«Яна не ў турме, а на спецдачы КДБ!» Канспіролагі накінуліся на Калеснікаву
Свежае фота Марыі Калеснікавай з усмешкай на твары выклікала шаленства ў апазіцыйных блогераў-канспіролагаў. Яны сышліся з ананімнымі пралукашэнкаўскімі тэлеграм-каналамі ў магчымасці паздзекавацца з палітзняволенай. Гэтыя ж наратывы распаўсюджваюць у сацсетках (пераважна ў фэйсбуку) акаўнты, пераважна падпісаныя выдуманымі імёнамі. Што яны хочуць даказаць?
Спачатку сцісла нагадаем перадгісторыю.
Марыя Калеснікава, кіраўніца штаба Віктара Бабарыкі, знаходзіцца ў зняволенні з 7 верасня 2020 года, калі парвала пашпарт пры спробе гвалтоўна вывезці яе з Беларусі ва Украіну. Ёй прысудзілі 11 гадоў зняволення. У другой палове 2022 года Калеснікаву перавялі з СІЗА ў гомельскую калонію.
28 лістапада 2022 года Марыя трапіла ў рэанімацыю гомельскай бальніцы. Пасля гэтага да яе на 10 хвілін пусцілі тату.
У лютым 2023 для Калеснікавай увялі рэжым поўнай ізаляцыі — сваякі не атрымліваюць лісты ад яе, не пускаюць і адваката. Паўтара года родныя маглі толькі здагадвацца, ці жывая Марыя.
12 лістапада 2024 года да Калеснікавай у другі раз пусцілі тату — разам з Раманам Пратасевічам.
Да якіх высноваў прыйшлі канспіролагі і чаму большасць іх ідэй — спроба маніпуляваць грамадскай думкай? Давайце разбірацца.
«Калеснікаву ніхто ніколі не бачыў у турме»
Гэта хлусня. У СІЗА на вуліцы Валадарскага яна сядзела ў адзіночнай камеры, каля якой быў абсталяваны дадатковы пост. Суседак у яе не было, але Марыю бачылі ў калідорах, калі яе вадзілі да следчага ці адваката.
У калоніі яна спачатку была ў атрадзе з іншымі зняволенымі і хадзіла з імі на працу. З цягам часу Калеснікаву сталі ўсё часцей адпраўляць у штрафны ізалятар. Пасля гэтага, па словах яе былых суседак, Марыю ізалявалі — перавялі ў памяшканне камернага тыпу. Усе далейшыя згадванні пра яе — сітуацыі, калі нехта з асуджаных здалёк убачыў Калеснікаву, напрыклад, у медчасці. Размаўляць пры гэтым з ёй забаронена.
Цяперашняе фота было зроблена ў памяшканні медчасці гомельскай калоніі, былыя палітзняволеныя пазналі антураж.
«Насамрэч Калеснікава знаходзіцца ў санаторыі ці на спецдачы КДБ, а не ў турме»
Ніводнага канкрэтнага сведчання ад нейкага чалавека аб тым, што за апошнія паўтара года Марыю кудысьці вывозілі і ўтрымлівалі ў іншым месцы, няма.
Аналагічныя плёткі распаўсюджваюцца і пра іншых палітычных лідараў, у дачыненні якіх уведзены рэжым інкамунікада.
«У Калеснікавай касметыка і модная прычоска»
Зняволеныя ў ШІЗА і ПКТ не маюць магчымасць нафарбавацца касметыкай. Стрыжка для іх таксама недасяжная.
Ці з’яўляецца праблемай дазволіць Калеснікавай зрабіць макіяж і пастрыгчыся перад прыходам гасцей? Ніякай. Відавочна, што прапаганда спрабуе стварыць больш прэзентабельную карцінку. Напрыклад, пры здымках у мужчынскіх калоніях у Шклове і Бабруйску зняволеных запісвалі ў памяшканнях з самым свежым рамонтам.
«У Калеснікавай на руцэ смарт-гадзіннік»
Зняволеныя ў атрадах і ў памяшканні камернага тыпу маюць магчымасць насіць наручны гадзіннік. На час знаходжання ў штрафным ізалятары яго адбіраюць.
У Марыі не смарт-гадзіннік, а звычайны электронны.
«Ці ўсе палітвязні двойчы сустракаюцца са сваім бацькам?»
Не ўсе. У розных калоніях сістэма спатканняў палітвязняў з роднымі працуе па-рознаму. Недзе атрымаць дазвол на доўгатэрміновае спатканне (хаця б на адзін дзень!) увогуле немагчыма. Недзе даюць спатканне на дзень — у тым ліку і статусным, медыйным палітвязням, — але адмаўляюць у спатканні на два-тры дні, як у прынцыпе прадугледжваецца законам. Ёсць шчасліўчыкі, якія хадзілі і на тры дні.
Кароткатэрміновыя спатканні — некалькі гадзін размовы па тэлефоне праз шкло — даюць яшчэ прасцей.
Аднак сем’і палітвязняў у цяперашніх рэаліях імкнуцца не публічыць ніякія свае прыватныя абставіны — каб не зрабіць горш.
Відавочна, што да палітыкаў кшталту Калеснікавай падыход персанальны, а не па агульнай працэдуры. Першае яе спатканне з татам — дзесяціхвілінная размова ў бальніцы пасля аперацыі — увогуле не апісваецца як з’ява ў заканадаўстве. Выглядае, што і цяперашняя сустрэча не адпавядае ніякім нормам. Гэта рашэнне зверху, выкліканае пытаннем карэспандэнта BBC і рэакцыяй Аляксандра Лукашэнкі на яго.
«Калеснікава на фота не важыць 45 кілаграмаў»
Так, не важыць, і гэта добра.
Інфармацыя пра вагу Марыі ад пачатку выклікала сумневы — як згадвалася вышэй, ніхто з вязняў не можа камунікаваць з ёй, а значыць, не можа і спытаць і пра стан здароўя. Максімум — ацаніць знешні выгляд на вока, што не дае ніякай гарантыі дакладнасці
«А чаму яна ўсміхаецца?»
Застаецца толькі парадавацца за моцнага чалавека, які знаходзіць сілы на ўсмешку нават у такіх абставінах.
Каментары
Так я-то на диете постоянно и на таблетках и врачах, а ей и передачи запрещены, и инкомуникадо и никакого мед.обслуживания.