Vybuch hihanckaha składa bojeprypasaŭ u Ćviarskoj vobłaści: što viadoma na hety momant
U noč na 18 vieraśnia ŭkrainskija bieśpiłotniki atakavali arsienał Hałoŭnaha rakietna-artyleryjskaha ŭpraŭleńnia Ministerstva abarony Rasii pobač z horadam Taropcam u Ćviarskoj vobłaści. U vyniku tam pačałasia detanacyja bojeprypasaŭ, prahrymieli niekalki mahutnych vybuchaŭ.
Pavodle danych amierykanskaj spadarožnikavaj sistemy FIRMS, ahniom achoplenaja ŭsia terytoryja arsienała ŭ rajonie horada Taropca. Spadarožnikavyja zdymki pakazvajuć maštabnyja ačahi ŭzharańnia na miescy vybuchaŭ bojeprypasaŭ, jakija praciahvajuć raspaŭsiudžvacca pa ŭsioj terytoryi składa.
Na składzie bojeprypasaŭ pad Taropcam mahli znachodzicca tysiačy ton roznaha ŭzbrajeńnia. Kiraŭnik Centra supraćdziejańnia dezynfarmacyi pry RNBA Ukrainy Andrej Kavalenka zajaviŭ, što na składzie ŭ Taropcy nibyta zachoŭvalisia rakiety dla «Hradaŭ», S-300 i S-400, a taksama balistyčnyja rakiety dla «Iskanderaŭ». Akramia taho, pa jaho słovach, tam pačali rabić zbor zapasaŭ paŭnočnakarejskich rakiet KN-23.
Viadoma, pravieryć praŭdzivaść hetych źviestak składana, ale skład hety ŭ kožnym vypadku maštabny. Rasśledavalnicki prajekt «Schiemy» («Radyjo Svaboda») piša, što kožnaje ź niekalkich dziasiatkaŭ schoviščaŭ arsienała źmiaščaje da 240 ton bojeprypasaŭ. U Z-kanałach adznačajuć, što ahulnaja kolkaść bojeprypasaŭ, jakija tam zachoŭvalisia, moža dasiahać navat 30 tysiač ton.
Niesumnienna, što źniščeńnie hetaha składa moža akazać istotny ŭpłyŭ na mahčymaści zabieśpiačeńnia rasijskich vojskaŭ dla vajny va Ukrainie.
Prezident Ukrainy Uładzimir Zialenski ŭ svaim štodzionnym zvarocie padziakavaŭ ukrainskim vajskoŭcam za ich pracu, zhadaŭšy «dalnabojnaść» i «dakładnaść», što mnohija ŭspryniali jak kamientar da ŭdaraŭ pa składzie bojeprypasaŭ u Taropcy.
Choć Zialenski prama nie zhadaŭ kankretnyja padziei, jahonyja słovy prahučali adrazu paśla paviedamleńniaŭ pra paražeńnie składa pad Taropcam.
Zialenski padkreśliŭ, što ŭdary pa rasijskich celach asłablajuć voraha i natchniajuć ukraincaŭ, padziakavaŭšy za heta siłam biaśpieki i śpiecyjalnym słužbam, uklučajučy SBU, HUR i Siły śpiecyjalnych apieracyj.
Spadarožnikavyja zdymki i kadry z sacsietak paćviardžajuć mocnyja pažary i vybuchi ŭ rajonie składa ŭ Taropcy.
Rasijskija ŭłady pryznali sam fakt pažaru i ranieńnia bolš jak dziesiaci čałaviek «u vyniku padzieńnia abłomkaŭ BPŁA», ale nie paćvierdzili ŭdaru pa składzie z bojeprypasami. Hubiernatar Ćviarskoj vobłaści Ihar Rudzienia zajaviŭ, što ŭsie drony, maŭlaŭ, byli źniščanyja, a pažar tłumačycca padzieńniem abłomkaŭ. Hetyja słovy stali nahodaj dla sarkastyčnych kamientaroŭ jak va ŭkrainskich, tak i ŭ rasijskich błohach, vialikuju padborku jakich sabrała Ruskaja słužba «Radyjo Svaboda».
U toj ža čas paviedamlajecca, što žycharam Ćviarskoj vobłaści pryhrazili kryminalnymi spravami za publikacyju fota i videa pažaru na rakietnym składzie.
Rasijskaje MNS pačało rassyłku paviedamleńniaŭ z prośbaj nie raspaŭsiudžvać materyjały, jakija pakazvajuć nastupstvy ataki bieśpiłotnikaŭ, papiaredziŭšy pra mahčymuju kryminalnuju adkaznaść.
Anałahičnaje papiaredžańnie ab kryminalnaj adkaznaści źjaviłasia ad administracyi Toropieckaj municypalnaj akruhi, dzie zajavili, što raspaŭsiudžvańnie fota i videa słužyć na karyść voraha.
Adnak ža da taho času, adrazu paśla zdareńnia, šmat što z fota– i videamateryjałaŭ užo paśpieła trapić u Sieciva.
U toj ža čas narviežskaja hrupa manitorynhu ziemlatrusaŭ i vybuchaŭ NORSAR paviedamiła, što jaje śpiecyjalisty zafiksavali prynamsi 17 «siejśmičnych padziej» u rajonie Taropca. Pavodle paviedamleńnia na sajcie arhanizacyi, hetyja padziei adbylisia ŭ pieryjad z 02:30 da 08:00 pa narviežskim časie (z 03:30 da 09:00 pa biełaruskim).
Najbolš mocny sihnał mieŭ mahnitudu 2,5, paviedamlajuć narviežskija ekśpierty. Pra pryčyny hetych siejśmičnych padziej u paviedamleńni nie skazana, ale možna mierkavać, što jany niepasredna źviazanyja z mahutnym adnačasovym vybucham vialikaj kolkaści rakiet.
Miascovyja žychary paviedamlajuć, što vybuchi na arsienale pad Taropcam byli nastolki mocnymi, što adčuvalisia za dziasiatki kiłamietraŭ. Žychary vioski Kudzina (2 km ad arsienała) paviedamlajuć, što mocna paciarpieli damy.
«Maja maci paciarpieła i była ŭ šokavym stanie. Jany čakajuć dapamohi, ale ciapier suviazi ź joj niama», — raskazała dačka adnoj z paciarpiełych.
U vioscy Talica (7 km) vybuchnoj chvalaj vybiła vokny i paškodziła dźviery ŭ miascovym dziciačym sadku. Žychary raskazvajuć, što mocnyja vybuchi pačalisia prykładna a 4-j hadzinie ranicy, i niekatoryja chavalisia ŭ susiednich vioskach.
Navat u Andreapali (kala 40 km ad miesca vybuchaŭ) dryžali šyby i laskali dźviery. Žychary raskazvajuć, što vybuchnaja chvala pabudziła ich, a nieba ŭvadnačas pačyrvanieła.
Šmat inšych śviedčańniaŭ miascovych žycharoŭ sabrała vydańnie «Novaja hazieta. Jevropa».
Pry hetym skład bojeprypasaŭ u Taropcy, jaki byŭ atakavany ŭ noč na 18 vieraśnia, byŭ abaronieny sistemaj baraćby ź bieśpiłotnikami, na jakuju było vydatkavana amal 212 miljonaŭ rasijskich rubloŭ (kala 2,3 miljona dalaraŭ). Heta paćviardžajuć danyja dziaržaŭnych zakupak.
Sistema była nabytaja vosieńniu 2020 hoda pa zamovie Ministerstva abarony Rasii. U košt uvachodzili pastaŭka, ustalavańnie i puskanaładačnyja raboty. Imia vykanaŭcy rabot nieviadomaje, bo aŭkcyjon pravodziŭsia ŭ zakrytym režymie.
Budaŭnictva ž samoha arsienała ŭ Taropcy kaštavała rasijskamu biudžetu 3,6 miljarda rubloŭ (kala 40 miljonaŭ dalaraŭ).
U 2018 hodzie hienierał Dźmitryj Bułhakaŭ, jaki tady zajmaŭ pasadu namieśnika ministra abarony Rasii, zajaŭlaŭ, što hety abjekt «adpaviadaje samym vysokim suśvietnym standartam» i «dazvalaje schavać zapasy rakiet i bojeprypasaŭ ad źniešniaha ŭździejańnia, a taksama zabiaśpiečyć ich zachavanaść i vybuchapažarabiaśpieku».
U lipieni 2024 hoda hienierała Bułhakava zatrymali pa abvinavačvańni ŭ machlarstvie.
«Ja taja jašče pamidorka». Što Ihar Tur piša ŭ telehram-čatach sa svajho asnoŭnaha akaŭnta10
Kamientary