Na Vieniecyjanskim kinafiestyvali skandał z-za filma pra rasijskuju armiju va Ukrainie. U čym pryčyna?

Trafimava praviała niekalki miesiacaŭ u adnym z padraździaleńniaŭ rasijskaj armii ŭ akupavanych abłaściach Ukrainy i zrabiła mnostva intervju z vajskoŭcami vojska RF.

U aficyjnym trejlery stužki, apublikavanym u YouTube, pakazany frahmient, u jakim režysiorka kaža: «Jedu ja na svoj strach i ryzyku samo saboj. Bieź luboha dazvołu Ministerstva abarony. Troški ŭ tajamnicy ad ich».

U zajavie, jakuju Trafimava pieradała ahienctvu AFP, jana śćviardžaje, što chacieła pakazać «całkam zvyčajnych ludziej», jakija vajujuć u składzie vojska RF, i što jaje stužka źniapraŭdžvaje ŭjaŭleńnie pra toje, što ŭsie rasijskija vajskoŭcy — heta złačyncy.

«Ja chaču dakładna skazać, što hety kanadska-francuzski film — antyvajenny, i jon byŭ zrobleny va ŭmovach vialikaj ryzyki dla ŭsich, pierš za ŭsio dla mianie», — piša režysiorka.

Što pakazana ŭ filmie

Jak paviedamlajuć karespandenty infarmacyjnych ahienctvaŭ, jakija pahladzieli film, jaho aŭtar demanstruje pobyt rasijskich vajskoŭcaŭ na froncie i pieradaje ich punkt hledžańnia na toje, što adbyvajecca.

U aficyjnym trejlery ŭtrymlivajucca frahmienty niekalkich intervju z vajskoŭcami, u jakich tyja raskazvajuć pra matyvy svaich dziejańniaŭ, niekatoryja vykazvajuć sumnievy ŭ tym, što zmahajucca na baku, jaki maje racyju.

Žurnalist AFP piša, što pakazanyja ŭ filmie vajskoŭcy «nie majuć ujaŭleńnia pra toje, čamu ich adpraŭlajuć na front». «Vidać, jak jany ź ciažkaściu sprabujuć prymusić pracavać savieckuju zbroju; niekatoryja palać adnu cyharetu za druhoj abo vypivajuć, a ich tavaryšy hinuć i atrymlivajuć ranieńni», — paviedamlaje ahienctva.

Karespandent Reuters apisvaje źmiest filma tak: «Zbroja staraja, a vajskoŭcy pierasoŭvajucca ŭ mašynach, jakija nie abaraniajuć ad napadaŭ, i ŭ peŭny momant apieratar drona skidaje bombu na svaich. Adzinaje, što jość u dastatku, — heta cyharety i ałkahol». «Mnohija sałdaty pryznajucca, što vajujuć tolki za hrošy i ŭsio bolš rasčaroŭvajucca», — praciahvaje ahienctva.

Aŭtary filma sočać za pracaj hrupy miedykaŭ, jakija źbirajuć cieły zahinułych; jany pačynajuć płakać, kali troje ich tavaryšaŭ viartajucca z pola boju ŭ čornych miaškach.

«Adnak u filmie pakazanyja tolki karotkija frahmienty bajoŭ i jon nie daje ŭjaŭleńnia pra razbureńni, jakija rasijskija vojski zrabili va Ukrainie. Adzin z vajskoŭcaŭ adchilaje abvinavačvańni ŭ vajennych złačynstvach, vyłučanyja suprać rasijskich sałdat, jak «niemahčymyja», — piša Reuters.

Što kažuć va Ukrainie

Ukrainskija režysiory, dypłamaty i hramadskija dziejačy ŭspryniali hety film jak abrazu. Jany nazvali jaho sprobaj apraŭdać vajnu Rasii suprać Ukrainy i zamaŭčać šmatlikija vajennyja złačynstvy, učynienyja rasijskimi vajskoŭcami.

«Film moža stvaryć iłžyvaje ŭražańnie pra toje, što jon antyvajenny i stavić pad pytańnie ciapierašni režym u Rasii, — piša ŭkrainskaja pradziusarka Darja Basiel, jakaja pahladzieła stužku. — Adnak toje, što ja ŭbačyła, — heta vidavočny prykład čystaj rasijskaj prapahandy».

Pavodle jaje słoŭ, aŭtar filma zajaŭlaje, što Rasija šmat hadoŭ nie ŭdzielničała ŭ vojnach i takim čynam «zabyvaje» pra rasijskaje ŭvarvańnie va Ukrainu i aneksiju Kryma ŭ 2014 hodzie, a taksama pra vojny ŭ Prydniastroŭi, Hruzii, Čačni i Siryi.

Basiel praciahvaje, što hieroi filma Trafimavaj kažuć pra «hramadzianskuju vajnu» va Ukrainie, raspaviadajuć pra «bambavańni Danbasa», «ukrainskich nacystaŭ» i paŭtarajuć inšyja łžyvyja śćviardžeńni rasijskaj prapahandy.

«Vy adčujecie žal da pakazanych u filmie pamirajučych ludziej i da tych, jakija apłakvajuć svaich blizkich. Heta pravilnaje pačućcio — kali vy narmalny čałaviek, vy pavinny adčuvać žal, smutak i inšyja emocyi, — praciahvaje Basiel. — Ale važna pamiatać, što hetyja ludzi stali vajskoŭcami ŭ vojsku, jakoje ŭvarvałasia ŭ niezaležnuju krainu, mnohija ź ich, jak my bačym u filmie, zrabili heta śviadoma. Treba taksama ŭspomnić Buču, Irpień, Maryupal i mirnych hramadzian, jakija byli tam zabityja».

Kiraŭnik Ofisa prezidenta Ukrainy Andrej Jarmak u svaim telehram-kanale vykazaŭ abureńnie ŭ suviazi z pakazam karciny ŭ Vieniecyi i zaklikaŭ «zabaranić hety absurd».

Ciapier film płanujecca pradstavić na Mižnarodnym kinafiestyvali ŭ Taronta. Miarkujučy pa sajcie kanadskaha miedyja-fondu, jaki finansuje vytvorčaść roznych stužak, jon nakiravaŭ dla zdymak «Ruskich na vajnie» 340 tys. kanadskich dalaraŭ.

Hienieralny konsuł Ukrainy ŭ Taronta Aleh Nikalenka zaklikaŭ arhanizataraŭ fiestyvalu admianić pakaz. Jon abvinavaciŭ režysiorku ŭ tym, što jana «naŭmysna skažaje realii vajny Rasii suprać Ukrainy».

«Malujučy rasijskich žaŭnieraŭ usiaho tolki jak «piešak», a ŭvarvańnie Rasii va Ukrainu jak «hniusnuju hulniu», my nadajom praŭdapadobnaść rasijskim prapahandysckim naratyvam, jakija pieramianšajuć surjoznaść i pakuty, vyklikanyja vajskovymi dziejańniami Rasii», — napisaŭ u svaich sacsietkach Nikalenka.

Hienieralny konsuł Ukrainy ŭ Taronta taksama źviarnuŭ uvahu na toje, što Trafimava raniej pracavała na dziaržaŭnym kanale RT, a na akupavanuju terytoryju Ukrainy trapiła niezakonna, razam z padraździaleńniem rasijskaha vojska.

Sama Trafimava asprečyła abvinavačvańni ŭ prapahandzie. «Zdahadka ab tym, što naš film źjaŭlajecca prapahandaj, śmiachotna, uličvajučy, što ciapier ja znachodžusia pad pahrozaj kryminalnaha pieraśledu ŭ Rasii», — cytuje AFP zajavu režysiorki.

• 1
• 0
• 2
• 21
• 2
• 2
• 26
• 0