У Стакгольме ставяць п’есу па кнізе Дзмітрыя Плакса пра яго сына. Хлопца забілі сякерай на марскім узбярэжжы Швецыі
Якаб Хірдваль, драматург і загадчык літаратурнай часткі Каралеўскага драматычнага тэатра ў Стакгольме, перастварае ў п’есу кнігу «Пётр» Дзмітрыя Плакса пра свайго сына, жорстка забітага аднагодкам ва ўзросце 16 гадоў.
Прэм’ера адбудзецца 30 жніўня ў тэатры «Арыён», піша zbsb.info са спасылкай на dn.se.
Пяць гадоў таму на шаснаццацігадовага Пятра Плакса здзейсніў нематываваны напад ягоны сябра-аднагодак, які пакутаваў на псіхічны разлад.
Дзмітрый Плакс дагэтуль цяжка перажывае смерць сына. Цяжкі маральны стан бацькі ледзьве не стаў перашкодай на шляху ўвасаблення кнігі «Пётр» у п’есу «Пётр: час», бо вядомы драматург і пастаноўшчык Якаб Хірдваль, якому Дзмітрый Плакс прапанаваў свой тэкст, асцерагаўся паглыбіць псіхічную траўму апошняга.
Тэатральная адаптацыя будзе ўяўляць з сябе гісторыю пра бацьку, які сумуе па сваім дзіцяці і намагаецца захаваць яго жыццё, узгадваючы пра яго ўсё, што толькі магчыма. «А гэта азначае, — кажа Якаб Хірдваль, — што п’еса парадаксальным чынам будзе ўтрымліваць шмат святла, цеплыні і гумару».
«Я таму і звярнуўся да Якаба, бо ведаў, што ен усё правільна зразумее», — каментуе такую інтэрпрэтацыю Дзмітрый Плакс. Акрамя таго, што аўтары разам выбіралі актора Андрэаса Лільехольма, які будзе граць Дзмітрыя ў п’есе, больш ніякага ўдзелу ў пастаноўцы спадар Плакс не бярэ, цалкам давяраючыся рэжысёру.
***
Пятра Плакса забілі 2 жніўня 2019 года на марскім узбярэжжы Швецыі.
Падлетак забіў Пятра сякерай на пляжы ў камуне Салентуна на поўнач ад Стакгольма. Пасля гэтага ён сам патэлефанаваў у паліцыю і прызнаўся ў злачынстве. З цяжкімі пашкоджаннямі галавы пацярпелы верталётам хуткай дапамогі быў дастаўлены ў лякарню, аднак уратаваць яго не ўдалося.
«Ён спачатку марыў стаць піяністам-канцэртмайстрам, але потым сказаў, што будзе рабіць кар’еру эвалюцыйнага псіхолага. Пры гэтым ніколі не пакідаў фартэпіяна, працягваў іграць і браць урокі. — Пятро быў суперталенавіты: чытаў навуковыя кнігі, яму ўсё было цікава… Найлепшы хлопец на свеце — заўсёды шчаслівы і з добрым настроем», — расказаў шведскім СМІ Дзмітры Плакс.
Незадоўга да трагедыі Пётр з мамай Вольгай 10 дзён правялі ў Мінску. Малады чалавек сустракаўся з сябрамі і сваякамі, дзяліўся амбітнымі планамі.
Алексіевіч нарэшце выказалася пра Ізраіль і Палесціну31
Каментары