Što adbyvajecca ŭ Pałku Kalinoŭskaha i čamu bajcy kažuć pra jaho mahčymaje źniknieńnie?
U telehram-kanale Pałka Kalinoŭskaha źjaviłasia paviedamleńnie pra toje, što ŭkrainski bok choča kantralavać sacsietki PKK, a rekrutynh spynieny. Jan Rudzik napisaŭ, što połk moža ŭvohule raspaścisia. Ale ź im zhodnyja nie ŭsie bajcy — HUR vykłaŭ intervju z Paŭłam «Dziadźkam» Šurmiejem, jakoha pradstavili jak novaha kamandzira PKK. «Naša Niva» raspytała ŭ bajcoŭ z abodvuch łahieraŭ, što adbyvajecca i jak jany bačać situacyju.
Z čaho ŭsio pačałosia
22 lipienia ŭ najbolšym telehram-kanale Pałka Kalinoŭskaha źjaviłasia paviedamleńnie. U im śćviardžałasia, što ŭkrainskaja vajskovaja čaść, da jakoj adnosicca połk, choča zabrać sabie kantrol nad sacsietkami, «jakija naležać usiamu biełaruskamu narodu».
U dopisie adznačałasia, što sistema rekrutynhu, jakuju prapanavała vajskovaja čaść, «pazbaŭlaje mahčymaści paŭnavartasnaha naboru rekrutaŭ».
Admaŭlaŭsia i toj fakt, što Pavieł «Dziadźka» Šurmiej staŭ kamandziram pałka. Pa mierkavańni aŭtara paviedamleńnia, «jon zhubiŭ aŭtarytet siarod pieravažnaj bolšaści kamandziraŭ».
Miryk, kamandzir minamiotnaha raźliku z bataljona Lićvin
«Hetaje paviedamleńnie vypuściła pres-słužba pałka, kab patłumačyć, što adbyvajecca, nakolki heta mahčyma dla hramadskaści, bo pakul niajasna, što možna vystaŭlać napakaz, a što nie.
Adbylisia niekatoryja nieparazumieńni. Reč u tym, što vajskovaja čaść, ad jakoj my zaležym, stała ŭrazać aŭtanomiju na fonie ŭnutranych nieparazumieńniaŭ.
Hetym skarystałasia častka bajcoŭ pałka, jakaja raniej zajmałasia pres-słužbaj i jakaja maje dostup da staroha sajta Pałka Kalinoŭskaha. Jany apublikavali infarmacyju pra toje, što Pavieł «Dziadźka» Šurmiej ciapier kamandzir pałka.
Častka ź ludziej, jakija kirujuć druhim resursam, nie majuć dačynieńnia da pałka, nie prymajuć udziełu ŭ jaho žyćci. Pa-mojmu, jany prosta sprabujuć zarabić palityčnyja bały na składanaj situacyi ŭ Pałku Kalinoŭskaha. Jak niama i anijakaha «pres-centra Pałka Kalinoŭskaha», jaki jany «zakłali».
Taksama ciapier niama rekrutynha. Jaho niama jak praz unutrany kanflikt, jaki adbyŭsia jašče ŭ krasaviku, tak i praz toje, što jaho abrezała vajskovaja čaść — skazała, što budzie rabić jaho sama. Mienavita pad jaho, naprykład, stvaraŭsia bot Pałka Kalinoŭskaha. Nie razumieju, čym moža zajmacca «pres-centr Pałka Kalinoŭskaha».
Ale kamandzira pałka abiraje rada kamandziraŭ, jakaja składajecca ź ludziej, jakija kamandujuć častkami padraździaleńnia. I jana nie prymała takich rašeńniaŭ. To-bok Pavieł Šurmiej nie źjaŭlajecca kamandziram, kamandzira ŭ pałku pakul niama. Takaja situacyja doŭžycca z krasavika.
Ciapier vyrašajecca, ci budzie Połk Kalinoŭskaha vajskova-palityčnym prajektam abo prosta vajskovym padraździaleńniem. I heta zaležyć najpierš ad biełarusaŭ, a ŭ druhuju čarhu — ad kamandavańnia Internacyjanalnaha lehijona.
Pryčyna publikacyi ŭ kanale taksama ŭ tym, što da biełaruskaha monaetničnaha padraździaleńnia jość pytańni va [ŭkrainskaj] vajskovaj čaści. I što ludzi, jakija administrujuć sacsietki, nie buduć addavać klučy dostupu.
Zaraz viadziecca praca pa vyrašeńni prablemy. Ale heta biełaruskaje pytańnie, i jaho vyrašeńnie zaležyć ad taho, jak damoviacca miž saboj biełarusy sa zbrojaj u rukach.
Ja nie vyklučaju jak taho, što Połk Kalinoŭskaha moža pierastać isnavać u siońniašnim razumieńni, hetak i taho, što ŭsio vyrašycca dobra. Abo častka ludziej sydzie i znojdzie sabie niejkuju alternatyvu.
Kanały Pałka Kalinoŭskaha nie zachopleny, jany znachodzicca ŭ rukach tych ludziej, jakija imi i zajmalisia».
Bajec bataljona «Vołat»
Mužčyna paprasiŭ nie nazyvać svoj pazyŭny. Bajec raspaviadaje, što prablemy ŭ pałku pačalisia daŭno praź niezadavolenaść rašeńniami, jakija prymajucca štabam. Ale ŭ bajcoŭ nie chapała siłaŭ i mahčymaściaŭ z hetym razabracca.
Taksama im nie padabajecca toje, što nie adbyłosia anijakaha rasśledavańnia pa abvinavačańniach u karupcyi, a štab nijak nie reahuje na krytyku.
Pra «radu kamandziraŭ» jon kaža, što jana pradstaŭlaje mienšaść bajcoŭ PKK, ale ŭ jaje ŭklučanyja šmat funkcyjanieraŭ štaba:
«Užo hod tamu heta byŭ niežyvy prajekt. Jaje sprabavali ažyvić, pryniaŭšy statut, ale statut nie pryniali, i rada pavisła ŭ pavietry. Na siońnia ŭvohule niezrazumieła, u jakim jana statusie.
Paśla rašeńnia rady kamandziraŭ pra toje, što bajcy nie mohuć udzielničać u vybarach u Kaardynacyjnuju radu, šmat chto z hetym nie zhadziŭsia. Tady Mikoła Dziemidzienka padyšoŭ da kiraŭnika piachoty Lićvina i skazaŭ, što toj, maŭlaŭ, zvolnieny za ŭdzieł u vybarach u KR. Heta vyklikała niezadavalnieńnie bajcoŭ.
Usia hetaja historyja adbyłasia tady, kali ŭ pałku była ratacyja, my kala miesiaca nie byli na bajavych zadańniach i mieli bolš času. Kolkasnaja bolšaść pałka sabrała ahulny schod, vyrašyła, što Mikołu i Arciomu «Vanišu» Vojniču nie miesca ŭ Pałku, i padpisała adpaviednyja raparty.
Čamu vyrašyli ich vyhnać? Bo jany, ja skažu ščyra, zadziaŭbli bajcoŭ. Leźli tudy, u čym nie raźbirajucca, hulalisia ŭ centralizacyju, choć sami nie vajavali i aŭtarytetu ŭ bajavych padraździaleńniaŭ nie mieli. I tady faktyčna ŭtvaryŭsia novy štab z bajavych padraździaleńniaŭ.
Heta mocna nie spadabałasia staromu štabu. I na moj pohlad, ciapierašniaja zajava — heta takaja ahonija, sproba vyklikać paniku, maŭlaŭ, bieź ich biełarusy ŭ połk nie pryjeduć».
Pa patrabavańni vajaroŭ Mikołu niekudy pieraviali, a Vaniša adchilili ad pracy načalnikam štaba.
Kamandziram PKK naš surazmoŭca ličyć Paŭła «Dziadźku» Šurmieja. «Heta bajavy kamandzir, byŭ paranieny. Jaho pavažajuć i jamu daviarajuć bajcy, jakija vajavali ź im pobač. Da jaho dobra stavicca i daviaraje jamu kiraŭnictva Internacyjanalnaha lehijona. Bajcy «Vołata» i časta inšych padraździaleńniaŭ — dakładna za jaho.
Pryčym «Dziadźku» staviŭ nie Internacyjanalny lehijon, a pradstaŭniki inicyjatyŭnaj hrupy pa reformach pałka z roznych padraździaleńniaŭ. U «Dziadźki» jość jajcy, jon budzie stajać za toje, dziela čaho my pryjechali. A stary štab choča pastavić łajalnaha sabie čałavieka, jaki b vykonvaŭ zahady štaba».
Pa słovach bajca, sacsietki viadzie žonka Vaniša. «Jana ŭkrainka i jana razam z Vanišam abiraje, što varta publikavać. Inšyja nie majuć dostupu da sacsietak. Tamu słovy pra toje, što sacsietki PKK naležać biełaruskamu narodu — heta tryźnieńnie. Anijakaha kantrolu nad imi ŭ bajcoŭ niama.
Bolšaja častka miedyjakamandy zvolniłasia i padtrymała reformy ŭ PKK. Ludzi ŭ miedyjahrupie vyharali, bo, choć časta heta byli bolš daśviedčanyja ŭ miedyja ludzi, ich idei zarubali.
My chočam, kab pres-słužbaj PKK kiravaŭ čałaviek z bajavym dośviedam i talentami ŭ miedyja. Jakomu buduć daviarać bajcy. I taki čałaviek užo jość».
Pra «zakryćcio rekrutynhu», pra jaki zajavili ŭ sacsietkach PKK raniej, bajec kaža inšaje mierkavańnie. Jon śćviardžaje, što nasamreč ludziej nabirajuć. Reč u tym, što raniej u PKK byŭ punkt rekrutynhu ŭ Varšavie, ad jakoha daviałosia admovicca. Bajec kaža, što heta niabłaha dla PKK — ciapier rekrutynham nie budzie zajmajecca stary štab, i jość nadzieja na niejki paradak.
Naprykład, kaža jon, byvali vypadki, kali čałaviek vučyŭsia na adno, a paśla byŭ raźmierkavany zusim u inšaje padraździaleńnie «pa zahadzie Vaniša».
«Štab pałka taksama zahadvaŭ pieravodam ź inšych padraździaleńniaŭ, a pieravieścisia pa ŭłasnym žadańni było vielmi składana. Heta niehatyŭna ŭpłyvała i na bajazdolnaść, i na maralny duch. A voś ludzi, jakija traplali nie praz rekrutynhavy centr PKK, apynalisia tam, kudy i źbiralisia.
Taksama vielmi šmat času zajmała afarmleńnie kantraktaŭ. A kali ty admaŭlaŭsia iści tudy, kudy «raźmiarkoŭvaŭ» štab, to musiŭ vielmi doŭha čakać novaha nakiravańnia».
Jon adznačaje, što praz skandały ŭ PKK biełarusy nie tak masava prychodziać u połk, jak raniej. Pa mierkavańni vajara, tolki reformy mohuć uznavić byłuju słavu pałka, pavysić jaho bajazdolnaść i viarnuć biełarusam vieru ŭ PKK. Taksama naš surazmoŭca spadziajecca, što praz heta ŭ połk viarnucca byłyja bajcy.
Bajec nie vyklučaje, što siarod kamandavańnia pałka ŭ budučyni budzie bolš ukraincaŭ. Ale ličyć, što heta moža pajści na karyść:
«Kali ŭkraincy pryšluć tałkovych kamandziraŭ z adukacyjaj, z bajavym dośviedam, to i efiektyŭnaść moža vyraści, i možna paźbiehnuć strataŭ z našaha boku. I heta dobra.
Ciapier, kali štab zrabiŭ vialikuju pamyłku, apublikavaŭšy hetaje paviedamleńnie, i zrabiŭ paklop na štab Internacyjanalnaha lehijona, u nas jość bolš šansaŭ na pieramieny. Bo raniej nam kazali, što, maŭlaŭ, heta prablemy biełarusaŭ, to chaj jany i raźbirajucca. Źjaviłasia nadzieja, što štab lehijona zrazumieje ŭsiu surjoznaść kanfliktu i naviadzie paradak u PKK.
I spadziajusia, što biełarusy znoŭku buduć nam daviarać i raźličvać na nas».
Pavieł «Dziadźka» Šurmiej
Padobna, što HUR i štab Lehijona ličać kamandziram Pałka Kalinoŭskaha Paŭła Šurmieja — siońnia jany apublikavali intervju ź im.
U kamientary Biełsatu Pavieł Šurmiej raskazaŭ, što reformy ŭ pałku patrebnyja daŭno. Reformy tyčacca jak struktury kiravańnia, hetak i pracy ź miedyja, a taksama finansavaj prazrystaści. Jon zajaviŭ, što połk nie kantraluje telehram-kanał, ale maje ŭłasny sajt kalinouski.org i fejsbuk-staronku.
«Chto kaža ad imia pałka Kalinoŭskaha ab tym, što połk straciŭ elemienty samakiravańnia? Nie, elemienty kiravańnia pałkom imia Kastusia Kalinoŭskaha stracili dźvie viadomyja asoby, Mikoła i Vaniš, jakija namahalisia pieratvaryć połk imia Kastusia Kalinoŭskaha ŭ svaju PVK», — cytuje Šurmieja Biełsat.
Pa jaho słovach, Vaniš i Mikoła pierakładajuć na vajskovuju čaść adkaznaść za svaje pamyłki, praź jakija bolš vajaroŭ sychodziła z pałka, čym prychodziła ŭ jaho, dy jašče i stvarajuć kanflikt z čaściu.
Dzianis «Vaŭkałak» Urbanovič
Bajec bataljona «Vołat» Dzianis Urbanovič taksama vykłaŭ svaju viersiju padziejaŭ.
Na jaho dumku, u pałku patrebnyja terminovyja reformy, bo «toj elemient, jaki kiravaŭ dahetul Pałkom Kalinoŭskaha, jon kamiercyjny, a biełaruskaści tam nie vielmi šmat. Karupcyja, adnym słovam».
Taksama jon vykazaŭ niedavier radzie kamandziraŭ i skazaŭ, što całkam padtrymlivaje Paŭła Šurmieja «Dziadźku», jaki, pa słovach Dzianisa, zasłužyŭ pavahu ŭ bai. «U mianie da jaho pytańniaŭ niama. A voś vam, spadarstva (majecca na ŭvazie štab PKK — «NN») niedavier ad bajcoŭ pałka i niedavier ad usich biełarusaŭ», — padsumavaŭ svajo videa Dzianis Urbanovič.
Siarhiej Biaspałaŭ
23 lipienia jon vypuściŭ videa sa svaim bačańniem situacyi ŭ pałku. Spačatku jon raspaviadaje pra Paŭła «Dziadźku» Šurmieja — jak toj pajšoŭ vajavać u pieršyja dni vajny, byŭ paranieny, jak dobra vajavaŭ i zdabyŭ aŭtarytet.
Paśla jon kaža, što zajava ŭ telehram-kanale PKK niepraŭdzivaja, zroblenaja «Mikołam Dziemidzienkam i Arciomam «Vanišam» Vojničam, kab utrymacca sinimi palcami va ŭładzie». Pa jaho mierkavańni, jany chočuć pastavić na rolu kamandzira «havoračuju hałavu».
Dziemidzienku jon zakidaje toje, što jon nikoli nie vajavaŭ, što jon źbiraŭ achviaravańni na asabisty bitkoin-kašalok, a taksama što nie syšoŭ, kali 84% bajcoŭ prahałasavali za heta.
Arciomu Vojniču jon zakidaje, što toj niezrazumieła čym zajmajecca i taksama nikoli nie vajavaŭ.
Abodvuch jon paprakaje ŭ kumaŭstvie, u tym, što jany biaruć u štab tolki łajalnych sabie ludziej. U kancy videa razvažaje, što hety etap moža stać jak kancom PKK, hetak i novym jaho roskvitam.
Jan Rudzik
«Praŭdu kažučy, dla biełaruskaj dźvižuchi PKK i tak doŭha pratrymaŭsia. Moža, jašče niešta raśpietlajecca, ale ž pakul vyhladaje, što šancaŭ mała», — napisaŭ Rudzik u svaim telehram-kanale.
Nieviadoma dakładna, jakoj pazicyi jon prytrymlivajecca, bo inšych publičnych kamientaroŭ jon nie davaŭ.
«Naša Niva» — bastyjon biełaruščyny
PADTRYMAĆNočču ŭ Biełaruś zalacieli vosiem dronaŭ. Adzin amal dabraŭsia da miažy ź Litvoj3
Kamientary