Zakachanyja ŭ Minsku chacieli sabrać z padpisčykaŭ $10 tysiač na viasielle mary. Kolki ž u vyniku im zadanacili?
Minčuki Alina i Jaŭhien nie adzin hod maryli pra viasielle jak u kino. Adnojčy navat pieranieśli śviata, bo nie mahli jaho apłacić. A sioleta vyrašyli paprasić u instahramie nieabyjakavych ludziej skinucca hrašyma. Što ž z hetaha atrymałasia?
Maładyja ludzi pačali płanavać viasielle jašče ŭ 2022 hodzie — za 10 miesiacaŭ da mierkavanaj daty śviata. Jany hladzieli šykoŭnyja placoŭki dla praviadzieńnia viasiella, abirali fatohrafa, a niaviesta vyrašała, jakuju sukienku sabie pašyć. Chutka stała zrazumieła, što na heta patrebna prykładna dva vahony hrošaj, jakich maładyja ludzi nie mieli, ale spadziavalisia nazapasić. Ale ž nie atrymałasia, i viasielle pryjšłosia adkłaści na žnivień 2024 hoda.
U niejki momant Jaŭhien sprabavaŭ pierakanać kachanuju, što lepiej pajechać na paŭhoda žyć na Bali, čym tracicca na pafasnaje śviata. Niaviesta ž kateharyčna admoviłasia. Jaje hałoŭny arhumient byŭ taki: na adpačynak jany jašče paśpiejuć zarabić, a viasielle raz u žyćci.
Sioleta ŭ krasaviku Alina znoŭ pačała zapisvać sumnyja storys:
«Praz čatyry miesiacy ŭ nas viasielle, a ŭ skarboncy 26 dalaraŭ. Kožny raz my załazim u skarbonku, kab to studyju apłacić, to rekłamu, to jašče niešta. I zdajecca, što zarobki byccam nie maleńkija, ale pry hetym nie atrymlivajecca adkłaści ad słova «zusim». Jak ludzi na kvatery źbirajuć, u mianie ŭvohule ŭ hałavie nie ŭkładajecca».
Ahułam na staronkach Aliny i Jaŭhiena ŭ instahramie kala 17 tysiač padpisčykaŭ. Para taksama mieła nievialiki biznes — trymała fotastudyju i šoŭrum viačernich sukienak.
Za 73 dni da daty viasiella jany vyrašyli abvieścić zbor na śviata.
— Vy tolki ŭjavicie, kali 10 tysiač čałaviek dašle nam usiaho pa 1 dalary. Tady my zmožam lohka ździejśnić svaju maru. A kali bolš… Ujavicie, jaki heta kruty ekśpierymient — pahladzieć, jakoje viasielle možna zrabić dziakujučy padpisčykam, — z entuzijazmam kazała Alina ŭ videa.
Rolik nabraŭ 39500 prahladaŭ i vyklikaŭ chvalu chejtu. Nie ŭsie zrazumieli, jak možna terminova źbirać hrošy na viasielle, kali isnuje šmat zboraŭ na lačeńnie dziaciej.
— Samaje cikavaje, što, kali ja zadaju samaje zvyčajnaje pytańnie: «A što kankretna ŭ hetym drennaha?» — mnie jašče nichto nie zmoh adkazać, — ździŭlałasia ŭ storys dziaŭčyna.
Jana tłumačyła, što, mabyć, nie treba było vykarystoŭvać słova «zbor», jakoje začapiła mnohich.
— Mnie prosta nie zrazumieła, čamu ludziej tak tryhieryć toje, što niejkaja kolkaść ludziej skinie nam pa rubli na viasielle? Vy baiciesia, što ŭ nas usio atrymajecca i vam budzie niajomka, što vy tak nie pasprabavali? Što vam było soramna prasić u kahości dapamohi?
Ale ž pieršy dzień ekśpierymientu pakazaŭ, što ideja Aliny i Jaŭhiena niebieznadziejnaja — im zadanacili 162 rubli. Dziaŭčyna raspaviała, što siarod pieršych sponsaraŭ byŭ pažyły mužčyna, jaki razam z žonkaj pieravioŭ zakachanym 13 rubloŭ. Jon taksama paviedamiŭ, što ich šlub ciahniecca 63 hady, i pažadaŭ pary takoje ž praciahłaje siamiejnaje žyćcio.
Dziaŭčyna pačała fantaziravać, jakim cudoŭnym byŭ by śviet, kali b pieryjadyčna ludzi voś tak skidvalisia pa rubli, kab realizavać maru kahości — naprykład, sabrać hrošy na adpačynak tamu, chto nikoli nie byŭ na mory.
Spačatku spravy ruchalisia aptymistyčna: na druhi dzień para atrymała jašče 190 rubloŭ, na treci — 210 rubloŭ. Ale ž paśla pamier danataŭ staŭ źmianšacca. Na čaćviorty dzień pieraličyli kala 65 rubloŭ, na piaty — usiaho 5 rubloŭ.
U chutkim časie zakachanyja pierastali rabić štodzionnyja spravazdačy.
Apošniaje, što jany raskazali ŭ błohu, — heta suma danataŭ, jakuju atrymali ad padpisčykaŭ za miesiac. Alina i Jaŭhien pakazali, što na rachunku, jaki jany zaviali dla zboru na viasielle, kala 669 dalaraŭ.
Niahledziačy na toje, što sabrać 10 tysiač dalaraŭ u instahramie vidavočna nie atrymałasia, para ŭsio ž zładziła viasielle — i navat nie adno. U ich była i vyjaznaja cyrymonija, jak u halivudskich filmach, i žartaŭlivaje śviata ŭ vioscy.
Darečy, zbor hrošaj z roznaj pazityŭnaj nahody stanovicca ŭsio bolš papularnym siarod biełaruskich błohieraŭ. Naprykład, hiniekałahinia-błohierka Alena Vajciachovič, skandał jakoj z klijentkaj dajšoŭ ažno da Minzdaroŭja, abviaščała letam zbor hrošaj na svoj dzień naradžeńnia.
Alena vielmi spadziavałasia, što danataŭ chopić na novy ajfon, ale atrymała ŭ padarunak 935 rubloŭ. Błohierka nie chavała ŭ storys rasčaravańnia tym faktam, što jana maje bolš za 40 tysiač padpisčykaŭ, ale pieraličyli joj sumu, jakaja nie ŭraziła.
— Vielmi kryŭdna, što šmat ludziej zadajuć pytańni ŭ pramych efirach, znachodziać adkazy na staroncy, ale heta nie adbiłasia ŭ realnaj materyjalnaj padtrymcy navat u 3-5 rubloŭ. Ja zasmučanaja. Ja spadziavałasia ŭ hłybini dušy, što zmahu lohka ŭbačyć 5 tysiač rubloŭ u vyhladzie danataŭ, uličvajučy achopy pa 10 tysiač na dzień i bolš, — napisała błohierka paśla śviata.
Para choča sabrać 10 tysiač dalaraŭ z padpisčykaŭ u instahramie na viasielle mary
Śpiavak Piotr Jałfimaŭ znoŭ ažaniŭsia
Kolki sioleta kaštuje zrabić viasielle ŭ Minsku? Realnyja ličby ad tych, chto niadaŭna schadziŭ u ZAHS
Hod tamu biełarus, jaki lačyŭsia ŭ ankacentry, zrabiŭ prapanovu svajoj dziaŭčynie. Ciapier para pažaniłasia
Papularny tyktokier z Rasii tusić u darahich restaranach Minska: «Byccam bamžu padali. Žarycie, na zdaroŭje»22
Kamientary
A kali naadvarot? Kali kožnamu padpisčyku z 10000 adpravić pa 1 dalary? Heta ž tak mała: usiaho 1 dołar!