«Pakul araby režuć hałovy jaŭrejam, dobryja ruskija staviacca da chachłoŭ zanadta humanna». Novy naratyŭ prapahandy
Rasijskija prapahandysty krytykujuć abodva baki. I zaadno abialajuć siabie. Pakazvajem, jak Z-rasijanie zdoleli sumiaścić niesumiaščalnaje.
Prajšoŭ amal tydzień z momantu ŭvarvańnia paleścinskaha ruchu CHAMAS u Izrail. U adkaz na heta izrailskija ŭłady abviaścili CHAMAS vajnu i pačali pravodzić biesprecedentnyja pa intensiŭnaści bambiožki siektara Haza.
Hetyja padziei pryciahnuli ŭvahu ŭsiaho śvietu i mnohija krainy ŭžo paśpieli abjavić ab padtrymcy taho ci inšaha bakoŭ kanfliktu. Zachad i biełaruskija demakratyčnyja siły adkryta padtrymali Izrail, a Iran i niekatoryja arabskija dziaržavy padtrymali CHAMAS.
Namieśnik staršyni rady biaśpieki Rasii Dźmitryj Miadźviedzieŭ u pieršy ž dzień napadu CHAMAS abvinavaciŭ va ŭsim ZŠA, bo «hetyja paŭdurki zamiest urehulavańnia paleścinska-izrailskaha kanfliktu adrazu paleźli k nam i dapamahajuć nieanacystam».
Potym u svajoj zvykłaj maniery Miadźviedzieŭ pažadaŭ amierykancam hramadzianskaj vajny.
Pry hetym rasijskaja prapahanda (razam ź biełaruskaj) smakavała pośpiechi CHAMAS i kpiła sa «słabych habrejaŭ». Bajevikoŭ CHAMAS spačatku chvalili i navat imi zachaplalisia, ale paśla stali nazyvać «žyviołami» i ździŭlalisia ich žorstkaści.
Na vyrazna antyizrailski charaktar hetaj prapahandy źviarnuli ŭvahu izrailskija ŚMI.
Apošnija dni sfarmiravaŭsia i novy prapahandyscki naratyŭ, byccam pavodziny Rasii va Ukrainie ništo ŭ paraŭnańni ź dziejańniami CHAMAS i Izraila i tamu nie varta nikomu skardzicca na mietady viadzieńnia vajny suprać ukraincaŭ.
«Rasija viadzie samy akuratny kanflikt za ŭsiu historyju čałaviectva»
U vajnie ŭ Izraili prapahanda ŭbačyła mahčymaść vyhladać lepš na fonie źvierstvaŭ CHAMAS i akcyj adpłaty z boku CACHAŁ.
U adzinym paryvie Z-prapahandysty stali śćviardžać, što, u adroźnieńnie ad CHAMAS i CACHAŁ, rasijskaja armija va Ukrainie nie rujnuje haradoŭ, nie rasstrelvaje i nie katuje cyvilnych, nie abiezhałoŭlivaje i nie karaje śmierciu pałonnych vajskoŭcaŭ, nie navodzić rakiet na hramadzianskija abjekty, nie kradzie i nie zabivaje čužych dziaciej i hetak dalej.
Hałoŭnaj pryčynaj tamu nazyvajecca «dabrynia, akuratnaść, vysakarodnaść, honar, intelihientnaść i humannaść ruskich ludziej».
«Rasija viadzie samy akuratny kanflikt za ŭsiu historyju čałaviectva. Ruskija sałdaty na fonie astatnich — heta realna voiny śviatła, vysakarodnaści i honaru», — napisaŭ u siabie ŭ akaŭncie zasnavalnik rasijskaha radykalnaha ruchu «Mužčynskaja dziaržava» Uładzisłaŭ Paźniakoŭ, kamientujučy vajnu ŭ Izraili.
«Pakul araby režuć hałovy habrejam, a tyja ścirajuć u pył Hazu, dobryja rasiejcy staviacca da chachłoŭ zanadta intelihientna i humanna. Im vielmi pašancavała, inakš ich cieły biez hałoŭ daŭno b lažali pasiarod ruin taho, što niekali nazyvałasia Ukrainaj», — piša nienazvany były vahnieraviec z kanała Alex Parker Returns.
«Heta biaskoncaje zamknionaje koła hvałtu. Dziakuj bohu, my tak nie ŭmiejem. Ja sotniu razoŭ bačyŭ u štabach i hrupach śpiecnaza, jak našyja ataki admianialisia, tolki kab cyvilnyja pad udar nie trapili», — razvažaje Z-vajenkar Jaŭhien Paddubny.
U toj ža čas kiraŭnica prapahandysckaha ahienctva Russia Today Marharyta Simańjan aburyłasia zajavami ministra abarony Izraila, jaki nazvaŭ radykalnych paleścincaŭ «čałaviečymi žyviołami». Na jaje dumku, heta žorstka i duraść.
Ale inšaja reč, kali havorka zachodzić ab ukraincach, jakich u svaim kanale jašče hod tamu Simańjan nazvała «nieludziami, vyrusiami i ludajedami».
«Naša Niva» — bastyjon biełaruščyny
PADTRYMAĆBiełaruskaja prapahanda ŭkinuła ideju, što izrailcianaŭ chočuć pierasialić va Ukrainu
«Siabroŭka z saboju ŭziała siakieru. Va ŭsim budziem raźbiracca, kali Izrail pieramoža». Biełarusy ŭ Izraili pra vajnu vačyma miascovych
«Ciažka pavieryć, što navat CHAMAS moh ździejśnić taki varvarski akt». CACHAŁ paćvierdziŭ, što bajeviki zabivali i abiezhałoŭlivali dziaciej
Zakachanyja ŭ Minsku chacieli sabrać z padpisčykaŭ $10 tysiač na viasielle mary. Kolki ž u vyniku im zadanacili?18
Kamientary