Як зняць аўтамабіль з уліку ў Беларусі, нават калі яго даўно ў вас няма ці машына ўжо зарэгістравана ў іншай краіне

Што для гэтага трэба?

Каб зняць транспарт з уліку, трэба звяртацца ў рэгістрацыйнае аддзяленне ДАІ без прывязкі да месца прапіскі.

Здымаюць транспарт з уліку па дзвюх прычынах: 

• для продажу;
• спісанне ва ўтыль.

Найбольш распаўсюджаны варыянт — зняцце з уліку для продажу, калі ўзамен жалезным рэгістрацыйным знакам выдаюць транзітныя. Тэхпашпарт аўтамабіля разразаюць, унутры ставяць пячатку з датай зняцца транспарту з уліку. Ездзіць на «транзітах» можна цягам 90 дзён.

Што трэба, каб паставіць аўтамабіль на транзіты?

• Заява на зняцце транспартнага сродку з рэгістрацыі.
• Тэхпашпарт.
• Пашпарт уласніка. Або даверанасць і пашпарт даверанай асобы, калі зняцце ажыццяўляе не ўласнік.
• Пацвярджэнне аплаты камп'ютарных паслуг і дзяржпошліны за выдачу транзітных рэгістрацыйных знакаў.
• Дзейная страхоўка.

Колькі каштуе?

Заява на зняцце з уліку каштуе 0,08 базавай велічыні (3,2 рубля). Камп'ютарныя паслугі — 0,04 базавай (1,6 рубля). Дзяржпошліна за выдачу транзітных нумароў — 1 базавая (40 рублёў).

Павялічыць

Як спісаць ва ўтыль

У адрозненне ад працэдуры пастаноўкі на транзітныя нумары, для спісання ва ўтыль вам не трэба прывозіць транспартны сродак для зверкі VIN-нумара.

Каб спісаць аўтамабіль або іншы транспартны сродак ва ўтыль, неабходна заплаціць 0,08 базавай (3,2 рубля) за заяву і 0,04 базавай (1,6 рубля) за камп’ютарныя паслугі.

Каб зняць з уліку транспартны сродак для ўтылізацыі, неабходна выканаць адну з наступных умоў:

• разам з заявай і пацвярджэннем аплаты здаць у рэгістрацыйнае падраздзяленне пасведчанне аб рэгістрацыі і/або рэгістрацыйныя знакі;
• дакументальна пацвердзіць факт здачы транспартнага сродку на ўтылізацыю;

Калі выканаць адну з вышэй апісаных умоў немагчыма, трэба дачакацца таго моманту, калі цягам года да падачы заявы ў рэгістрацыйным падраздзяленні будзе адсутнічаць інфармацыя, якая пацвярджае эксплуатацыю транспартнага сродку.

Іншымі словамі, зняць з уліку па спрошчанай працэдуры можна любы транспартны сродак, які цягам года не праходзіў тэхагляд, на ім не парушалі ПДР, на які не выпісвалі страхоўку.

Такі варыянт пасуе ў тым ліку ў тых выпадках, калі чалавек даўно «прадаў» машыну па даверанасці, а значыць, ні транспартнага сродку, ні дакументаў на яго юрыдычны ўласнік не мае.

Што рабіць, калі аўтамабіль зарэгістравалі ў іншай дзяржаве?

Некаторыя беларусы, якія жывуць у краінах Балтыі, праз уведзеныя гэтымі краінамі абмежаванні на рух аўто з беларускімі нумарамі былі вымушаныя зарэгістраваць беларускія машыны ў гэтых краінах.

Такія машыны аўтаматычна з уліку ў Беларусі не здымаюцца, значыць, за іх па-ранейшаму будуць налічваць транспартны падатак. 

Каб гэтага пазбегнуць, такі транспарт трэба зняць з уліку ў Беларусі. Зрабіць гэта можна без прадстаўлення аўто на агляд. 

Для гэтага вам спатрэбіцца звярнуцца ў рэгістрацыйнае падраздзяленне ДАІ і прадставіць беларускія рэгістрацыйныя знакі і тэхпашпарт новай краіны рэгістрацыі.

Яшчэ адзін варыянт — пачакаць год, каб у беларускага ДАІ не было ніякіх звестак пра ваш аўтамабіль. У такім выпадку можна будзе спісаць транспартны сродак ва ўтыль без прадстаўлення якіх-небудзь дакументаў.

Але тут варта памятаць, што транспартныя сродкі, знятыя з уліку для ўтылізацыі, нельга будзе зноў паставіць на ўлік у Беларусі.

• 0
• 0
• 0
• 0
• 0
• 0
• 0
• 0