Падазраваны па справе «Крокуса», які збег ад ФСБ — сын адстаўнога падпалкоўніка стратэгічных ядзерных сіл Расіі
Адстаўны палкоўнік распавёў, як паводзіў сябе сын пасля тэракту ў «Крокусе».
Канал ВЧК-ОГПУ знайшоў бацьку аднаго з падазраваных па справе тэракту ў канцэртнай зале «Крокус». Ім аказаўся падпалкоўнік у адстаўцы Сяргей Сурноў, які 20 гадоў праслужыў у ракетных войсках стратэгічнага прызначэння Расійскай Федэрацыі, якія граюць асноўную ролю ў расійскіх ядзерных стратэгічных сілах.
Былы падпалкоўнік падчас тэлефоннай размовы з каналам заявіў, што яго сын Мікалай Сурноў, які здолеў збегчы ад ФСБ і схавацца ў лесе, «не мае ніякіх палітычных поглядаў».
«Ды якія ў яго палітычныя погляды, ён усё жыццё машыны рамантаваў і адукацыі сапраўднай не атрымаў. Вайсковую службу таксама не праходзіў.
Апошні раз бачыў яго, напэўна, тыдні два таму (калі лічыць ад дня публікацыі запісу размовы, то апошняя сустрэча Сяргея і Мікалая Сурновых адбылася праз некалькі дзён пасля тэракту. — «НН»), той мімаходзь заскочыў у госці на хвілін 15. Пытаўся, куды ён спяшаецца, ён адказаў, што ў яго ёсць справы і яму трэба бегчы», — расказаў адстаўны падпалкоўнік Сяргей Сурноў.
Былы вайсковец дадаў, што яго сын прыехаў і затым з'ехаў ад яго на белай машыне (па інфармацыі расійскіх сілавікоў, падазраваны Мікалай Сурноў уцякаў ад ФСБ менавіта на белай машыне).
Сам Сурноў-малодшы па апошніх звестках усё яшчэ на волі і можа мець пры сябе зброю. Мужчыну, якога падазраюць у датычнасці да тэракту ў «Крокус Сіці Холе», пераследавалі дзве машыны ФСБ, але той падчас пагоні рэзка здаў назад і выскачыў са сваёй машыны, а затым схаваўся ў лесе. Жыхары раёна, дзе адбылася пагоня, чулі перастрэлку.
У той жа час пракрамлёўскі партал «Маскоўскі камсамолец» сцвярджае, што падазраванаму Мікалаю Сурнову 47 гадоў і ён увесь час жыве з сям'ёй у Літве, перыядычна вяртаючыся ў Расію.
Па даносе чат-рулетчыка з Расіі яшчэ двух беларусаў затрымалі за каментары пра «Крокус». Аднаго з іх моцна збілі
У маскоўскім аддзеле паліцыі памёр ураджэнец Чачні, якога затрымалі пасля тэракта ў «Крокусе»
У тэракце ў «Крокусе» загінуў палкоўнік спецназу ГРУ расійскай арміі — толькі прыехаў з Украіны
«Усе экстрэмісты ці ўжо асуджаныя, ці з'яўляюцца фігурантамі спраў, якія будуць разгледжаны судамі». Швед падводзіць рысу пад рэпрэсіямі?9
Каментары