U svajakoŭ nie biaruć pieradač dla palitźniavolenaj Paliny Šarendy-Panasiuk, jakaja paśla haładavańnia maje patrebu ŭ admysłovym charčavańni. Pra heta «Svabodzie» paviedamiŭ muž aktyvistki Andrej Šarenda.
«Z rečyckaha izalatara, dzie Palina trymała haładoŭku pratestu suprać novaha kryminalnaha pieraśledu, jaje pieraviali ŭ homielski SIZA. Haładoŭku jana spyniła, ale prablema taja, što joj ciapier patrebna admysłovaje charčavańnie, jakoje zabiaśpiečyć my nie možam, bo pieradač nie prymajuć. Kažuć, što nibyta limit vyčarpany. Heta niapraŭda, bo pieradač u rečyckim IČU nie było, a ciapier u homielskim SIZA pieradačy musiać prymać kožny dzień, ale nie prymajuć», — raskazaŭ Andrej Šarenda.
Pavodle Andreja, druhoj prablemaj sa zdaroŭjem žonki stała toje, što paśla znachodžańnia ŭ IČU ŭ jaje mocna balić śpina.
«U Rečycy Palinu trymali ŭ brudnaj kamiery biez matraca i paścielnych rečaŭ. Jana musiła lažać na «škoncy» na mietaličnych płaścinach. Navat na padłohu niemahčyma było kłaścisia, bo tam było brudna i poŭzali vošy. Jak vynik, ciapier skardzicca na boli ŭ śpinie, jakija nie ścichajuć», — kaža Andrej Šarenda. Mužčyna spasyłajecca na źviestki z homielskaha SIZA. Listoŭ ad žonki jon nie atrymlivaje ŭžo dva miesiacy.
23 žniŭnia Palina Šarenda abviaściła haładoŭku i nie prymała ježy, pakul jaje nie pieraviali z rečyckaha IČU ŭ homielski SIZA. Kolki dzion dakładna haładavała Palina Šarenda-Panasiuk, jaje muž nie viedaje. U rečyckim izalatary časovaha ŭtrymańnia ŭ Paliny prajšli apošnija śledčyja dziejańni ŭ miežach kryminalnaj spravy za «złosnaje niepadparadkavańnie administracyi kałonii».
Izrailski biznesmien staŭ iranskim špijonam dziela darahoj va ŭtrymańni biełaruski. Chto hetaja fatalnaja łedzi?5
Kamientary