Kamanda buksirovačnaha ciepłachoda, jaki sieŭ na miel u Homielskaj vobłaści, ad hoładu zaniałasia brakańjerstvam.
Jak paviedamiŭ prakuror adździeła prakuratury Homielskaj vobłaści Siarhiej Sałoŭski, kamanda adnaho ź biełaruskich račnych partoŭ u składzie piaci čałaviek była kamandziravanaja na buksirovačnym ciepłachodzie ŭ Kijeŭ. Va ŭkrainskaj stalicy jany ŭziali na bort zanadta šmat hruzu, jaki abmiažoŭvaŭ mahčymaści ciepłachoda ŭ prachodzie pa race. Tym nie mienš buksir dajšoŭ da Biełarusi, ale na terytoryi Paleskaha radyjacyjnaha zapaviednika sieŭ na miel.
Kamanda pa racyi paviedamiła ŭ port pra biedstva, a tam adkazali, što dapamohi druhoha ciepłachoda daviadziecca čakać niekalki dzion.
Pakul kamanda čakała padmohi, u jaje zakončyŭsia pravijant, tamu było pryniata rašeńnie łavić rybu.
Vudaŭ nie było, tamu padklučyli elektrakabiel da kantrolera dla kiravańnia elektraruchavikom sudna, i spuścili kabiel u vadu. Kamanda buksira vyłaviła zabaronienymi pryładami łoŭli 44 rybiny.Zdabyčaj stali ščupaki, sudaki, płotka, čachoń. Uron navakolnamu asiarodździu byŭ acenieny amal u 30 miljonaŭ rubloŭ.
U momant łoŭli kamandu ciepłachoda zaŭvažyli supracoŭniki inśpiekcyi pa achovie žyviolnaha i raślinnaha śvietu, jakija zafiksavali ŭsio, što adbyvałasia, na videa. Była raspačata kryminalnaja sprava za brakańjerstva.
Kamanda poŭnaściu kampiensavała ŭron.Sud z ulikam źmiakčalnych akaličnaściaŭ (adsutnaść ježy ŭ krytyčny momant) pryhavaryŭ kapitana sudna da paŭtara hoda pazbaŭleńnia voli z adterminoŭkaj vykanańnia pryhavoru na paŭtara hoda, astatnich — da hoda pazbaŭleńnia voli ŭmoŭna.
Prysud byŭ abvieščany ŭ listapadzie. Kali jaho nie abskardziać i nie apratestujuć, jon uvojdzie ŭ zakonnuju siłu 26 listapada.
Kamientary