Спорт11

«Ён ненаедны». У чым сакрэт маладога галкіпера, дзякуючы якому зборная Грузіі ўзяла сваё першае ачко на топ-турніры? 

Зборная Грузіі сёння згуляла на Еўра-2024 1:1 з Чэхіяй і тым самым здабыла першае ў гісторыі ачко для сябе на топ-турнірах. Ключавая заслуга ў гэтым — варатара зборнай. Георгій Мамардашвілі зрабіў за матч аж 11 сэйваў, што амаль рэкорд. Зборная ж Чэхіі сёння стала першай у гісторыі камандай, якая прабіла ў створ варот за матч 12 разоў і пры гэтым не выйграла. Sports.ru піша пра маладога грузінскага галкіпера, дзякуючы якому гэты цуд адбыўся.

Фота: AP Photo/Tamuna Kulumbegashvili

Што Георгій Мамардашвілі такі добры гулец, дакладна не сюрпрыз для тых, хто сочыць за яго гульнёй як мінімум у чэмпіянаце Іспаніі за «Валенсію». Да гэтай каманды ён далучыўся ў чэрвені 2021-га, у 20 гадоў.

Цяпер жа, праз тры гады пасля таго, ён самы надзейны кіпер Ла Лігі, за якім пільна сочаць «Баварыя», «Чэлсі» і «Атлетыка».

Георгій Мамардашвілі нарадзіўся ў верасні 2000 года ў Глдані, велізарным спальным раёне на паўночнай ускраіне Тбілісі. Ягоны бацька, Давід Мамардашвілі, у мінулым таксама пагуляў у варотах і нават выступаў за клуб «Гагра», але вышэй за гэты ўзровень не падымаўся. Тым не менш, менавіта ён прышчапіў Георгію любоў да футбольных варот і варатарскіх пальчатак.

Давід паказваў сыну відэа з Ікерам Касільясам і Джанлуіджы Буфонам, але найбольш таго ўразіў знакаміты нямецкі варатар Мануэль Ноер: Георгій з захапленнем сачыў за ягонай яркай манерай гульні і сэйвамі на чэмпіянаце свету ў Бразіліі ў 2014 годзе.

«Лічу, Ноер змяніў успрыманне варатароў, — кажа Мамардашвілі. — Гэта вялікі гулец, жывы прыклад. Узор для пераймання, на які варта раўняцца».

Мамардашвілі трапіў у акадэмію тбіліскага «Дынама» ў 12 гадоў, і неўзабаве яго там заўважылі. Праз два гады Георгія адправілі ў клуб «Мерані», дзе варатароў трэніраваў ягоны тата. Праца з бацькам у «Мерані» стала для фармавання таленавітага гульца ключавой: у гэтым клубе ён упершыню пачаў асобна трэніравацца браць пенальці, пракачваў рэакцыю.

Цяпер шмат хто называе Георгія «монстрам пенальці»: у гэтым сезоне за «Валенсію» ён узяў іх тры з шасці.

Фота: AP Photo/Ebrahim Noroozi

Праз год заняткаў з татам юнак вярнуўся ў тбіліскае «Дынама», але за дарослую каманду там не пагуляў зусім. Узімку 2019-га яго аддалі ў арэнду ў клуб «Руставі», праз год быў ужо тбіліскі «Лакаматыў», куды Георгія «сплавілі» на 2 гады.

Ён цяжка перажываў гэты перыяд і хацеў даказаць, што «Дынама» пралічылася. І гэта яму ўдалося: ужо ў 20 гадоў гульца «Лакаматыва» Георгія Мамардашвілі прызналі найлепшым варатаром чэмпіянату Грузіі. А калі ягоны клуб гуляў у кваліфікацыі Лігі Еўропы супраць іспанскай «Гранады», то на перспектыўнага грузінскага галкіпера звярнулі ўвагу скаўты «Валенсіі». 

«Мне сказалі, што ў «Лакаматыве» зайграў выдатны варатар. Я пачаў сачыць за ім, — успамінаў футбольны агент Антоніа Лопес. — Убачыўшы яго супраць «Гранады», я адважыўся. Я звязаўся з «Атлетыка», «Барселонай», «Жыронай», «Вільярэалам», «Бетысам». Усе казалі мне: «Грузін? Не смяшы мяне». Я рваў валасы на галаве, бачыў топавага варатара. Ён дзівосны».

У выніку на прапанову Лопеса адгукнуліся толькі два клубы: «Валенсія» і «Сасьедад». Першыя прыйшлі да «Дынама» і прапанавалі арэнду з правам магчымага выкупу.

Георгій прызнаецца: «На самай справе мне пашанцавала. Я апынуўся ў патрэбным месцы ў правільны час».

Спачатку Георгія ў «Валенсіі» разглядалі толькі як чацвёртага галкіпера і планавалі зайграць у рэзерве. Але ўжо пасля першай трэніроўкі трэнер «Валенсіі» Пепе Бардалас быў прыемна здзіўлены: «Ён выглядае мацнейшым, чым мы чакалі. Цяпер у нас ёсць варатары, але мы назіраем за Георгіем».

А пасля Мамардашвілі крыху пашанцавала. Перад стартам сезона-2021/22 траўмаваліся асноўныя варатары «Валенсіі» Яспер Сілесэн і Хаўме Даменек, а новага дасведчанага кіпера не знайшлі.

Прыйшлося паставіць Георгія: ён выйшаў на матч з «Хетафе» ў 20 гадоў і 318 дзён і адыграў на нуль, зрабіўшы пяць сэйваў і стаўшы варатаром тура.

У выніку Мамардашвілі замацаваўся ў аснове нават пасля вяртання пасля траўмы Яспера Сілесэна. У першым жа сезоне ён стаў асноўным варатаром «Валенсіі», а неўзабаве яго ўпершыню выклікалі ў зборную.

Ужо два гады Георгій — адзін з галоўных кіпераў Ла Лігі, а фанаты яго абажаюць. «Валенсія» выкупіла яго за 850 тысяч еўра, прапісаных у кантракце, і трэнер клуба Рубен Бараха называе гэта «здзелкай стагоддзя».

У чым перавагі Мамардашвілі? Ён топавы шот-стопер, адзін з галоўных у Іспаніі. У яго найлепшыя вынікі па прадухіленых чаканых галах: ён ратаваў каманду не проста часта, але і эфектыўна. «Валенсія» шмат чаго дазваляе супернікам рабіць каля сваёй брамы, касячыць у абароне, але варатар пастаянна падчышчае за партнёрамі.

Фота: AP Photo/Sunday Alamba

Георгій выдаў сезон нароўні з Унаі Сімонам з «Атлетыка», якога лічаць галоўным кіперам Ла Лігі. У топ-лігах лічбы мацнейшыя толькі ў італьянцаў Джанлуіджы Данарумы з французскага «Пары-сен-Жэрмена» і Мікеле Дзі Грэгорыа з італьянскай «Монцы».

Яшчэ плюсы Мамардашвілі: выдатная рэакцыя, нядрэнная пластыка пры росце ў два метры. Ён моцны на выхадах, яго цяжка адштурхнуць ад мяча. Па перапыненых перадачах Георгій — другі ў Ла Лізе пасля Конана Ледэсмы з «Кадыса».

«Калі Георгій бачыць мяч — ніхто ў штрафной яго не дастане, нават не спадзявайцеся», — такі камплімент Мамардашвілі зрабіў форвард Уга Дура.

Мамардашвілі дэталёва праглядае шмат відэа, ведае пра звычкі нападнікаў перад ударамі. І не толькі з 11 метраў. Кажа, так прасцей прачытваць рэальны ўдар, калі яго спрабуюць заблытаць.

Ёсць у Георгія, праўда, і недахоп: ён не вельмі моцны ў гульні нагамі. Ён варатар старой фармацыі, не падыходзіць пад прасоўванне мяча. Не тое што ён зусім дрэнны, але да топ-кіпераў у гэтым аспекце не дацягвае.

Але цяпер у зборнай і «Валенсіі» яго не просяць гуляць у пас, важнейшыя сэйвы. А ў гэтым плане Георгій — гатовы топ-брамнік, што трымае планку на дыстанцыі некалькіх сезонаў.

У чым ягоны сакрэт? Сам Мамардашвілі сцвярджае — у поўнай самааддачы:

«За першыя паўгода ў Валенсіі ён выходзіў з дому толькі на трэніроўкі, ніякіх вечарынак, — расказаў экс-галкіпер Хасэ Пералес, знаёмы па «Валенсіі». —

Гэта засяроджаны хлопец, які ведае, што робіць. Ён хоча трэніравацца, добра харчуецца. Георгій моцна сочыць за сабой. Гэта хлопец, які дамагаецца сваёй мары, але рухаецца наперад за новай. Ён ненаедны».

Каментары1

  • Багдан
    23.06.2024
    Які “варатар”? Брамнік!

Работніцы суда пагражае да 12 гадоў за «заклікі да санкцый і абразу Лукашэнкі»3

Работніцы суда пагражае да 12 гадоў за «заклікі да санкцый і абразу Лукашэнкі»

Усе навіны →
Усе навіны

Гэты карлікавы кот з сарамлівым выглядам стаў новай зоркай сацсетак5

У гатэлі Бангкока знойдзены мёртвымі шэсць грамадзян В'етнама1

Названы свежы медыянны заробак. І ён намнога меншы за сярэдні

Высветлілася, што пад Масквой патануў кіраўнік дэлегацыі вайскоўцаў КНДР

Рабочаму з Баранавічаў далі год за лайкі пад карыкатурамі на Лукашэнку. Цяпер пагражае яшчэ да 12 гадоў3

Замах на Дональда Трампа планаваў Іран — CNN12

Мінэнерга паведаміла пра аднаўленне электразабеспячэння Мазыра1

Мазырская вертыкальшчыца далажыла пра аднаўленне водазабеспячэння. У каментарах ёй пярэчаць

Ад сёння Літва мае намер увесці абмежаванні на ўезд аўто з беларускімі нумарамі31

больш чытаных навін
больш лайканых навін

Работніцы суда пагражае да 12 гадоў за «заклікі да санкцый і абразу Лукашэнкі»3

Работніцы суда пагражае да 12 гадоў за «заклікі да санкцый і абразу Лукашэнкі»

Галоўнае
Усе навіны →