Nikałas Kiejdž u najlepšaj formie ŭ dzika śmiešnaj kamiedyi «Scenar mary»
Karjera Nikałasa Kiejdža źviedała mnostva pavarotaŭ. Ale jaho apošniaja rola, kali jon hraje prafiesara-nieŭrotyka, jaki raptoŭna pačynaje źjaŭlacca ŭ snach roznych ludziej, — adna ź jaho najlepšych, piša Keryn Džejms u ahladzie dla BBC.
![Nicolas Cage](http://d3kcf2pe5t7rrb.cloudfront.net/img/w840d4webp1/photos/z_2023_11/nicolascage-5efo9.jpg.webp)
U hetaj varjackaj zmročnaj kamiedyi, jakaja ŭžo vyjšła na ekrany ŭ ZŠA i Vialikabrytanii, hledačy stanoviacca śviedkami supracy ekscentryčnaha Nikałasa Kiejdža — zorki, jakaja nie paddajecca kłasifikacyi, i režysiora z na dziva źjedlivym ujaŭleńniem — Krystafiera Borhli. Kiejdž hraje Poła, niesamavitaha prafiesara, jaki źnianacku pačynaje źjaŭlacca ŭ snach inšych ludziej — spačatku tolki svajoj siamji, a zatym svaich studentaŭ i nieznajomcaŭ pa ŭsim śviecie.
Poł absalutna niazhrabny ŭ stasunkach ź inšymi ludźmi i vyhladaje jak typovy prafiesar — łysiejučy, u akularach u dracianoj apravie i z baradoj. Jon prosić prabačeńnia ŭ kalehi pa aśpirantury, čyja niadaŭniaja publikacyja zapazyčyła smutnuju ideju, vykazanuju Połam dziesiacihodździ tamu. I jon spadziajecca znajści vydaŭca dla akademičnaha daśledavańnia ŭ halinie evalucyjnaj bijałohii — jaho knihi pra murašak — choć jon jašče nie pačaŭ pisać ni jaje, ni što-niebudź jašče.
Adnak usio mianiajecca, kali Poł pačynaje źjaŭlacca ŭ snach nieznajomcaŭ — na zadnim fonie, jak biaskryŭdny pasiŭny naziralnik. Hetaja nievytłumačalnaja źjava šyroka raspaŭsiudžvajecca, i Poł pačynaje atrymlivać asałodu ad virusnaj słavy, jakuju jon prymaje absalutna biescyrymonna, jak niešta, što, na jaho dumku, z samaha pačatku musiła jamu naležać. Jaho vučni narešcie pačynajuć staranna vučycca. I jon navat stanovicca abjektam eratyčnaj cikavaści (choć heta nie samaja pryjemnaja scena).
Usio raźvivajecca cudoŭna, pakul znoŭ nie adbyvajecca niečakany pavarot — Poł źjaŭlajecca ŭ snach, ale ciapier heta žorstkija kašmary, jakija prymušajuć ludziej bajacca jaho ŭ žyćci tak, jak kali b jon byŭ Fredzi Kruhieram. Nieŭzabavie kašmarnaja viersija Poła pačynaje žyć ułasnym žyćciom, jakoje nie maje nijakaha dačynieńnia da taho, što jon napraŭdu skazaŭ ci zrabiŭ.
U intervju Kiejdž zaznačyŭ, što «ŭ jaho byŭ žyćciovy dośvied, źviazany z vobrazam Nika Kiejdža ŭ internecie», i hety dośvied daŭ jamu mahčymaść pierakanaŭča syhrać svajho hieroja ŭ «Scenary mary».
Akcior robić Poła nastolki vybitnym i hodnym davieru, što film nikoli nie stanovicca mietafilmam, jak letašniaja satyra «Nievynosny ciažar vializnaha talentu», u jakoj Kiejdž syhraŭ vydumanuju viersiju svajho «ja», što stała miemam.
Bolš, čym prosta kamičnaja historyja
Vy možacie atrymać asałodu ad «Scenara mary» jak ad prosta kamičnaj historyi, ale varta pryznać, što jon zasłužana maje bolšyja ambicyi i dasiahaje bolšaha. «Heta siurrealistyčnaja fantastyčnaja satyra pra niebiaśpiečnuju prastoru sacyjalnych sietak i pryrodu virusnaj słavy, pra niešta, da čaho imkniecca ci pra što maryć kožny — mahčymaść stać zorkaj, niahledziačy — ci navat dziakujučy adsutnaści ŭsiakich dasiahnieńniaŭ», — piša kinakrytyk Piter Bredšou. Na jaho dumku, «Scenar mary» — stryječny brat «Być Džonam Małkavičam» Spajka Džonza i «Žyćcia najavie» Ryčarda Linklejtera, i jon vielmi zajmalny; hety film adnačasova na dziva bieskłapotny i ciažki ad pahrozy».
Jašče ŭ bolšaj stupieni, čym upłyŭ sacyjalnych sietak i virusnaja słava, stužka daśleduje čałaviečaje nieśviadomaje i toje, jak jano ŭpłyvaje na paŭsiadzionnaje žyćcio — jak kašmary Poła ŭpłyvajuć na jaho siamju i karjeru. Film napraŭdu zahłyblaje ŭ «trusinuju naru» čałaviečaha nieśviadomaha, tak, što stanovicca składana adroźnić, dzie son, a dzie realnaść.
Apošniaja častka filma zdajecca nie takoj zajmalnaj, jak pačatak i siaredzina, adznačajuć krytyki. Kiraŭniki ahienctva sprabujuć dapamahčy Połu atrymać vyhadu ź jaho słavy, raspracoŭvajučy «schavanuju rekłamu» (prodakt-płejsmient) — ideja, jakaja mahła b być bolš śmiešnaj, čym jana pakazana ŭ filmie. Tym nie mienš, hetaja stužka ź vialikaj dolaj imaviernaści vam zapomnicca. Budzie kamplimientam skazać, što vy možacie syści ź niezvyčajnym adčuvańniem, što ŭvieś hety čas byli ŭ śnie inšaha čałavieka.
Bolš pra kino:
Dziesiać novych sieryjałaŭ: voś što možna pahladzieć
Vyjšaŭ biełaruski sieryjał «Pracesy». Raskazvajem, čaho čakać
«Samaje hałoŭnaje ciapier — zabiaśpiečvać subjektnaść Biełarusi». Franak Viačorka raskazaŭ, ci jość stratehija ŭ demsiłaŭ i na što ŭpłyvaje Cichanoŭskaja
![](http://d3kcf2pe5t7rrb.cloudfront.net/img/w450h300crop1webp1/photos/stock/viachorka3-aajnw.jpg.webp)
Kamientary