Jak Izrail stvaryŭ sučasnaha «trajanskaha kania» dla «Chiezbały» — cikavyja detali apieracyi z pejdžarami
Apieracyja była staranna padrychtavana. Na jaje realizacyju pajšło niekalki hadoŭ.
Vydańnie The New York Times na ŭmovach ananimnaści zmahło parazmaŭlać z 12 krynicami, źviazanymi z abaronnymi i raźviedvalnymi strukturami, jakim była pradstaŭlena infarmacyja ab napadzie. Jany śćviardžajuć, što apieracyja, što pryviała da ŭzryvu pejdžaraŭ u Livanie, doŭha rychtavałasia izrailskim bokam.
Jašče da taho, jak lidar «Chiezbały» Chasan Nasrała vyrašyŭ pašyryć vykarystańnie pejdžaraŭ, Izrail pačaŭ stvarać padstaŭnuju kampaniju, jakaja vydavała siabie za mižnarodnaha vytvorcu pejdžaraŭ.
Pa słovach troch aficeraŭ raźviedki, ź jakimi razmaŭlali žurnalisty vydańnia, častkaj «izrailskaha frontu» stała vienhierskaja kampanija B.A.C. Consulting, jakaja mieła kantrakt na vytvorčaść pad tajvańskim brendam Gold Apollo.
Dla taho, kab schavać sapraŭdnych vytvorcaŭ pejdžaraŭ, akramia B.A.C. Consulting byli stvorany jašče prynamsi dźvie padstaŭnyja kampanii.
Vydańnie adznačaje, što vienhierskaja kampanija vykonvała taksama i zakazy zvyčajnych klijentaŭ. Ale adzinym klijentam, jaki sapraŭdy mieŭ dla jaje značeńnie, była «Chiezbała». Dla jaje vyrablalisia dalokija ad zvyčajnych aparaty, jakija mieli batarei z vybuchovym rečyvam PETN.
Takija pejdžary stali pastaŭlacca ŭ Livan letam 2022 hoda nievialikimi partyjami. Ale zakupki chutka pavialičylisia paśla taho, jak u lutym 2023 hoda Chasan Nasrała ŭ svaim telezvarocie vystupiŭ suprać mabilnych telefonaŭ.
«Vy pytajeciesia mianie, dzie ahient. Ja havaru vam, što telefon u vašych rukach, u rukach vašaj žonki i ŭ rukach vašych dziaciej — heta ahient. Zakapajcie jaho. Pakładzicie jaho ŭ žaleznuju skryniu i zamknicie jaje», — patrabavaŭ Nasrała.
Aściarohi Nasrały, jak zaŭvažaje vydańnie, byli vyklikanyja paviedamleńniami sajuźnikaŭ ab tym, što Izrail nabyŭ novyja srodki dla ŭzłomu telefonaŭ, jakija dazvalajuć dystancyjna aktyvavać mikrafony i kamiery, kab špijonić za ich uładalnikami.
Pa słovach troch supracoŭnikaŭ raźviedki, Izrail ukłaŭ miljony ŭ raspracoŭku technałohii i siarod «Chiezbały» i jaje sajuźnikaŭ raspaŭsiudzilisia čutki, što nijakaja suviaź pa mabilnym telefonie — navat zašyfravanyja dadatki dla abmienu paviedamleńniami — bolš nie źjaŭlajecca biaśpiečnaj.
Pa słovach krynic vydańnia, Nasrała nie tolki zabaraniŭ mabilnyja telefony na sustrečach bajevikoŭ «Chiezbały», jon taksama zahadaŭ, kab padrabiaznaści pierasoŭvańniaŭ i płanaŭ bajevikoŭ nikoli nie pieradavalisia pa mabilnych telefonach. Aficery pavinny byli zaŭsiody nasić z saboj pejdžary i ŭ vypadku bajavych dziejańniaŭ vykarystoŭvać ich dla taho, kab paviedamlać bajcam, kudy iści.
Pa słovach dvuch supracoŭnikaŭ amierykanskaj raźviedki, letam hetaha hoda pastaŭki pejdžaraŭ u Livan pavialičylisia. U krainu prybyli tysiačy adzinak i byli raźmierkavany siarod aficeraŭ «Chiezbały» i ich sajuźnikaŭ.
Dla «Chiezbały» jany byli achoŭnaj mieraj, ale ŭ Izraili supracoŭniki raźviedki nazyvali pejdžary «knopkami», na jakija možna było nacisnuć, kali nadydzie zručny momant.
Vyhladaje, što hety momant nastupiŭ na hetym tydni. Pa słovach troch krynic vydańnia, kab ažyćciavić vybuchi, Izrail razasłaŭ na pejdžary paviedamleńnie na arabskaj movie, jakoje byccam by zychodziła ad vyšejšaha kiraŭnictva «Chiezbały». Praź niekalki siekund Livan pahruziŭsia ŭ chaos.
Bort Łukašenki z-za techničnych prablem viarnuŭsia ŭ Minsk bieź jaho7
Kamientary