Жыхар з афрыканскага Буркіна-Фасо пераехаў у Гродзенскую вобласць і працуе трактарыстам
Мясцовыя завуць Ульрыха Юра.
Ульрых Уэдраага пасля пераезду працуе трактарыстам у аграгарадку Вярдамічы Свіслацкага раёна, піша Hrodna.life.
Мясцовыя называюць яго Юрам. Ульрых жанаты з гарадзенкай Таццянай, і ў іх ёсць дачка Глорыя. Ён свабодна валодае французскай, англійскай і рускай мовамі.
Ульрых распавёў, што палюбіў Свіслач і прызнаўся, што ўжо не можа ўявіць сваё жыццё без гэтага месца.
«Гэта рай на зямлі! Гэта найпрыгажэйшая прырода. Унікальная архітэктура — шмат старадаўніх будынкаў розных эпох», — дзеліцца ён уражаннямі.
Асабліва яго захапляюць помнікі героям Вялікай Айчыннай вайны, а таксама манументы Леніну і Сталіну, якія, на яго думку, з'яўляюцца важнай часткай гісторыі.
Ульрых адзначыў, што ніколі не сутыкаўся з праявамі расізму ў Беларусі. Наадварот, мясцовыя жыхары дапамагалі яму ў першы час, прыносячы прадукты і нават падарылі футра.
У сваёй жартаўлівай манеры Ульрых распавёў, што ў дзяцінстве яго палохалі мухай цэцэ, укусу якой ён нібыта баяўся больш за ўсё. Але, пасмяяўшыся, ён дадаў, што насамрэч яго галоўны страх — вайна. «А ў нашай Беларусі спакойна і мірна», — адзначыў ён.
Ульрых таксама выказаў захапленне Лукашэнкам, які, з ягоных слоў, круты і забяспечвае стабільнасць у краіне: «нездарма ж усе яго бацькам клічуць».
Ульрыха асабліва ўразіла беларуская сістэма аховы здароўя і кошты:
«Але самае галоўнае — медыцына. У іншых краінах на дактароў і іх паслугі ідуць гіганцкія грошы, а ў Беларусі ўсе паслугі бясплатныя. І наогул, цэны ў краіне невысокія, таму простаму чалавеку жыць лёгка. Добра працуй – і атрымаеш годны заробак і жыллё».
Праца трактарыстам Ульрыху таксама падабаецца, але чамусьці малады чалавек плануе паступіць у адну з ВНУ Гродна, каб вывучыцца на эканаміста.
Хто тая жанчына, якую Марзалюк у эфіры БТ абазваў «шваллю з Гродна», і што яна піша ў чатах? Расказваем пра доктарку Стэфановіч7
Каментары