Prapahanda pakazała film pra Kryhiera. Ź jaho vynikaje, što niemca moh razyhrać KDB, a pytańniaŭ bolej, čym adkazaŭ
Film pra niemca Ryka Kryhiera, jakomu prysudzili śmiarotnaje pakarańnie, chutčej, aryjentavany na jeŭrapiejskich dypłamataŭ, čym na biełarusaŭ.
U filmie Kryhier raspaviadaje, što ŭletku 2023-ha vyrašyŭ pajechać va Ukrainu vajavać. Jon kaža, što vałodaje zbrojaj i maje dośvied sanitara-ratavalnika, tamu spadziavaŭsia, što dapamoža pieramozie Ukrainy.
Zarablaŭ jon nibyta kala 2800 jeŭra. Prapahanda kaža, što heta mienš, čym u internacyjanalnym lehijonie HUR, ale sama ž nazyvaje zarpłatu dabraachvotnikaŭ — 2000 jeŭra, što vidavočna mienš.
Dalej Kryhier źnianacku kaža, što, pa jaho źviestkach, «va Ukrainie kala 132 farmiravańniaŭ zamiežnych dabraachvotnikaŭ», što vyklikaje pytańnie — adkul u jaho takija źviestki. Demanstrujucca skrynšoty z pošty Kryhiera, na jakich lehijon «Svaboda Rasii» admaŭlaje jamu i raić źviarnucca ŭ internacyjanalny lehijon HUR.
Paralelna ŭ Sihnale pakazvajecca pierapiska Kryhiera z čałaviekam, imia jakoha Vaxo Alavidze. Jon raić Kryhieru dałučycca da Kaŭkazskaha lehijonu, kaža, što zrabić heta vielmi lohka, a ŭvieś ryštunak jamu vydaduć na miescy. Dajuć navat łakacyju punkta, dzie možna ŭładkavacca.
Kryhier kaža, što jon chacieŭ pajechać jak maha chutčej, tamu šukaŭ inšyja vychady dy natrapiŭ na «połk Kastusia Kalinoŭskaha». Anijakich paćvierdžańniaŭ suviazi Kryhiera z Pałkom Kalinoŭskaha nie demanstrujecca — ni pierapiski, ni mejłaŭ, ni niejkich skrynšotaŭ. To-bok tut zusim pusta.
«Mianie źviazali ź ich kuratarami SBU, jany pravieryli dakumienty i sazvanilisia pa videasuviazi. Sa mnoj razmaŭlaŭ čałaviek u mascy. Na fonie było dva ściaha, ukrainski i niejki nieviadomy ź dźviuma biełymi stužkami i adnoj čyrvonaj», — kaža Kryhier. Heta vielmi dziŭna choć by tamu, što PKK nie maje anijakaha dačynieńnia da SBU dy padparadkoŭvajecca Internacyjanalnamu lehijonu HUR MA Ukrainy.
Pierad ustupleńniem u połk, kaža mužčyna, jamu prapanavali «pravieračnaje zadańnie» ŭ Minsku, jakoje treba było ździejśnić na svaje hrošy, jakija «paśla abiacali viarnuć». «Kuratar» nastojliva paraiŭ Kryhieru kupić vajennuju kurtku «kab nie vydzialacca siarod miascovych», bo, maŭlaŭ, u Biełarusi šmat chto tak chodzić.
Spačatku jamu skazali zrabić fota pahruzačnaj stancyi ŭ Asipovičach. Paśla vykanańnia zadańnia jaho doŭha chvalili i paprasili zrabić fota na stancyi Aziaryšča. Jon mierkavaŭ, što na hetym usio.
«Kuratar» znoŭku vyjšaŭ na jaho z chvalebnymi odami i skazaŭ, što jość novaje zadańnie — vyjechać na miesca i znajści zaplečnik. Kryhier kaža, što zaplečnik byŭ nievialiki i čorny, lažaŭ u hołym poli i byŭ niečym nakryty. Mužčyna nie ŭjaŭlaŭ, što ŭ im.
Paśla «kuratar» byccam vysłaŭ jamu jahonyja ž fota Aziaryšča i skazaŭ pajechać tudy dy pakinuć zaplečnik kala niejkaha vahona. Kryhier byŭ na miescy sa svaim ułasnym telefonam i skazaŭ, što vahona tam niama, tady jamu skazali «pakinuć na rejkach» i źjechać. «Kuratar» šmat razoŭ pytaŭsia, ci pakinuŭ Kryhier tam zaplečnik.
Na nastupnuju ranicu Kryhier pajechaŭ u aeraport, dzie jaho i aryštavali. Tam jamu skazali, što jon ździejśniŭ niejki vybuch, što jaho vielmi ździviła.
Pierapiski ci choć dokazaŭ kantaktaŭ Kryhiera z «kurataram SBU z Pałka Kalinoŭskaha» nie pryvodzicca, u toj ža čas vyhladaje, što biaśpiekaj jon pierajmaŭsia nie nadta i nie vydalaŭ pierapisku jak u paštovym servisie Protonmail, hetak i ŭ miesiendžary Signal.
Naprykancy jość tyrada pra toje, što Hiermanija ničoha nie robić. Kryhier kaža, što niamieckija dypłamaty zajavili, što ničym nie mohuć jamu dapamahčy. Maŭlaŭ, jon paprasiŭ niešta pieradać, ale dypłamaty admovilisia, skazali, kab spačatku ŭsio kupili svajaki. Nie cikavilisia im, maŭlaŭ, i na pracesie — tudy chadzili 1-2 čałavieki z ambasady.
Taksama Kryhier kaža, što čas pracuje suprać jaho i prysud mohuć pryvieści ŭ siłu ŭ luby momant, a za jaho nie zmahajecca aficyjny Bierlin, što jaho mocna zasmučaje.
Ahułam ad filma składajecca ŭražańnie, što Kryhiera razyhrali biełaruskija abo rasijskija śpiecsłužby. Bo karcina vymaloŭvajecca dziŭnaja.
Dahetul nikoli nie było čuvać pra «pravieračnyja zadańni» pry ŭstupleńni ŭ dabraachvotnyja bataljony (heta pieršy taki viadomy vypadak za ŭsiu historyju nazirańniaŭ), niama nijakich dokazaŭ suviazi niemca ź biełaruskimi dobraachvotnikami. Ździŭlaje parada zaŭždy ciahać z saboj smartfon dy ahułam słabaja padrychtoŭka Kryhiera ŭ śfiery biaśpieki. A taksama parada apranuć kamuflažnuju kurtku, u jakich chodzić nie nadta šmat biełarusaŭ.
A hałoŭnaje — dziŭnaje miesca vybuchu. Rejki biez aničoha na adnym z hruzavych šlachoŭ čyhunačnaj stancyi pad Minskam, što nie naniasie nijakaj škody čyhunačnamu złučeńniu.
Kali źbiraŭsia ŭ Biełaruś, to čamu nikoha nie papiaredziŭ?
I pry hetym prysud — rasstreł. Za fota dvuch vakzałaŭ i paškodžańnie rejek. Takich prysudaŭ čaściej za ŭsio nie vynosiać navat zabojcam. Dy i čamu jon navat nie padaŭ apielacyi, jakaja adterminoŭvaje prysud na davoli praciahły čas?
Admietna i toje, što Kryhiera zatrymali ŭ samy patrebny momant, u aeraporcie, choć jon zdoleŭ biez prablem pakłaści zaplečnik na stancyi i dajechać da hatela na taksoŭcy. Čamu aryštavali nie ranicaj?
Lejtmatyŭ rolika ŭ tym, što Hiermanii jak maha chutčej treba ratavać Kryhiera i zhadžacca na ŭsie ŭmovy. A to jaho rasstralajuć i «budzie pozna».
«Naša Niva» — bastyjon biełaruščyny
PADTRYMAĆ«Tam dumajuć pra adno — kali ŭsio heta zdarycca». Dzie i ŭ jakich umovach ciapier znachodzicca Ryka Kryhier?
«Raptam nie pryjšoŭ na pracu, a praz paru dzion jaho zatrymali». Novyja padrabiaznaści pra niemca, prysudžanaha da rasstrełu ŭ Biełarusi
Što viadoma pra hramadzianina Hiermanii Ryka Kryhiera, jakomu ŭ Biełarusi prysudzili rasstreł
Čały: Čym daŭžej Łukašenka marudzić z vybarami, tym bolš arhumientaŭ, kab jamu nie iści15
Kamientary
A ŭmova heta abmien na Krasikava