістапада.
«Чорная пятніца» ў ТРЦ Galleria Minsk працягнецца з 17 па 19 лістапада. Адзначаецца, што ў акцыі будуць удзельнічаць больш за 100 магазінаў і ўстаноў, пры гэтым зніжкі дасягнуць 70%. Падрабязнага зніжкавага гайда па канкрэтных крамах пакуль няма, але ён павінен з'явіцца. Дарэчы, калі вы прыедзеце ў краму на аўто ў нядзелю з 9:00 да 14:00, то зможаце скарыстацца паркінгам бясплатна.
Некаторую тэхніку са зніжкай можна купіць ужо зараз
У мабільнага аператара МТС зніжкавая прапанова ўжо з'явілася, яна працягнецца да 30 лістапада. У гэтыя дні са зніжкай да 280 рублёў можна купіць гаджэты Xiaomi — смартфоны, смарт-гадзіннікі, фітнес-бранзалеты і бесправадныя навушнікі.
Мабільны аператар A1 праводзіць распродаж з 10 па 13 лістапада. У гэтыя тры дні смартфоны, планшэты, смарт-гадзіннікі, карысныя гаджэты папулярных брэндаў можна купіць са зніжкамі да 999 рублёў.
Ціханоўская павіншавала твітар з гадавінай бітвы пад Оршай. І тут пачалося1
Каментары