Каманда буксіровачнага цеплахода, які сеў на мель у Гомельскай вобласці, ад голаду занялася браканьерствам.
Як паведаміў пракурор аддзела пракуратуры Гомельскай вобласці Сяргей Салоўскі, каманда аднаго з беларускіх рачных партоў у складзе пяці чалавек была камандзіраваная на буксіровачным цеплаходзе ў Кіеў. Ва ўкраінскай сталіцы яны ўзялі на борт занадта шмат грузу, які абмяжоўваў магчымасці цеплахода ў праходзе па рацэ. Тым не менш буксір дайшоў да Беларусі, але на тэрыторыі Палескага радыяцыйнага запаведніка сеў на мель.
Каманда па рацыі паведаміла ў порт пра бедства, а там адказалі, што дапамогі другога цеплахода давядзецца чакаць некалькі дзён.
Пакуль каманда чакала падмогі, у яе закончыўся правіянт, таму было прынята рашэнне лавіць рыбу.
Вудаў не было, таму падключылі электракабель да кантролера для кіравання электрарухавіком судна, і спусцілі кабель у ваду. Каманда буксіра вылавіла забароненымі прыладамі лоўлі 44 рыбіны.Здабычай сталі шчупакі, судакі, плотка, чахонь. Урон навакольнаму асяроддзю быў ацэнены амаль у 30 мільёнаў рублёў.
У момант лоўлі каманду цеплахода заўважылі супрацоўнікі інспекцыі па ахове жывёльнага і расліннага свету, якія зафіксавалі ўсё, што адбывалася, на відэа. Была распачата крымінальная справа за браканьерства.
Каманда поўнасцю кампенсавала ўрон.Суд з улікам змякчальных акалічнасцяў (адсутнасць ежы ў крытычны момант) прыгаварыў капітана судна да паўтара года пазбаўлення волі з адтэрміноўкай выканання прыгавору на паўтара года, астатніх — да года пазбаўлення волі ўмоўна.
Прысуд быў абвешчаны ў лістападзе. Калі яго не абскардзяць і не апратэстуюць, ён увойдзе ў законную сілу 26 лістапада.
Чалы: Чым даўжэй Лукашэнка марудзіць з выбарамі, тым больш аргументаў, каб яму не ісці15
Каментары