Ubačyć Biełaruś z vyšyni: top-5 cikavych ahladnych placovak
U Biełarusi, jak i ŭ luboj inšaj krainie, jość miescy, z jakich možna pabačyć najbolš malaŭničyja krajavidy haradoŭ, miastečak ci pryrodnyja cikavostki krainy. Na niekatoryja z ich uvachod volny, na niekatoryja za simvaličnuju płatu ci kvitok u muziej. Budzma.org virtualna naviedała niekalki abłasnych centraŭ, pieršuju stalicu VKŁ, «haru» siarod azioraŭ i inšyja pryhožyja dla fota i nasałody dalahladami miaściny.
Hrodna
CUM (Savieckaja, 18)
Viadoma, varta pačać z adnoha z samych ulubionych na hety momant turystami haradoŭ Biełarusi. U Hrodnie niekalki ahladnych placovak, ale samaj papularnaj z najlepšaj panaramaj horada ličycca taja, što na dachu siońniašniaha CUMa, jaki znachodzicca na Savieckaj vulicy — hałoŭnaj turystyčnaj arteryi horada.
Płošča placoŭki kala 800 mietraŭ, vyšynia ŭsiaho 25, ale mienavita z hetaj vyšyni najlepš možna razhledzieć dachi staroj hrodzienskaj zabudovy, asnoŭnyja architekturnyja słavutaści horada.
Na terytoryi placoŭki pracuje kaviarnia. Raniej siudy mieŭ mahčymaść trapić kožny achvotny zadarma, ale ŭłaśnik źmianiŭsia i ŭvachod na dach staŭ płatnym — 2 BYN. Dla naviedvalnikaŭ kaviarni ŭvachod na ahladnuju placoŭku zastajecca volnym. Uźniacca na placoŭku mahčyma na panaramnym lifcie — taksama adna z ulubionych atrakcyj haściej Hrodna, ci pa leśvicy.
Panarama Hrodna. Fota: sputnik.by
Navahradak
Kurhan Mickieviča
Navahradak viadomy svaim unikalnym reljefam: umacavanaje pasielišča tut uźnikła na samym vysokim pahorku Navahradskaha ŭzvyšša na vyšyni 332 mietry. Z zamčyšča taksama adkryvajecca cudoŭny vid na horad, ale ŭ hetym topie havorka pojdzie pra jašče vyšejšy punkt — kurhan Adama Mickieviča. Jon znachodzicca niedaloka ad zamčyšča, uvachod na jakoje sioleta staŭ płatnym — 1 BYN.
Kurhan Adama Mickieviča miascovyja žychary i turysty nasypali na miescy Nižniaha zamka. Ziamlu addanyja prychilniki paeta pryvozili sa svaich rodnych miaścinaŭ, niekatoryja dasyłali jaje poštaj. Rašeńnie pra nasyp miemaryjała pieśniaru było pryniata ŭ 1924 hodzie, ale skončany kurhan byŭ da 75-hodździa sa dnia spačynu paeta — u 1930 hodzie.
Na viaršynie nasypu znachodzicca nievialikaja ahladnaja placoŭka, na jakoj adnačasova moža źmiaścicca ŭsiaho niekalki čałaviek. Z vosieni pa viasnu, kali niama hustoj listoty, z kurhana možna pabačyć uzhorystyja dalahlady Navahradskaha ŭzvyšša. Viadoma, adkryvajecca adtul i panarama na reštki viežaŭ Navahradskaha zamka z farnym kaściołam pobač.
Viciebsk
Ratuša (Lenina, 36)
Nastupnaj ahladnaj placoŭkaj budzie Viciebskaja ratuša, jakaja mieścicca ŭ samym sercy histaryčnaha horada. Viciebskaja ratuša — adna ź niešmatlikich acalełych u aŭtentyčnym vyhladzie ratušaŭ Biełarusi.
Pieršy simvał haradskoha samakiravańnia tut byŭ pabudavany ŭ 1597 hodzie paśla atrymańnia horadam Mahdeburhskaha prava 17 sakavika taho ž hoda. Budynak ratušy byŭ draŭlanym i nieadnojčy ciarpieŭ praz pažary. Tolki ŭ 1775 hodzie była ŭźviedzienaja kamiennaja ratuša ŭ styli vilenskaha baroka, jakuju my možam pabačyć siońnia.
Viadoma, z tych časoŭ budynak nieadnojčy rekanstrujavaŭsia. Naprykład, u 1873-1875 hady była praviedziena ŭnutranaja pierapłaniroŭka ratušy, častkova źmieniena zaviaršeńnie viežy: zamiest vysokaha špila była abstalavanaja naziralnaja placoŭka ź nievialikaj ratondaj. U 1911 hodzie byŭ dabudavany treci pavierch, jaki parušyŭ praporcyi budynka, zakryŭ nižni jarus viežy i zrabiŭ masiŭnym korpus budynka. U takim vyhladzie ratuša zachavałasia da našych dzion.
Z 1925 hoda ŭ budynku ratušy raźmiaščajecca krajaznaŭčy muziej. Usie naviedniki mohuć uźniacca na viežu z ratušnym hadzińnikam, dzie mieścicca ahladnaja placoŭka, ź jakoj adkryvajecca najlepšy rakurs na Viciebsk i na jahonuju acalełuju dy adnoŭlenuju histaryčnuju zabudovu.
Na hetaj ahladnaj placoŭcy abarončyja elemienty dastatkova nizkija, a sama jana vuzkaja, adnačasova tam moža źmiaścicca ŭsiaho niekalki čałaviek. Ekskursii na ratušu supracoŭniki muzieja pravodziać kožnuju hadzinu, samastojna ž tudy trapić nie atrymajecca. Kvitok, kab uźniacca na viežu, kaštuje 7 BYN z čałavieka.
Mahiloŭ
Ratuša (vuł. Leninskaja 1A)
Nastupnaj placoŭkaj u hetym topie budzie samaja vysokaja ratuša ŭ Biełarusi — mahiloŭskaja, ź jakoj možna pabačyć horad z usich bakoŭ. Budynak maje amal 47 mietraŭ vyšyni, heta paraŭnalna z šasnaccacipaviarchovym domam!
Ratuša była adnoŭlenaja pavodle histaryčnych krynic u 2008 hodzie. Vieža adnoŭlenaj ratušy atrymałasia vyšejšaja za histaryčna viadomyja praporcyi, ale z ahladnaj placoŭki na joj adkryvajecca malaŭničy vid na Dniapro i ŭsio haradskoje navakolle.
Pieršy budynak ratušy zhadvajecca ŭ invientary za 1604 hod. Uźviedziena jana była paśla atrymańnia Mahilovam Mahdeburhskaha prava 28 studzienia 1577 hoda. Draŭlany budynak nieadnarazova ciarpieŭ ad pažaraŭ, kamiennaja ž ratuša była ŭźviedzienaja tolki ŭ 1681 hodzie. Toj budynak šmat razoŭ pierarablali, ale ŭ bolš-mienš aŭtentyčnym vyhladzie jon zachavaŭsia da siaredziny XX stahodździa.
Ź nieviadomych pryčyn simvał haradskoha samakiravańnia Mahilova, acaleły navat padčas vajskovych dziejańniaŭ Druhoj suśvietnaj vajny, u 1957 hodzie byŭ uzarvany. Adnaŭleńnie adbyłosia tolki ŭ 2007-2008 hady.
Siońnia ŭ budynku mieścicca krajaznaŭčy muziej z mnostvam cikavych ekspanataŭ: aryhinalnym Statutam VKŁ, napisanym na starabiełaruskaj movie, aryhinałam knihi «Vialikaje majsterstva artyleryi» Kazimira Siemianoviča, frahmientami słuckich pajasoŭ i inšymi rarytetami. Kab uźniacca na ahladnuju placoŭku, treba nabyć kvitok, kaštuje 7 BYN. Varta źviarnuć uvahu, što muziej nie pracuje nie tolki ŭ paniadziełak, ale i ŭ aŭtorak.
Majak
Pluski sielsaviet, Brasłaŭski rajon, Viciebskaja vobłaść
Nu, i nielha pakinuć hety top biez samaj viadomaj ahladnaj placoŭki ŭ vakolicach Brasłaŭskich azioraŭ — hary Majak. Jaje vyšynia adnosna navakolnych azioraŭ kala 45 mietraŭ, a absalutnaja vyšynia nad uzroŭniem mora — 174 mietry.
Siońniašniaja nazva za ŭzhorkam, jaki raniej nazyvali Biźniaj, zamacavałasia ad hieadezistaŭ. Napačatku XX stahodździa jany pastavili tryanhulacyjnuju viežu, jakuju mieścičy pačali nazyvać «majakom». Viežy daŭno ŭžo niama, ale na samaj viaršyni «hary» ŭźviedzienaja šmatuzroŭnievaja ahladnaja placoŭka, ź jakoj padrabiazna možna aznajomicca z malaŭničymi vakolicami. Uvachod kaštuje 4 BYN.
Adsiul varta źviarnuć uvahu na voziera Snudy, adkul adkryvajecca panarama na kaścioł u vioscy Plusy. Za vioskaj užo znachodzicca miaža z Łatvijaj. Z zachodniaha boku bačnyja paŭvyspa i viežy kaścioła ŭ Słabodcy. Z paŭdniovaha boku možna razhledzieć kaścioł u vioscy Ikazń, voziera Strusta z malaŭničymi paŭvyspami, a siarod uzhorkaŭ bačnyja i abrysy Zamkavaj hary ŭ samim Brasłavie.
Majak uzvyšajecca siarod šerahu ŭzhorkaŭ, płoščaj u niekalki dziasiatkaŭ kvadratnych kiłamietraŭ, jakija majuć nazvu Kiezikoŭskija hory (pavodle nazvy vioski Kieziki). Majak — adzin z samych vysokich uzhorkaŭ tut. Być na Brasłaŭščynie i nie naviedać samuju papularnuju tut ahladnuju placoŭku dla turysta — mavieton, tamu raim nie zaciahvać.
Kamientary