Jak źniać aŭtamabil z uliku ŭ Biełarusi, navat kali jaho daŭno ŭ vas niama ci mašyna ŭžo zarehistravana ŭ inšaj krainie

Što dla hetaha treba?

Kab źniać transpart z uliku, treba źviartacca ŭ rehistracyjnaje adździaleńnie DAI biez pryviazki da miesca prapiski.

Zdymajuć transpart z uliku pa dźviuch pryčynach: 

• dla prodažu;
• śpisańnie va ŭtyl.

Najbolš raspaŭsiudžany varyjant — źniaćcie z uliku dla prodažu, kali ŭzamien žaleznym rehistracyjnym znakam vydajuć tranzitnyja. Techpašpart aŭtamabila razrazajuć, unutry staviać piačatku z dataj źniacca transpartu z uliku. Jeździć na «tranzitach» možna ciaham 90 dzion.

Što treba, kab pastavić aŭtamabil na tranzity?

• Zajava na źniaćcie transpartnaha srodku z rehistracyi.
• Techpašpart.
• Pašpart ułaśnika. Abo davieranaść i pašpart davieranaj asoby, kali źniaćcie ažyćciaŭlaje nie ŭłaśnik.
• Paćviardžeńnie apłaty kampjutarnych pasłuh i dziaržpošliny za vydaču tranzitnych rehistracyjnych znakaŭ.
• Dziejnaja strachoŭka.

Kolki kaštuje?

Zajava na źniaćcie z uliku kaštuje 0,08 bazavaj vieličyni (3,2 rubla). Kampjutarnyja pasłuhi — 0,04 bazavaj (1,6 rubla). Dziaržpošlina za vydaču tranzitnych numaroŭ — 1 bazavaja (40 rubloŭ).

Pavialičyć

Jak śpisać va ŭtyl

U adroźnieńnie ad pracedury pastanoŭki na tranzitnyja numary, dla śpisańnia va ŭtyl vam nie treba pryvozić transpartny srodak dla źvierki VIN-numara.

Kab śpisać aŭtamabil abo inšy transpartny srodak va ŭtyl, nieabchodna zapłacić 0,08 bazavaj (3,2 rubla) za zajavu i 0,04 bazavaj (1,6 rubla) za kampjutarnyja pasłuhi.

Kab źniać z uliku transpartny srodak dla ŭtylizacyi, nieabchodna vykanać adnu z nastupnych umoŭ:

• razam z zajavaj i paćviardžeńniem apłaty zdać u rehistracyjnaje padraździaleńnie paśviedčańnie ab rehistracyi i/abo rehistracyjnyja znaki;
• dakumientalna paćvierdzić fakt zdačy transpartnaha srodku na ŭtylizacyju;

Kali vykanać adnu z vyšej apisanych umoŭ niemahčyma, treba dačakacca taho momantu, kali ciaham hoda da padačy zajavy ŭ rehistracyjnym padraździaleńni budzie adsutničać infarmacyja, jakaja paćviardžaje ekspłuatacyju transpartnaha srodku.

Inšymi słovami, źniać z uliku pa sproščanaj pracedury možna luby transpartny srodak, jaki ciaham hoda nie prachodziŭ techahlad, na im nie parušali PDR, na jaki nie vypisvali strachoŭku.

Taki varyjant pasuje ŭ tym liku ŭ tych vypadkach, kali čałaviek daŭno «pradaŭ» mašynu pa davieranaści, a značyć, ni transpartnaha srodku, ni dakumientaŭ na jaho jurydyčny ŭłaśnik nie maje.

Što rabić, kali aŭtamabil zarehistravali ŭ inšaj dziaržavie?

Niekatoryja biełarusy, jakija žyvuć u krainach Bałtyi, praz uviedzienyja hetymi krainami abmiežavańni na ruch aŭto ź biełaruskimi numarami byli vymušanyja zarehistravać biełaruskija mašyny ŭ hetych krainach.

Takija mašyny aŭtamatyčna z uliku ŭ Biełarusi nie zdymajucca, značyć, za ich pa-raniejšamu buduć naličvać transpartny padatak. 

Kab hetaha paźbiehnuć, taki transpart treba źniać z uliku ŭ Biełarusi. Zrabić heta možna biez pradstaŭleńnia aŭto na ahlad. 

Dla hetaha vam spatrebicca źviarnucca ŭ rehistracyjnaje padraździaleńnie DAI i pradstavić biełaruskija rehistracyjnyja znaki i techpašpart novaj krainy rehistracyi.

Jašče adzin varyjant — pačakać hod, kab u biełaruskaha DAI nie było nijakich źviestak pra vaš aŭtamabil. U takim vypadku možna budzie śpisać transpartny srodak va ŭtyl biez pradstaŭleńnia jakich-niebudź dakumientaŭ.

Ale tut varta pamiatać, što transpartnyja srodki, źniatyja z uliku dla ŭtylizacyi, nielha budzie znoŭ pastavić na ŭlik u Biełarusi.

• 0
• 0
• 0
• 0
• 0
• 0
• 0
• 0