Справу «кратоў» закрылі, так і не раскрыўшы.
Яшчэ ў 2005 годзе Генэральная пракуратура Беларусі распачала крымінальную справу па артыкулу 253 КК «Подкуп удзельнікаў прафэсійных спартовых спаборніцтваў». Па матэрыялах незалежнай газэты «Прессбол» пачалося сьледзтва адносна двух матчаў зборнай Беларусі, сыграных ў верасьні 2003 году, супраць Чэхіі і Малдовы.
«Прессбол» тады займеў магнітафонныя стужкі размоваў на якіх добра чуваць, што чалавек з голасам падобным да былога брамніка зборнай Валер’я Шанталосава прапаноўваў гульцам грошы за пройгрыш Беларусі з патрэбнай розьніцай у мячах. Урэшце, нацыянальная каманда прайгравала акурат так, як трэба было «кратам».
Паводле галоўнага рэдактара «Прессбола» Ўладзімера Беражкова, на яго непасрэдна спрабавалі выйсьці злачынцы, якія хацелі замяць справу.
«У мяне на руках у той час былі ўсе дакумэнты, якія сьведчылі пра дамоўны характар тых матчаў, таму злачынца сапраўды выйшаў на мяне. Ён спрабаваў купіць гэтыя матэрыялы», — казаў год назад у інтэрвію «НН» У.Беражкоў.
Сёньня ж стала вядома, што крымінальная справа «кратоў» была спыненая сьледчым упраўленьнем УУС Навасібірску. Для гэтага ўпраўленьню спатрэбілася менш за месяц.
Справа ў тым, што на патрабаваньне экстрадыцыі Шанталосава на радзіму, ён прадэманстраваў расейскі пашпарт. Таму 3 сакавіка тры тамы справы былі перададзеныя па месцу жыхарства абвінавачанага Валер’я Шанталосава ў Навасібірск. Ужо тады многія аматары футболу меркавалі, што справа так і ня будзе даведзеная да канца.
23 красавіка расейскае сьледзтва пастанавіла, што Шанталосаў сваімі дзеяньнямі зьдзейсьніў замах злачынства — подкуп спартоўца прафэсійных спаборніцтваў. Сабраных доказаў было дастаткова для прадстаўленьня абвінавачваньня, але справу закрылі за выхадам тэрміну даўніны.
Каментары