«Здраднікі Радзімы панясуць непазбежную кару». Як выглядаюць галоўныя старонкі беларускіх дзяржаўных медыя на фоне мяцяжу ў Расіі
Прагледзелі, як беларускія дзяржаўныя медыя рэагуюць на супрацьстаянне паміж ПВК «Вагнер» і расійскім Мінабароны. У некаторых выступленне Лукашэнкі на ўчарашнім выпускным падаецца як куды больш значная падзея.
БелТА
Гэты рэсурс публікуе інфармацыю аб падзеях, але прадказальна прытрымліваецца даных з праўладных расійскіх крыніц. Яны цытуюць прамову Уладзіміра Пуціна, прысвечаную гэтаму крызісу, адзначаюць, што супраць Яўгена Прыгожына была заведзена крымінальная справа «ў сувязі з заклікам да ўзброенага мяцяжу». БелТА адзначае, што паводле Прыгожына Мінабароны РФ ударыла па тылавых лагерах ПВК, але дзяржаўны рэсурс абвяргае гэтае сцвярджэнне са спасылкай на Маскву.
Таксама БелТА згадвае заклікі расійскага Мінабароны да вагнераўцаў «праявіць разважлівасць і выйсці на сувязь з прадстаўнікамі ведамства ці праваахоўных органаў». Яны спасылаюцца і на непацверджаную інфармацыю пра тое, што Мінабароны РФ нібыта ўжо «дапамагло» некаторым вагнераўцам «бяспечна вярнуцца ў пункты пастаяннай дыслакацыі».
Нарэшце БелТА цытуе аднаго з кіраўнікоў расійскай арміі на ўкраінскім фронце Сяргея Суравікіна: «Мы прайшлі цяжкі шлях, заклікаю спыніцца, падпарадкавацца волі прэзідэнта, вырашыць усе праблемы мірным шляхам».
«СБ. Беларусь сегодня»
Адно з галоўных прапагандысцкіх выданняў перадрукоўвае дайджэст апошніх падзей у Расіі, падрыхтаваны БелТА. Акрамя таго, рэсурс цытуе прамову Пуціна і выносіць у загаловак фразу: «Мы не дадзім паўтарыцца грамадзянскай вайне».
«СБ. Беларусь сегодня» адзначае, што ў шматлікіх рэгіёнах Расіі ўведзены рэжым контртэрарыстычнай аперацыі, згадвае заведзеную на Прыгожына крыміналку і абвяргае са спасылкай на расійскае Мінабароны сцвярджэнне, што яно атакавала тылавыя лагеры вагнераўцаў.
АНТ
Сайт аднаго з галоўных дзяржаўных каналаў імкнецца трымаць чытачоў у курсе расійскіх падзей — праўда, зноў са спасылкамі выключна на праўладныя крыніцы з РФ. АНТ неаднаразова цытуе прамову Пуціна: маўляў, «арганізатары мяцяжу здрадзілі славе байцоў «Вагнера», а таксама словы пра тое, «здраднікі Радзімы панясуць непазбежную кару». Адзначаюць яны і тое, што «Узброеныя сілы Расіі атрымалі неабходны загад на нейтралізацыю арганізатараў мяцяжу».
Асобна беларускае медыя адзначае заклік спікеркі расійскага МЗС Марыі Захаравай аб'яднацца: «Вы браты. Вы абараняеце не інтарэсы асобных людзей, а ўсіх нас. Вы абараняеце вашу агромністую сям'ю».
Але галоўная навіна на сайце АНТ — выступленне Лукашэнкі на ўчарашнім выпускным.
«Мінская праўда»
Рэсурс «Мінская праўда» піша пра падзеі ў Расіі даволі стрымана. Медыя адзначае, што ў Маскве, Маскоўскай і Варонежскай абласцях абвешчаны рэжым контртэрарыстычнай аперацыі, а таксама цытуе прамову Пуціна. Рэсурс падкрэслівае, што Пуцін называе прыгожынскі мяцеж «ударам у спіну нашай краіне і нашаму народу».
«Мінск-Навіны»
Дзяржаўны сайт навін, які збольшага піша інфармацыю пра Мінск, прысвяціў мяцяжу ў Расіі толькі адзін матэрыял у раздзеле сусветных навін. І гэта, як і ў выпадку з мінулымі рэсурсамі, згадка прамовы Уладзіміра Пуціна з абяцаннем у загалоўку не даць паўтарыцца грамадзянскай вайне.
«Наша Нiва» — бастыён беларушчыны
ПАДТРЫМАЦЬ«Захоўвайце спакой!» Пасольства Беларусі ў Расіі паведаміла тэлефоны для экстраннай сувязі
Самалёт, якім карыстаецца сям'я Лукашэнкі, прызямліўся ў Турцыі — Motolko.help
Каментары