Spravu «kratoŭ» zakryli, tak i nie raskryŭšy.
Jašče ŭ 2005 hodzie Hieneralnaja prakuratura Biełarusi raspačała kryminalnuju spravu pa artykułu 253 KK «Podkup udzielnikaŭ prafesijnych spartovych spabornictvaŭ». Pa materyjałach niezaležnaj hazety «Priessboł» pačałosia śledztva adnosna dvuch matčaŭ zbornaj Biełarusi, syhranych ŭ vieraśni 2003 hodu, suprać Čechii i Małdovy.
«Priessboł» tady zajmieŭ mahnitafonnyja stužki razmovaŭ na jakich dobra čuvać, što čałaviek z hołasam padobnym da byłoha bramnika zbornaj Valerja Šantałosava prapanoŭvaŭ hulcam hrošy za projhryš Biełarusi z patrebnaj roźnicaj u miačach. Urešcie, nacyjanalnaja kamanda prajhravała akurat tak, jak treba było «kratam».
Pavodle hałoŭnaha redaktara «Priessboła» Ŭładzimiera Bieražkova, na jaho niepasredna sprabavali vyjści złačyncy, jakija chacieli zamiać spravu.
«U mianie na rukach u toj čas byli ŭsie dakumenty, jakija śviedčyli pra damoŭny charaktar tych matčaŭ, tamu złačynca sapraŭdy vyjšaŭ na mianie. Jon sprabavaŭ kupić hetyja materyjały», — kazaŭ hod nazad u interviju «NN» U.Bieražkoŭ.
Siońnia ž stała viadoma, što kryminalnaja sprava «kratoŭ» była spynienaja śledčym upraŭleńniem UUS Navasibirsku. Dla hetaha ŭpraŭleńniu spatrebiłasia mienš za miesiac.
Sprava ŭ tym, što na patrabavańnie ekstradycyi Šantałosava na radzimu, jon prademanstravaŭ rasiejski pašpart. Tamu 3 sakavika try tamy spravy byli pieradadzienyja pa miescu žycharstva abvinavačanaha Valerja Šantałosava ŭ Navasibirsk. Užo tady mnohija amatary futbołu mierkavali, što sprava tak i nia budzie daviedzienaja da kanca.
23 krasavika rasiejskaje śledztva pastanaviła, što Šantałosaŭ svaimi dziejańniami ździejśniŭ zamach złačynstva — podkup spartoŭca prafesijnych spabornictvaŭ. Sabranych dokazaŭ było dastatkova dla pradstaŭleńnia abvinavačvańnia, ale spravu zakryli za vychadam terminu daŭniny.
Kamientary