З'явіўся новы топ-100 паспяховых бізнэсменаў Беларусі. У ім змена лідара

Хто лідар

Выпускнік Мінскага вышэйшага ваенна-палітычнага агульнавайсковага вучылішча Аляксандр Луцэнка і яго жонка Наталля заснавалі свой бізнэс па гандлі кармамі ў 1994 годзе ў Беларусі. Да канца 1990-х кампанія «Садружнасць» у сваёй галіне стала найбуйнейшай у рэгіёне.

Але бізнэсмен не спыніўся на гэтым і інвеставаў прыбытак у вытворчасць, стварыўшы базу ў Калінінградскай вобласці. Група кампаній «Садружнасць» адной з першых у былым СССР разгледзела патэнцыял соі, засяродзіўшы галоўную ўвагу на яе перапрацоўцы і атрыманні кармавых прадуктаў. З пачатку 2000-х Аляксандр Луцэнка скупляў актывы ў Еўропе і Лацінскай Амерыцы, маштабаваўшы свой бізнэс да міжнароднага ўзроўню.

У канцы 2010-х ён вярнуўся на рынак Беларусі, пабудаваўшы буйны перапрацоўчы комплекс у Смаргоні і інвеставаўшы некалькі мільёнаў долараў ва ўласны парк вагонаў на мясцовай чыгунцы. У канцы 2023 года з'явілася інфармацыя, што «Садружнасць» разглядае магчымасць пераносу ў Беларусь часткі магутнасцяў з Калінінградскай вобласці.

Бізнэс Аляксандра Луцэнкі ні ў Расіі, ні ў Беларусі практычна не закранулі міжнародныя санкцыі. Ён запусціў завод у Курскай вобласці і працягвае рэалізоўваць шэраг іншых праектаў у Расіі, уключаючы будаўніцтва збожжавага тэрмінала ва Усць-Лузе.

Хто яшчэ

З тых бізнэсменаў, якія найбольш прыкметна прыраслі ў рэйтынгу, вылучыліся браты Уладзімір і Максім Стаецкія.

Таксама істотна палепшылі свае пазіцыі ў рэйтынгу дыстрыбʼютар БелАЗаў Віктар Кулуеў, фармацэўт Іван Лагавы і саўладальніца Mark Formelle Святлана Сіпарава. Апошняя, як і Аляксандр Луцэнка, прадстаўляе сямейны бізнэс — у яе паказчыках улічана доля мужа Андрэя Серыкава.

Яркія навічкі — гэта, перш за ўсё, уладальнікі найбуйнейшага дыстрыб'ютара аўтазапчастак на постсавецкай прасторы Armtek браты Вадзім і Алег Грынкевічы, заснавальнікі аднаго з найбуйнейшых сусветных распрацоўшчыкаў софту для iGaming Іван Монцік і Дзмітрый Яйкаў, якія ўвайшлі ў топ-100 дзякуючы здзелцы з Publicis беларускія «ірландцы» Канстанцін Чарныш і Дзмітрый Высоцкі і акумулятаршчыкі Віктар Лемяшэўскі і Аляксандр Папок, якія вярнуліся ў рэйтынг. 

З тых, хто страціў у капітале, але застаўся ў топе-100, адзначым занятага шлюбаразводным працэсам Сяргея Гвардзейцава і страціўшых значныя сумы з-за абвалу каштоўных папер акцыянераў шведскай Embracer Group Мацвея Цімашэнка,Алега Грушэвіча і Пятра Скромнага.

Якія трэнды

Зʼяўленне на першым месцы топа-100 бізнэсмена з беларускім пашпартам, які, аднак, пражывае ў Расіі, адлюстроўвае некалькі тэндэнцый у развіцці беларускага бізнэсу ў апошнія два-тры гады.

Першая з іх — гэта цяперашняе расслаенне гэтай сацыяльнай групы: на тую, якая з-за заходніх санкцый або ўласных інтарэсаў усё больш завязваецца на рынак Беларусі і Расіі, і на тую, якая адбудавалася або адбудоўваецца ад яго. 

Другая тэндэнцыя — рост у колькасці бізнэсменаў, інтэграваных у расійскі рынак. Фактычна — гэта ўсе яго ўдзельнікі з асабістымі лакацыямі ў Беларусі і Расіі.

Павелічэнне гэтай долі — гэта, па-першае, следства росту эканомікі Расіі і займанне ніш, якія вызваліліся з-за сыходу заходніх бізнэсаў. У пераважнай большасці беларускіх бізнэсаў (па выніках асабліва 2022 года) адбыўся істотны рост як па выручцы, так і па прыбытку. У 80% з іх гэтыя паказчыкі ў доларавым эквіваленце павялічыліся больш як у 2 разы. 

Па-другое, адбіваюцца санкцыі, якія для многіх бізнэсаў, прынамсі афіцыйна, закрылі доступ на рынкі «недружалюбных краін». І ў якасці альтэрнатывы яны пераносяць аперацыі ў Расію і іншыя альтэрнатыўныя рэгіёны. 

Асобная ад «расійскага пытання» тэндэнцыя — гэта нязначная колькасць новых маладых бізнэсменаў у рэйтынгу. Фактычна ў яго версіі за 2023 іх толькі чатыры — уладальнікі холдынгу SoftSwiss і заснавальнікі ірландскага стартапа Profitero.

Якія змены

Хаця ў топе-100 зʼявілася некалькі новых імёнаў са свету IT, прадстаўніцтва гэтай галіны ў параўнанні з папярэдняй версіяй рэйтынгу захавалася практычна на ранейшым узроўні. 

Менш стала дывелапераў і рэтэйлераў — бягучая сітуацыя ў гэтых сферах не самая спрыяльная для беларускага бізнэсу.

Не ўвайшлі ў рэйтынг з-за спадчынных пытанняў новыя ўладальнікі такіх буйных бізнэсаў як «Юкола-Нафта» і Yukon Optics Advanced Worlwide.

У параўнанні з папярэдняй версіяй топа-100 паспяховых бізнэсменаў 2023 абнавіўся прыкладна на 35%.

• 2
• 0
• 4
• 2
• 0
• 3
• 8
• 0