Прымаць тэстастэрон так кайфова. Але мужчыны пасля горка расплачваюцца

Тэстастэрон — гэта асноўны мужчынскі гармон, які адыгрывае ключавую ролю ў фарміраванні мужчынскіх характарыстык, адказвае за развіццё другасных палавых прыкмет, такіх, як рост валасоў на целе, тэмбр голасу і павелічэнне мышачнай масы, а таксама ўплывае на лібіда.

Найбольшая колькасць тэстастэрону выпрацоўваецца ў падлеткавым узросце, калі адбываецца палавое паспяванне і фармуецца целасклад. З узростам узровень гэтага гармону ў крыві мужчын паступова зніжаецца, дасягаючы мінімальных значэнняў прыкладна да 50 гадоў.

Для лячэння як гіпаганадызму (недастатковай выпрацоўкай уласнага палавога гармону), так і звязаных з ім ізаляваных сімптомаў ва ўсім свеце шырока выкарыстоўваецца замяшчальная тэрапія, пры якой тэстастэрон уводзіцца ў арганізм.

Трывожным аспектам гэтай тэндэнцыі, як адзначаюць навукоўцы, з'яўляецца тое, што гэта адбылося амаль без якіх-небудзь сур'ёзных навуковых доказаў аб перавагах і рызыках дадзенай тэрапіі.

Другая група актыўных спажыўцоў штучнага тэстастэрону і сінтэтычных анабалічных стэроідаў — здаровыя мужчыны, многім з якіх ад 30 да 40 гадоў, якія імкнуцца змяніць свой выгляд.

Агрэсіўны маркетынг прэпаратаў тэстастэрону, які падаграваецца вобразамі супергерояў з фільмаў і ўплывовых асоб сацыяльных сетак, аказаўся вельмі эфектыўным, асабліва ў Злучаных Штатах, дзе з 2010 года колькасць рэцэптаў на тэстастэрону цыпіянат (ін'екцыйная форма гармона) узрос у восем разоў.

У шматлікай рэкламе прэпарату гаворыцца аб тым, што нармальны ўзровень тэстастэрону дазваляе нарошчваць мышачную масу, павялічыць цягавітасць і здольнасць арганізма пераносіць высокія фізічныя нагрузкі, больш эфектыўна пазбаўляцца ад тлушчу, падтрымліваць на высокім узроўні лібіда і забяспечыць аптымальную шчыльнасць касцяной тканіны, пазбавіцца дэпрэсіі і захоўваць пазітыўны настрой і аптымізм.

Якія рызыкі прыёму тэстастэрону

Па іроніі лёсу, штучна выкліканая гэтым стэроідам мужнасць можа звесці колькасць сперматазоідаў у мужчыны да нуля. Больш за тое, навукоўцы разглядаюць варыянт прызначэння экзагеннага тэстастэрону ў якасці сродку мужчынскай кантрацэпцыі.

Спецыялісты запэўніваюць, што ў многіх мужчын пасля спынення прымянення прэпаратаў тэстастэрону сперматагенез часцей за ўсё вяртаецца да зыходнага ўзроўню на працягу 6—18 месяцаў пасля спынення тэрапіі. 

Лічыцца, што верагоднасць развіцця бясплоддзя і ступень парушэнняў залежаць ад доз і працягласці тэрапіі, формы прэпарату (напрыклад, гелі для нанясення на скуру ў гэтым плане больш бяспечныя, чым ін'екцыі). У некаторых выпадках парушэнне фертыльнасці становіцца незваротным.

Медыкі-рэпрадуктолагі паведамляюць аб рэзкім росце колькасці пар, якія не могуць зацяжарыць, таму што мужчына прымае гармон, які зніжае колькасць натуральнага тэстастэрону, што выпрацоўваецца арганізмам.

Сярод негатыўных наступстваў тэрапіі тэстастэронам спецыялісты называюць павышаную рызыку ўскладненняў захворванняў сардэчна-сасудзістай сістэмы і ранніх інфарктаў, рост адэномы прастаты, поліцытэмію (рост колькасці чырвоных клетак крыві), якая павышанае рызыку ўтварэння тробмаў.

Акрамя таго, некаторыя мужчыны, якія прымаюць гэты стэроід, скардзяцца на пабочныя эфекты: бяссонніца, трывожнасць, прышчы, павышэнне артэрыяльнага ціску, а таксама поўную страту адчуванняў падчас сэксу.

Навукоўцы засцерагаюць — тэстастэронавую тэрапію нельга праводзіць, калі ў чалавека ёсць рак прастаты або рак малочнай залозы. Таксама ёсць некалькі станаў, пры якіх трэба быць асцярожным з гэтай тэрапіяй. Напрыклад, калі ўзровень ПСА вышэйшы за 4 нг / мл (або 3 нг / мл у мужчын з высокай рызыкай раку прастаты), гематакрыт вышэйшы за 50%, ёсць сур'ёзныя праблемы з мачавыпусканнем з-за павялічанай прастаты ці калі ў чалавека дрэнна кантраляваная сардэчная недастатковасць ці апноэ сну.

Аднак не ўсе, хто ўжывае прэпараты тэстастэрону, гатовы ад яго адмовіцца, бо спыненне прыёму можа прывесці да тыдняў стомленасці і дэпрэсіі, пакуль арганізм зможа аднавіць уласную яго вытворчасць.

Як натуральным чынам павысіць узровень тэстастэрону

Каб натуральным чынам павысіць узровень тэстастэрону, важна прытрымлівацца некалькіх ключавых рэкамендацый. Рэгулярныя фізічныя практыкаванні, асабліва сілавыя трэніроўкі, могуць значна павысіць узровень гэтага гармону.

Важную ролю таксама адыгрывае правільнае харчаванне, якое прадугледжвае ўключэнне ў рацыён дастатковай колькасці бялкоў, тлушчаў і вугляводаў, пазбягаючы строгіх дыет і галадання.

Падтрыманню здаровага ўзроўню тэстастэрону садзейнічае зніжэнне стрэсу. Таму перадусім рэкамендуецца добры сон, а таксама метады рэлаксацыі, такія, як медытацыя і ёга. 

Важную ролю ў вытворчасці тэстастэрону адыгрывае вітамін D, таму трэба старацца больш часу праводзіць на сонцы ці прымаць дабаўкі. Вітаміны і мінералы, такія, як цынк і магній, таксама могуць садзейнічаць павышэнню ўзроўню гэтага гармону.

Падтрымліваць узровень тэстастэрону на аптымальным узроўні дапаможа здаровы лад жыцця, які ўключае адмову ад алкаголю і курэння, а таксама кантроль вагі.

• 17
• 0
• 2
• 3
• 3
• 1
• 0
• 0