У Перу памёр былы прэзідэнт Альберта Фухіморы. Летась яго вызвалілі з турмы
У свой час яго прыгаварылі да 25 гадоў турмы.
Былы прэзідэнт Перу Альберта Фухіморы, які правёў 16 гадоў у турме па абвінавачваннях у карупцыі і парушэннях правоў чалавека, памёр ва ўзросце 86 гадоў у сталіцы краіны Ліме, піша Бі-бі-сі.
«Пасля доўгай барацьбы з ракам наш бацька Альберта Фухіморы толькі што адправіўся да Госпада», — напісалі яго дзеці Кейка, Хіра, Сачы і Кенджы Фухіморы ў сацсетцы X.
Улетку Кейка Фухіморы паведамляла, што яе бацька мае намер зноў змагацца за пасаду кіраўніка дзяржавы на выбарах у 2026 годзе.
Фухіморы, які ўзначальваў Перу з 1990 па 2000 год, быў вызвалены з турмы па гуманітарных меркаваннях у снежні мінулага года, адбыўшы дзве траціны 25-гадовага тэрміну за злачынствы, учыненыя падчас свайго кіравання.
Яго абвінавачвалі ў стварэнні «эскадронаў смерці» для барацьбы з паўстанцамі і датычнасці да забойства 25 чалавек у 1991-1992 гадах, а таксама ў растраце дзяржаўных сродкаў і іншых карупцыйных злачынствах.
У 2000 годзе Фухіморы, які меў японскае паходжанне, пакінуў краіну і адправіўся ў Японію. Перуанскія ўлады, якія пачалі расследаванне ў дачыненні да экс-прэзідэнта, дамагаліся яго выдачы, але Японія адмовілася гэта зрабіць.
У 2005 годзе Фухіморы нечакана аб'явіўся ў Чылі, дзе быў арыштаваны па перуанскім ордары і дастаўлены ў Ліму, стаўшы першым дэмакратычна абраным лідарам, экстрадаваным у сваю краіну.
У 2007 годзе яго асудзілі на 25 гадоў. Прэзідэнт Перу Пэдра Пабла Кучынскі памілаваў Фухіморы ў 2017 годзе ў сувязі са станам яго здароўя.
Тады Альберта Фухіморы ў заяве, запісанай на бальнічным ложку, папрасіў прабачэння ў грамадзян краіны і падзякаваў прэзідэнту за памілаванне, аднак на волю змог выйсці толькі праз шэсць гадоў з-за юрыдычных спрэчак вакол яго вызвалення.
На сустрэчы Снапкова з бізнэсам адзін з запрошаных заклікаў зняць відэазварот «Надо!» Як адрэагавалі астатнія?2
Каментары
Дарэчы, дзіўны той факт, што ў іх у 2021 былі пратэсты супраць дыктатуры, як і ў нас.
Рэд., цікава было б, вы напісалі артыкул пра палітыку Перу, каб людзі разумелі, як мы падобны сваім змаганнем з дыктатурай.