«Zjechali 350 tysiač tych, chto nas nie padtrymlivaje». Zjaviŭsia zapis vystupu Karpiankova na vajskovych zborach va ŭnutranych vojskach
Zapis vystupu namieśnika ministra ŭnutranych spraŭ Mikałaja Karpiankova pierad mužčynami, vyklikanymi na zbory ŭ vajskovaj čaści 3214, atrymała «Lusterka». Voś što ź jaho stała viadoma.
Pavodle Karpiankova, da čaści 3214 prypisana kala 650 vajennaabaviazanych, ale vyklikali nie ŭsich. Na zbory, pavodle jaho, źjaviłasia 570 čałaviek. Kožny ź ich atrymaŭ uznaharodu za ŭdzieł u zborach — 140 rubloŭ. Raniej pra vypłaty za ŭdzieł u takich mierapryjemstvach nie paviedamlałasia.
«Nam u sistemie nacyjanalnaj biaśpieki advodzicca asobaja rola»
Mikałaj Karpiankoŭ pryhadaŭ słovy Łukašenki, što «padraździaleńni, jakija składajucca z dobraachvotnikaŭ Sił śpiecyjalnych apieracyj i ŭnutranych vojskaŭ, zjaŭlajucca reziervam kiraŭnika dziaržavy».
— Hałoŭnym reziervam kiraŭnika dziaržavy, — padkreśliŭ siłavik. — I ich zadačy kiraŭnik dziaržavy asabista budzie vyznačać, tamu nam u sistemie nacyjanalnaj biaśpieki advodzicca asobaja rola.
Karpiankoŭ adznačyŭ, što dla ŭzmacnieńnia śpiecnaza ŭ Biełarusi pačali stvarać novyja padraździaleńni pa 70 čałaviek u Hrodnie, Breście, Astraŭcy i Homieli. Taksama jon raskazaŭ, što ŭ novym atradzie śpiecnaza «Śmierč» siońnia 300 čałaviek «asnoŭnych» i 150 «zapasnych». Uzhadaŭ Karpiankoŭ taksama padraździaleńnie «Ryś» dla pracy na pryhraniččy, u jakim «200—300 čałaviek», a taksama atrad «Honar».
Mikałaj Karpiankoŭ zajaviŭ, što ŭsiaho ŭ novych padraździaleńniach — 1500 siłavikoŭ.
Prośby siłavikoŭ, kab padraździaleńni byli apranutyja, ekipiravanyja, uzbrojenyja, kab była sučasnaj i technika, dziaržavaj byli padtrymanyja, i na 2024 hod jany atrymali dadatkovaje finansavańnie.
«Abstanoŭka razradziłasia»
Pavodle Karpiankova, apieratyŭna-palityčnaja abstanoŭka ŭnutry krainy «znachodzicca pad poŭnym-poŭnym kantrolem».
— Kali niedzie paŭhoda tamu, na zborach u červieni, my kazali, što jość peŭnaja niebiaśpieka. Bataljon Kastusia Kalinoŭskaha (havorka pra połk Kalinoŭskaha. — «NN»), taktyčnaja hrupa «Teraryst» (napeŭna, havorka pra bataljon «Teror» — «NN»), taktyčnaja hrupa «Biełaja Ruś» (što heta za hrupa i chto ŭ jaje ŭvachodzić, Karpiankoŭ nie ŭdakładniŭ. — «NN»), jakija płanujuć ździejśnić terarystyčny akt na pryhraniččy, zachapić horad, zachapić zakładnikaŭ i adtul pačać tak zvany vyzvalenčy pachod na Respubliku Biełaruś z metaj źviaržeńnia ŭłady. Abo, skažam tak, jakija-niebudź pravakacyjnyja dziejańni dla raźviazvańnia łakalnaha kanfliktu ŭ polska-litoŭskim pryhraniččy.
Pavodle Karpiankova, «tady heta aktyŭna hučała» i jany da hetaha rychtavalisia.
— Na hety momant abstanoŭka razradziłasia, — skazaŭ Karpiankoŭ. — Z taho momantu jak u nas zjavilisia instruktary PVK «Vahnier» i zajavili, što razam z nami plačo ŭ plačo buduć vajavać za terytaryjalnuju cełasnaść Respubliki Biełaruś i zabiaśpiečvać nacyjanalnuju biaśpieku, vy viedajecie, usie hetyja zajavy «źbiehłych»… i Sachaščyka, dziejača takoha vialikaha, i Prakopjeva, i inšych syšli na ništo. I bolš takija zajavy nie hučać.
«Kalinoŭcaŭ niama»
Taksama Mikałaj Karpiankoŭ raspavioŭ pra toje, što KDB zatrymaŭ dyviersantaŭ, jakija nibyta «rychtavalisia da ažyćciaŭleńnia terarystyčnych aktaŭ, u tym liku i na čyhuncy».
— Zatrymany hrupy terarystaŭ kala schovanak, dzie jany brali vybuchoŭku i zbroju, zatrymany zamiežnyja emisary, jakija pryjechali siudy z hrašyma, — adznačyŭ namieśnik ministra. — U vyniku apieratyŭnaj pracy znojdzieny i šerah schovanak, jakija znachodzilisia ŭ pamiežžy. U tym liku i ŭ hetyja vychadnyja (havorka pra 14-15 kastryčnika. — Zaŭv. red.). I aŭtamaty, i mahaziny, zaradžanyja bojeprypasami (aficyjnych kamientaroŭ ad biełaruskich uładaŭ z hetaj nahody nie było. — Zaŭv. red.).
Siłavik dadaŭ, što «praca ŭ pamiežžy aktyŭna praciahvajecca». Jon paskardziŭsia, što abstanoŭka tam napružanaja i «jość kancentracyja vojskaŭ u rajonie litoŭskaj miažy».
A voś va ŭkrainskim pryhraniččy, pavodle Karpiankova, «kalinoŭcaŭ niama». «Ruchaŭ ich dyviersijna-raźviedvalnych hrup my ŭ hety momant nie nazirajem, tamu što ŭsio adsočvajem. I Siły śpiecyjalnych apieracyj Uzbrojenych sił, i našy pradstaŭniki tam znachodziacca», — zajaviŭ Karpiankoŭ.
«Našaha bajca litaralna pazaŭčora paraniła, i voś ciapier jon u špitali»
Adkazvajučy na pytańni, Karpiankoŭ padkreśliŭ važnaść ekipiroŭki i raspavioŭ pra vypadak, pra jaki nie było infarmacyi ŭ adkrytych krynicach.
— Ciapier pravodzili zaniatki z PVK, broniekamizelku hetu biareš (havorka pra staryja, jakimi ciapier karystajucca ŭ čaści. — Zaŭv. red.), aŭtamat pakłaści nie možaš — prosta nie zvodziacca ruki, — zajaviŭ Karpiankoŭ. — Našaha bajca litaralna pazaŭčora (16 kastryčnika. — Zaŭv. red.) paraniła, i voś ciapier jon u špitali. Kula zalacieła i prabiła łapatku tolki tamu, što broniekamizelka paviarnułasia ŭ hetaj situacyi. Jana krychu nie toj kanstrukcyi, nam inšaja patrebnaja. Tamu my stavim metu, što za pieršy kvartał 2024 hoda nabudziem usio novaje dla ŭsich našych padraździaleńniaŭ śpiecpryznačeńnia.
Taksama Karpiankoŭ raskazaŭ pra dalejšyja płany ŭ praviadzieńni zboraŭ. Pavodle jaho słoŭ, «kali abstanoŭka budzie spakojnaja», to navučać vajennaabaviazanych buduć viasnoj, letam i vosieńniu. Najbližejšyja zbory zapłanavanyja na kaniec kastryčnika — pačatak listapada. Ale mahčymy i inšyja zbory, adznačyŭ jon.
— My budziem uličvać hramadska-palityčnyja mierapryjemstvy. U lutym 2024 hoda projdzie Adziny dzień hałasavańnia. I budziem sačyć, jak buduć raźvivacca padziei, ciesna ŭzajemadziejničać z pravaachoŭnymi orhanami, — raspavioŭ Mikałaj Karpiankoŭ. — Hladzieć, što ŭ nas adbyvajecca, u tym liku ŭ pamiežžy. Nie vyklučana, što buduć peŭnyja ruchi ŭ polskich i litoŭskich charuhvach, u jakich słužać našy «biehłyja».
Jon nazvaŭ davoli realistyčnyja ličby tych, chto zjechaŭ z krainy praz palityčny pieraśled albo palityčnuju situacyju.
— Za miažu ŭciakli 350 tysiač tych, chto nas nie padtrymlivaje. Jość tyja, jakija aktyvizavalisia z pačatku śpiecyjalnaj vajennaj apieracyi (tak Karpiankoŭ nazyvaje vajnu va Ukrainie. — Zaŭvaha. red.), ale jość i tyja, chto zjaŭlajecca radykałami, kaho kuryrujuć śpiecyjalnyja słužby. Tamu nie vyklučany peŭnyja momanty mahčymaha vykarystańnia padraździaleńnia.
«Ja pryjechała ŭ 4:50 i była ŭ čarzie 77-ja». Jak ryełtarka nabyvała dla siabroŭki kvateru ŭ elitnym ŽK Minska9
Kamientary
Dzioŭbała niedarečnaje. Jak ža jana razradziłasia, kali navat siarod niekalkich socien pravieranych i pramytych, jak tabie zdajecca, łukašystaŭ, jocć ludzi, jakija dali infarmacyju i nie suprać adpravić ciabie ŭ piekła pry pieršaj ža mahčymaci?