Napad CHAMAS nazyvajuć najbujniejšym za 50 hadoŭ pravałam izrailskaj raźviedki. Jak takoje stała mahčymym i što budzie ciapier
Subotni napad bajevikoŭ CHAMAS na Izrail vidavočna zaśpieŭ ułady krainy źnianacku: ničoha padobnaha ŭ krainie nie adbyvałasia ŭžo mnohija dziesiacihodździ. Čamu paleścinskaj hrupoŭcy ŭdałosia dasiahnuć raptoŭnaści i jakimi mohuć być nastupstvy zdareńnia? Pra heta razvažajuć karespandenty Bi-bi-si i izrailski vajenny ekśpiert David Hiendelman.
David Hiendelman: «Armija rassłabiłasia»
— Acenka izrailskaj raźviedki była ŭ tym, što CHAMAS zaraz eskałacyja nievyhodnaja, paśla treńniaŭ u apošnija tydni žycharam Hazy dali bolš dazvołaŭ na pracu ŭ Izraili, u Hazu zajšoŭ čarhovy tranš katarskich hrošaj i hetak dalej. Značyć, [mierkavałasia, što] ich biahučyja patrabavańni zadavoleny, vajavać jany zaraz nie buduć, a vučeńni — heta prosta siezonnyja vučeńni, jak užo byvała.
I niepasrednaj padrychtoŭki da apieracyi raźviedka taksama nie vyjaviła.
Tamu vojska rassłabiłasia, bojehatoŭnaści na miažy nie było, CHAMAS dasiahnuŭ poŭnaj raptoŭnaści ŭ napadzie i, adpaviedna, damohsia niečakanych navat dla siabie pośpiechaŭ.
Heta čarhovy raz demanstruje, što acenka namieraŭ nie pavinna całkam zamianiać acenku mahčymaściaŭ, i što padhaniańnie mierkavanych dziejańniaŭ supiernika pad kancepcyju, što jamu, na našu dumku, vyhadna i niavyhadna, pryvodzić da katastrafičnych nastupstvaŭ.
«Horšy pravał raźviedsłužbaŭ z 1973 hoda»
A voś jak aceńvaje situacyju dypłamatyčny ahladalnik Bi-bi-si Poł Adams:
— Ciažka apisać, da jakoj stupieni biesprecedentnyja padziei, jakija adbyvajucca. Havorka idzie nie tolki pra, vierahodna, najhoršy pravał raźviedvalnych słužbaŭ z času vajny Sudnaha dnia 1973 hoda (čas dla hetaha napadu moh być vybrany śpiecyjalna, vajna adbyłasia amal roŭna 50 hadoŭ tamu). Hałoŭnaje, što Izrail, zdajecca, jašče nikoli nie stračvaŭ kantrol nad svaimi haradami.
My bačyli, jak u Sderocie i inšych miescach na miažy ź siektaram Haza ŭzbrojenyja paleścincy spakojna pieramiaščalisia, zabivajučy i vykradajučy miascovych žycharoŭ, i heta nadoŭha šakavała ŭvieś Izrail.
Heta, ułasna, i jość metaj napadnikaŭ. Za apošnija hady CHAMAS sprabavaŭ roznaje — rakiety, śmiarotnikaŭ z bombami, padkopy na izrailskuju terytoryju i navat zapusk pavietranych źmiejaŭ vadkaściu, jakaja samazapalvajecca.
Ale ničoha, paraŭnalnaha pa dziorzkaści, paleścinskija radykały da hetaha času nie rabili.
I, pa ich mierkach, subotni napad — nadzvyčaj staranna skaardynavany i, tak, žorstki akt hibrydnaj vajny — zapusk sotniaŭ rakiet, za jakim adbyłosia ŭvarvańnie na niekalkich punktach zvyčajna niazłomnaha płota na miažy.
Hramadzianskaje nasielnictva zaraz rychtujecca da niepaźbiežnaha adkazu Izraila. Udary z pavietra pa Hazie — tolki pačatak. Žychary terytoryi viedajuć, što budzie, jany bačyli ŭsio heta ŭžo šmat razoŭ.
Ale zaraz u Izraili zahavaryli ab poŭnym źniščeńni CHAMAS, i ŭsie razumiejuć, što nastupnyja dni i tydni buduć vielmi ciažkimi.
«U Hazu mohuć być uviedzienyja vojski Izraila»
Mižnarodny redaktar Bi-bi-si Džeremi Boŭen:
— Toje, što adbyvajecca z ranicy suboty, nie maje precedentaŭ za ŭsie 15 hadoŭ, što CHAMAS kiruje siektaram Haza. Napad adbyŭsia paśla taho, jak na praciahu niekalkich miesiacaŭ napružanaść i ŭzrovień hvałtu pamiž izrailcianami i paleścincami narastali.
Praŭda, heta ŭ asnoŭnym tyčyłasia Zachodniaha bieraha, terytoryi, akupavanaj Izrailem u 1967 hodzie, jakaja znachodzicca pamiž Ijerusalimam i miažoj ź Iardanijaj.
Jość vialikaja vierahodnaść taho, što ŭ siektar Haza ŭ tym liku buduć uviedzieny izrailskija vojski. Situacyja raźvivajecca chutka, i napružanaść budzie ŭzrastać.
Pytańnie nie tolki ŭ tym, što budzie adbyvacca vakoł siektara Haza, ale i ŭ tym, što zdarycca ŭ Ijerusalimie i na Zachodnim bierazie, dzie ŭsio čaściej adbyvalisia sutyčki pamiž uzbrojenymi paleścinskimi hrupoŭkami, izrailskimi sałdatami i izrailskimi pasialencami. Situacyja tam, i biez taho napružanaja, moža stać jašče horšaj z-za napadu.
I dla izrailcian, i dla paleścincaŭ u cełym padziei minułaj ranicy vielmi niečakanyja i vielmi tryvožnyja.
Čytajcie taksama:
U Viciebsku zatrymali minskaha błohiera-prykalista Bulbanews, u jakoha 600 tysiač padpisčykaŭ u instahramie2
Kamientary