Музыку было 45 гадоў.
Раніцай 30 кастрычніка свет пакінуў беларускі музыкант Максім Кот-Кузьма — бас-гістарыст гуртоў Pukstband, True Litwin Beat, WZ-orkiestra са Змітром Вайцюшкевічам, Pomidor/OFF, «Дилижанс-jazz» ды іншых праектаў, піша Reform.by.
Пра сыход сябра ды паплечніка паведаміў у сацсетках музыка Сяргей Пукст.
«…Сышоў Максім Кот-Кузьма. Гэта чалавек зусім выдатны, які вельмі шмат разумеў, вельмі шмат даваў як чалавек, і, мне здаецца, ён быў бясконца добры да мяне, але потым я зразумеў, што быў добры да ўсіх. Мы апошнім часам рэдка бачыліся (я памятаю, мы пару разоў вельмі цёпла, па-чалавечы стэлефаноўваліся) і я не магу паверыць, што больш ніколі яго не ўбачу…»
Адгукнуўся на смерць калегі і музыка Аляксандр Памідораў.
«Лёс бязлітасны… ды нам таксама выходзіць піць гэты кубак… жахлівая і невыносная навіна… гэты свет пакінуў адзін з найлепшых, добрых, чулых і чуллівых людзей. цудоўны музыка, басіст «mister Red Stringzzz» ды кантрабасіст, цудоўны фатограф, праграміст, дызайнер, муж, бацька, сапраўдны сябра, вялікі чалавек ва ўсіх сэнсах, Максім Кот-Кузьма…
вельмі заўчасна… ды не толькі таму пуста ізноў і ў галаве, і ў душы… страшная страта… шчырыя спачуванні сям’і, жонцы Наташы Кот-Кузьма, дачцэ і старэйшаму сыну ад мяне ўласна, і ад сяброў-паплечнікаў з нашай групы Pomidor/OFF…»
Максім Кот-Кузьма меў тэхнічную адукацыю: ён закончыў Мінскі тэхналагічны тэхнікум па класе фатаграфіі. Але вядомасць яму прынесла музыка — як бас-гітарыст, кантрабасіст творца супрацоўнічаў з рознымі калектывамі: джаз-квартэтам Яўгена Уладзімірава, клезмерскім ансамблем «Меркава», узгаданымі вышэй WZ-orkiestra, Pukstband, True Litwin Beat ды іншымі праектамі.
У шлюбе з актрысай Беларускага дзяржаўнага тэатра лялек Наталляй Кот-Кузьма. У музыкі засталіся дачка і сын.
Развітанне адбудзецца 1 лістапада аб 11:00 гадзіне ў Раўбічах у Храме абраза Божай Маці. Пахаванне плануецца пасля адпявання, на могілках Лясныя (Магілёўская траса). Памінкі — у Мінску, на Кастрычніцкай, 16.
Васкрасенскі: Трэба, каб Сікорскі прывёз падарунак Лукашэнку. А Бяляцкі і 20 завадатараў выйдуць апошнімі26
Каментары