Наста Дашкевіч (Палажанка): У 2011 я падпісала паперку ў КДБ, але агентам мяне ніхто не спрабаваў зрабіць
Маладафронтавец Мікалай Дземідзенка агучыў інфармацыю, што ў лютым 2011 года падпісаў дакумент аб супрацоўніцтве са спецслужбамі. Па ягоных словах, у той самы момант у суседнім пакоі падобную паперку падпісвала зняволеная па справе Плошчы-2010 Наста Палажанка (цяпер — Дашкевіч).
«Наша Ніва» паразмаўляла аб той гісторыі з Настай.
«У прынцыпе, Мікола кажа праўду. Наўрад ці ягоны подпіс аб супрацоўніцтве неяк паўплываў на маё вызваленне. Гэта ўсё было вырашана раней, але спецслужбісты ўдала маніпулявалі на гэтым. Праўда і тое, што Мікола адразу ўсім расказаў усё.
Што тычыцца мяне, то 17 лютага ў мяне быў складаны дзень — допыты. Потым мне паведамілі, што сёння ты выходзіш на волю. Перад вызваленнем павялі на яшчэ адзін допыт, дзе прапанавалі падпісаць паперку. Сказалі, што Зміцер Дашкевіч у зняволенні, каб аблегчыць яго лёс.
Вось папера, садзіся пішы, далі чысты аркуш. Я нават не помню, што там было. Здаецца, нейкая абсалютна дзяжурная фраза аб сустрэчах.
На сувязь са мной за ўвесь гэты час так ніхто і не выходзіў. Я мела некалькі размоваў з КДБшнікамі ў час следчых дзеянняў па маёй крымінальнай справе. Гаварылі на палітычныя тэмы. Нічога такога, што б я не магла сказаць у любым інтэрв’ю, я не казала. Я тады займала жорсткую пазіцыю па санкцыях, яны мяне спрабавалі пераканаць у адваротным.
Калі Змітра Дашкевіча асудзілі на 2 гады зняволення, то ніякіх сувязяў не было зусім. Ніхто мяне не шантажаваў, не казаў спыніць дзейнасць. Я лічу, што агучваць трэба, калі ты знаходзішся на кручку, каб яго абарваць. Але нічога падобнага ў мяне не было. З мяне не спрабавалі зрабіць «агента ўплыву» ці як гэта называецца.
Пасля падпісання таго дакумента ў маім жыцці абсалютна нічога не змянілася, ён ніяк не паўплываў на мае далейшыя дзеянні».
На зіму запланаваныя масавыя затрыманні, складзеныя «першы і другі спісы»8
Каментары