Ukraina nanosić udary pa rasijskaj abaronie zdalok, kab nie ryzykavać bajcami — WSJ
Pakolki naziemnaje kontrnastupleńnie pakul nie prasoŭvajecca, Kijeŭ sprabuje pierapynić linii zabieśpiačeńnia Kramla i asłabić abaronu, jak paviedamlaje WSJ.
Natknuŭšysia na zaciaty supraciŭ rasijskich vojskaŭ pry sprobach prabić abarončyja linii pad Zaparožžam i Danieckam u pačatku červienia, ukrainskaje kamandavańnie spyniła adpraŭlać piachotu i tanki dla šturmu rasijskich pazicyj. Zamiest hetaha Kijeŭ nanosić kropkavyja ŭdary, sprabujučy asłabić rasijskuju abaronu dla nastupnaj ataki.
A kab parušyć linii zabieśpiačeńnia rasijskich vojskaŭ u hłybini akupavanaj terytoryi, ukraincy vykarystoŭvajuć dalnabojnuju zachodniuju zbroju. Ale jany taksama sprabujuć razburyć pieršyja linii rasijskaj abarony ŭzdoŭž frontu, vykarystoŭvajučy bolš tannaje ŭzbrajeńnie dla źniščeńnia rasijskaj artyleryi, składoŭ bojeprypasaŭ i ŭstanovak radyjoelektronnaj baraćby.
Jany taksama praciahvajuć probnyja ataki i adbili na hetym tydni siało Raŭnopal, choć inšyja vyłazki mała što dali. Ukrainskija siły jašče nie padyšli da troch linij abarony, pabudavanych rasijanami prykładna za 10-20 km ad linii bajavoha sudakranańnia. Hetyja linii abarony ŭklučajuć supraćtankavyja ravy, ahniavyja punkty dy bietonnyja ŭmacavańni.
«Nastup idzie niachutka, bo my bieražom ludziej», — kaža 49-hadovy ŭdzielnik kamandy bieśpiłotnikaŭ z pazyŭnym Buržua. «Padrychtoŭka terytoryi zajmaje niejki čas. My starajemsia źniščyć jak maha bolš punktaŭ abarony, pierš čym puskać vojski».
Kamanda bieśpiłotnikaŭ Clear Eyes praviała apošni miesiac, začyščajučy terytoryju ŭ niekalkich vioskach Zaparožskaj vobłaści. Kijeŭ spadziajecca prarvać abaronu Maskvy jakraz tut, kab pierarezać suchaputny šlach, što złučaje Rasiju z Krymam.
Kali ŭ pačatku hetaha miesiaca pačaŭsia naziemny nastup, sa słoŭ kamandzira hrupy bieśpiłotnikaŭ Vołkava, ukraincy byli «trochi ździŭlenyja» hruntoŭnaściu rasijskaj abarony. Było padrychtavana nie mienš za try linii abarončych rubiažoŭ. Akopy vykopvali traktarami i ŭmacoŭvali bietonam. Byli padrychtavanyja chovanki dla tankaŭ i inšaj techniki. Padjaznyja šlachi padsypali žviram, kab vielikahruznyja mašyny nie zachrasali ŭ hrazi padčas liŭniaŭ.
«Usio nibyta prosta, ale kali ŭsio heta razam, atrymlivajecca mocnaja sistema abarony», — kaža Vołkaŭ.
Uziaŭšy niekalki viosak u hetym rajonie, Ukraina prypyniła maštabnyja šturmavyja dziejańni.
Z taho času kamanda Clear Eyes udzielničaje ŭ bieśpierapynnaj hulni ŭ kata i myš: apieratary dronaŭ sprabujuć znajści i ŭrazić rasijskuju techniku, a rasijanie sprabujuć źbić drony.
Pałonny rasijanin, zachopleny ŭ pieršyja dni kontrnastupleńnia, namalavaŭ ukrainskim siłam kartu raźmiaščeńnia vojskaŭ u nasielenym punkcie, za jakim viadziecca nazirańnie. Ale ŭkraincy nie zapytvajuć ahoń, pakul dakładna nie identyfikujuć cel z dapamohaj videazapisaŭ ź bieśpiłotnikaŭ. Pa słovach ukrainskich kamandziraŭ, bojeprypasy ŭ deficycie.
Jak adznačaje Buržua, za apošni čas ukrainskaja artyleryja atakavała čatyry składy z rasijskimi bojeprypasami paśla taho, jak ich zaŭvažyŭ adzin z samych prasunutych dronaŭ — amierykanski RQ-20 Puma, jaki vyhladaje jak maleńki samalot. Adnak na minułym tydni kamanda straciła «Pumu», rasijanie pasadzili jaje antydronavym abstalavańniem.
Ukraincy prasunulisia pad Bachmutam — Syrski
Zialenski: Kali kontrnastup budzie paśpiachovym, Rasija prajhraje vajnu
Izrailski biznesmien staŭ iranskim špijonam dziela darahoj va ŭtrymańni biełaruski. Chto hetaja fatalnaja łedzi?7
Kamientary