«Такога ўзросту знаходак, якія знайшлі на Менцы, на тэрыторыі Усходняй Еўропы больш няма» — дырэктар Інстытута гісторыі
Інстытут гісторыі НАН Беларусі падпісаў дамову з Беларускім дзяржаўным тэхналагічным універсітэтам, каб той аказваў дапамогу ў захаванні драўляных канструкцый, знойдзеных падчас раскопак на рацэ Менцы пад Мінскам, паведаміла агенцтва «Мінск-Навіны». Навошта гэта трэба, расказаў дырэктар Інстытута гісторыі Вадзім Лакіза.
![](http://d3kcf2pe5t7rrb.cloudfront.net/img/w840d4webp1/photos/z_2024_03/2-5-1jpg-bp7wd.webp.webp)
«Узрост драўляных канструкцый — клецяў у аснове вала старажытнага гарадзішча — вызначаны па радыевугляродным датаванні і дэндрахраналагічных аналізах. У рамках падпісанай дамовы аб навуковым супрацоўніцтве мы абмеркавалі шляхі і рашэнні па кансервацыі і захаванні для нашчадкаў гэтых знаходак», — паведаміў Лакіза.
Паводле яго, такіх і такога ўзросту знаходак, якія знайшлі ў археалагічным комплексе ў вёсцы Гарадзішча Мінскага раёна, дзе, мяркуючы па ўсім, размяшчаўся старажытны Менск, на тэрыторыі Усходняй Еўропы сёння больш няма.
Лакіза дадаў, што ў красавіку плануецца прыступіць да чарговага этапу даследаванняў драўляных клецяў, дубовых зрубаў. Якраз іх кансервацыя і будзе праведзена пры дапамозе калег з БДТУ. Па словах дырэктара Інстытута гісторыі, гэта матэрыяльная спадчына праляжала 1 тыс. гадоў, і яшчэ, маўляў, на столькі ж яе ўдасца захаваць для наступных пакаленняў дзякуючы сучасным метадам:
«Думаю, яшчэ тысячу гадоў праляжыць. І нашы прапрапраўнукі з задавальненнем наведаюць археалагічны комплекс на рацэ Менцы, пераканаюцца ў глыбіні і ўнікальнасці нашай гісторыі».
![](http://d3kcf2pe5t7rrb.cloudfront.net/img/w732d4webp1/photos/z_2024_03/photo_2024-03-20_13-31-10jpg-ab590.webp.webp)
Паводле слоў рэктара БДТУ Ігара Войтава, які падпісаў дамову ад імя ўніверсітэта, за амаль стогадовую гісторыю ВНУ яго супрацоўнікі напрацавалі шмат тэхналогій, звязаных менавіта з захаваннем дрэва, яго станам. Ва ўніверсітэце ёсць ксілатэка, дзе сабраныя і сістэматызаваныя эталонныя ўзоры драўніны. Некаторым з іх ужо некалькі мільёнаў гадоў.
![](http://d3kcf2pe5t7rrb.cloudfront.net/img/w732d4webp1/photos/z_2024_03/05-09-2023-istoriya-gorodishhe-raskopki-sarveta-24-kopiyajpg-ftr9q.webp.webp)
Што тычыццва драўляных аб'ектаў на Менцы, то яны таксама вельмі старыя, а захаваліся ў тым ліку нібыта і па прычыне добрай генетыкі драўніны.
Каментары