Tur ź Minska za $9000 na siamju, z Polščy — za $1000. Biełaruski raskazali, jak sioleta adpačyvałasia ŭ Turcyi

Ź Biełarusi

Alina latała ŭ Turcyju z mužam i hadavałym synam, a taksama z babulaj — jaje maładyja baćki vyrašyli ŭziać u dapamohu, kab mieć mahčymaść adpačyvać i bieź dziciaci. Lacieli ź Minska, 5 hadzin pieralotu maleńkamu chłopčyku dalisia davoli składana.

— Ale ž, na žal, varyjantaŭ zvazić dzicia na mora ciapier niašmat. Turcyja vyhladaje samaj realnaj z mahčymaściaŭ, — raspaviadaje dziaŭčyna. — Ty ž nie budzieš stajać z hadavasikam sutki na miažy.

Alina pryznajecca, što hatel siamja vybrała nie samy tanny (ale daloka i nie samy darahi z mahčymych). Za adpačynak 11 načej dla troch darosłych i adnaho dziciaci zapłacili ažno $9000. Mienavita vysoki košt dziaŭčyna ličyć hałoŭnym minusam adpačynku.

— Hatel, servis, ježa — usio na samym lepšym uzroŭni. U našym hateli było šmat jak rasijan i kazachaŭ, tak i jeŭrapiejcaŭ — francuzaŭ, brytancaŭ, niemcaŭ.

Inšaja biełaruska, Maryna, latała na adpačynak u Turcyju adna.

— Z sumam zhadvaju, što ŭ 2010-m latała ŭ Kiemier ź siabroŭkaj za $1160 na dvaich na 10 načej. Kaniečnie, heta byŭ nie šykoŭny, ale całkam prystojny piacizorkavy hatel na pieršaj linii. Ciapier ža ceny na Turcyju palacieli kudyści ŭ kosmas. U turfirmie samy tanny varyjant dla mianie adnoj na 10 načej prapanoŭvali za $1000 — i heta litaralna byŭ niejki kłapoŭnik tolki sa śniadankami. Bačyła ŭ horadzie rekłamu tura, dzie abiacali tydzień adpačynku ŭ Antalji dla dvaich «usiaho» za 7 tysiač rubloŭ. Tak i napisana — usiaho! Byccam by 7 tysiač rubloŭ za tydzień dla biełarusaŭ — heta kapiejki.

Ale Maryna vyrašyła ŭsio ž nabyć dla siabie tur u Turcyju. Zapłaciła kala $2600 za 10 načej. A voś nahoda vybrać dla adpačynku mienavita hetu krainu kahości moža i šakavać.

— Ja liču, što hałoŭnym brendam Turcyi daŭno varta zrabić tureckich mužčyn. Jany i vyhladajuć šykoŭna, i ŭmiejuć začaroŭvać žančyn. I kali ja ščyra kažu pra heta niekamu sa znajomych, jany robiać vialikija vočy: «Turkam ža tolki adno treba!» Možna padumać, biełaruskija mužčyny šukajuć žančyn dla taho, kab tvorčaść Karatkieviča ci Bykava abmiarkoŭvać.

Usie my šukajem jaskravy seks. Dyk turki, u adroźnieńnie ad biełarusaŭ, umiejuć zrabić pryjemna — jak na słovach, tak i na spravie. Z pryhožym turkam ty adčuvaješ sabie pryncesaj, a niejki puzacieńki biełarus budzie ličyć, što heta ty pavinna tančyć polečku, kab spadabacca jamu.

Z Polščy

Hanna z mužam zvyčajna jeździć adpačyvać u Turcyju ŭ mai ci ŭžo ŭ vieraśni-kastryčniku, kali ceny nie takija vialikija, jak u vysoki siezon.

— My zaŭsiody imkniomsia ŭkłaścisia ŭ biudžet 1000 jeŭra na traich — dva darosłyja i dzicia. Zvyčajna ŭ nas heta atrymlivajecca dziakujučy tamu, što vybirajem hateli siaredniaha kłasu. Za apošnija hady, kaniečnie, ceny ŭ Turcyi na ŭsio pavysilisia. Mnie zdajecca, što vybar ježy pry hetym u hatelach staŭ mienš raznastajnym. Ale ŭ asnoŭnym dla turaŭ z Varšavy ŭsio bolš-mienš stabilna.

Hanna adznačaje, što hałoŭnaje pry vybary hatela hladzieć na vodhuki turystaŭ — jana tracić na heta šmat času, čytajučy vodhuki i na anhłamoŭnych servisach, i na ruskamoŭnych, i na polskamoŭnych.

— Byvaje, što vodhuki na piacizorkavy hatel značna horšyja, čym na trochzorkavy. Prahladaju taksama rejtynh na Bukinhu i ŭžo sychodziačy z hetaha prymaju kančatkovaje rašeńnie.

Dziaŭčyna kaža, što paraŭnoŭvała ceny z vyletam z Polščy i Litvy, i druhi varyjant na 30-40% zvyčajna daražejšy.

— A kali kazać pra varyjanty ź Biełarusi, dyk maje siabry razhladali mahčymaść prylacieć u naš hatel u našy daty, kab adpačyć razam — dla ich košt z vyletam ź Minsku byŭ amal u try razy vyšejšy, čym dla nas z Varšavy. U vyniku jany admovilisia ad takoj idei i adpačyvali ŭ Biełarusi.

Sioleta Hanna ź siamjoj u mai adpačyvała ŭ Side.

— Na hetym kurorcie zvyčajna šmat niemcaŭ, sioleta taksama sustrakała niamała skandynavaŭ — kampanii sa Šviecyi, Narviehii. Było šmat ukraincaŭ — jany taksama lacieli z Polščy.

Turcyju siamja vybiraje, tamu što tam cudoŭnaje nadvorje — navat kali ty adpačyvaješ viasnoj ci vosieńniu.

— Kali kazać pra minusy, dla mianie heta aeraport Antalji, jaki mocna pierahružany — treba šmat času čakać u čarzie i na pasadku, i na ŭźlot. Nu i jechać z aeraportu šmat času — kali tvoj hatel u 120 kiłamietrach ad Antalji, tranśfier moža zajmać da 3 hadzin.

Ź Litvy

Volha razam z mužam i čatyrochhadovym dziciom lacieła ŭ Antalju ź Vilniusa. Za tur na 11 načej u piacizorkavy hatel na «ultra ŭsio ŭklučana» za traich addali kala $2760.

— Mnie zdajecca, ceny turaŭ rastuć bolš dla tych, chto lacić ź Biełarusi. U minułym hodzie da nas u hatel prylatali siabry ź Minska — ich tur na dvaich na tuju ž kolkaść dzion kaštavaŭ na $100 daražej, čym naš na traich. U hetym hodzie my taksama płanavali lacieć u adzin hatel (užo inšy) razam z roznych krain. Ale vyśvietliłasia, što dla siabroŭ tur budzie kaštavać ažno na $1000 daražej, čym nam.

Turcyju siamja vybrała tamu što ličyć taki varyjant aptymalnym dla adpačynku ź dziciom — nie treba dumać, čym nakarmić dzicia, a kali-niekali jaho mohuć zabaŭlać animatary. Plus u Turcyi lubiać dziaciej i nie buduć zakatvać vočy, kali dzicia pavodzić siabie nie jak lalka.

— U našym hateli ŭ asnoŭnym byli turysty ź Jeŭropy — navat piersanał bolš razmaŭlaŭ na anhlijskaj i niamieckaj. Ale nie pašancavała nam u inšym — vokny našaha numara vychodzili na susiedni hatel.

A toj vidavočna aryjentavaŭsia na rasijan, tamu kožny dzień padčas dzionnaha snu syna my z mužam pakutavali ad ahłušalnaj ruskaj papsy — pačynajučy ad žudasnaj «Daritie žienŝinam ćviety» da prapahandysckaj «Matuška ziemla, biełaja bieriozońka». Zdajecca, pieśnia pra «śviatuju Ruś» raźjušyła nie tolki nas, bo ź niejkaha momantu mienavita jaje pačali ŭklučać na minimalny huk.

• 1
• 7
• 2
• 9
• 5
• 1
• 0
• 0