Na rynku nieruchomaści Minska — ažyjataž. Raźbirajuć navat elitnaje žyllo

«Anłajnier» pryvodzić mierkavańnie śpiecyjalista ahienctva nieruchomaści «Avanhard nieruchomaść» Vasila Savanoviča.

— Niezaŭvažna rynak pačaŭ raści z červienia 2022 hoda. Dzieści na paŭpracenta ŭ miesiac, dzieści na pracent. U toj čas banki prapanoŭvali kredyty pad 20% hadavych, a tamu ludzi, jakija nie majuć na rukach 100% nieabchodnaj sumy, z nabyćciom nieruchomaści nie śpiašalisia. Uzimku 2023 hoda adbyŭsia pierałom — staŭku refinansavańnia źnizili, i ŭžo da leta kredyty vydavalisia pad 14%. Biełarusy hetuju roźnicu acanili. Jak vynik — u sakaviku, a zatym i ŭ krasaviku kolkaść ździełak praktyčna dasiahnuła adznaki ŭ 1700. Uletku hetaja ličba trymałasia na ŭzroŭni 1600+. Naprykład, u žniŭni było zarehistravana 1612 dahavoraŭ kupli-prodažu. Heta prykładna na 20% bolš, čym hod tamu, — kaža Vasil.

Siaredniaja cana kvadratnaha mietra taksama paŭzie ŭvierch. U minułym miesiacy jana skłała $1576 pa kursie — heta na 9,4% bolš, čym u pačatku 2024-ha. Pryčym ekśpiert pierakanany, što heta nie miaža.

— Kali situacyja na rynku kardynalna nie źmienicca, to ŭžo praz paŭhoda my dabiaremsia da $1700 za mietr. Jość vialikija šancy, što chutka my ŭbačym adzin ź pikaŭ koštu nieruchomaści ŭ Biełarusi. Tamu tym, chto prosta ciapier płanuje vyrašyć kvaternaje pytańnie, lepš paśpiašacca: raźličvać na toje, što ŭ bližejšy čas ceny źniziacca, nie varta.

Śviežy prykład: u traŭni ja pradaŭ adnapakajoŭku na Paŭdniovym Zachadzie za $52 500, ale ŭžo ŭ žniŭni padobnaje žyllo (z takoj ža płaniroŭkaj i płoščaj, z ramontam) pajšło za $57 500.

Hałoŭnym faktaram, jaki ŭpłyvaje na rynak nieruchomaści, pa-raniejšamu zastajecca dastupnaść kredytavańnia. Pa słovach Vasila, pałova ździełak prachodzić z pryciahnieńniem bankaŭskich hrošaj.

— Niahledziačy na toje što Biełarusbank padniaŭ staŭku da 16%, a niekatoryja inšyja banki taksama pavialičyli adsotak hadavych da 16-17%, dla ludziej heta ŭsio jašče psichałahična prymalnaja adznaka. Kali ž hetaja ličba pavialičycca da 18%, niekatoryja biełarusy dakładna naściarožacca i stanuć bolš strymanymi: vypłačvać takija adsotki dla ich užo budzie baluča. A ŭžo pry 20% i bolš lik kredytaŭ mocna pamienšycca: takaja prapanova budzie mała kamu cikava.

Nu a pakul popyt na kvatery, pryčym u absalutna lubym siehmiencie — ad elitki da ekanomu, praciahvaje raści. Tady jak prapanoŭ, naadvarot, stanovicca ŭsio mienš. Ciapier rynak — na baku pradaŭca.

— Užo daŭno zusim nie pakupnik vybiraje pamiž piaćciu abjektami, a pradaviec — pamiž piaćciu patencyjalnymi płacielščykami. Za likvidnym varyjantami — z adekvatnym ceńnikam, dobraj łakacyjaj abo ramontam — vystrojvajucca čerhi.

I pačynajecca handal na pavyšeńnie. U majoj praktycy kvatery pradavalisia i na $3000, i na $5000 daražej za pieršapačatkovy košt. Dla žylla za $50 000 heta vielmi navat istotnaja prybaŭka.

Ekśpiert zapeŭnivaje: ciapier ludzi hatovyja razhledzieć lubyja varyjanty. Usio roŭna, dzie znachodzicca žyllo, ci jość u im ramont (choć abjekty z dobrym stanoviščam źmiatajuć z rynku jašče chutčej)…

— Viadoma, najbolšym popytam karystajecca biudžetny siehmient. Ale i cikavaść da elitnaj nieruchomaści pavialičyłasia. Raniej było pa 10 ździełak u hod pa abjektach za $300 000 — 500 000, a ciapier — pa niekalki ŭ miesiac. Pryčym kuplajuć navat kvatery i damy za $1 000 000. Ciapier $2000-3000 za mietr — całkam narmalnaja cana za žyllo z dobrym ramontam.

Pra rekordy. Samy darahi «kvadrat» žniŭnia znojdzieny na praśpiekcie Pieramožcaŭ. Za 103 kvadratnyja mietry pakupnik zapłaciŭ $315 000 u ekvivalencie (abo $3067 za mietr).

A voś samy tanny zaŭvažany na vulicy Vieraščahina — $829 pa kursie. Tut pradavałasia kvatera ŭ błakiravanym domie. Jaje płošča — 60,3 «kvadrata».

Samaja važkaja ździełka minułaha miesiaca — $350 000 u ekvivalencie za žyllo płoščaj 130 kvadratnych mietraŭ na vulicy Pijanierskaj. Biudžetniej za ŭsio abyšłasia adnapakajoŭka na 27 «kvadrataŭ» u Masiukoŭščynie: kaštavała jana ŭsiaho $30 000 pa kursie.

• 0
• 1
• 0
• 3
• 0
• 0
• 0
• 0