Расія можа рыхтаваць дыверсіі супраць міжнародных падводных камунікацый
Распрацоўка дыверсійных аперацый вядзецца праз Галоўнае ўпраўленне глыбакаводных даследаванняў (ГУГД) Мінабароны Расіі, паведамляе «Голас Амерыкі» са спасылкай на CNN.
ЗША фіксуюць узмацненне расійскай вайсковай актыўнасці ў раёне ключавых падводных кабеляў і мяркуюць, што цяпер Расія можа з большай імавернасцю праводзіць патэнцыйныя дыверсійныя аперацыі, накіраваныя на вывад з ладу найважнейшай часткі сусветнай камунікацыйнай інфраструктуры, паведаміла тэлекампанія CNN са спасылкай на двух ананімных амерыканскіх чыноўнікаў ва ўрадзе ЗША.
«Мы занепакоеныя павышанай ваенна-марской актыўнасцю Расіі па ўсім свеце і тым, што разлікі Расіі па нанясенні шкоды падводнай крытычнай інфраструктуры ЗША і іх саюзнікаў могуць змяніцца, — заявіў CNN адзін з чыноўнікаў. — Расія працягвае развіваць ваенна-марскія магчымасці для ажыццяўлення падводных дыверсій, у асноўным з дапамогай ГУГД — сакрэтнага падраздзялення, які кіруе надводнымі караблямі, падводнымі лодкамі і ваенна-марскімі беспілотнікамі».
ЗША рэгулярна адсочваюць расійскія караблі, якія патрулююць паблізу найважнейшых аб'ектаў марской інфраструктуры і падводных кабеляў, часта ўдалечыні ад расійскіх берагоў.
Тэлекампанія паведамляе, што асноўным цэнтрам ваеннага назірання і актыўнасці з боку Расіі сталі мора вакол Паўночнай Еўропы: у мінулым годзе сумеснае расследаванне, праведзенае Швецыяй, Даніяй, Нарвегіяй і Фінляндыяй, паказала, што Расія мае флот меркаваных караблёў-шпіёнаў, якія дзейнічаюць у водах Паўночнай Еўропы з мэтай патэнцыйных дыверсій.
Каментары