«Іран зрабіў вялікую памылку і заплаціць за яе». Ізраіль пагражае адказам на ўдары Тэгерана па сваёй тэрыторыі
Біньямін Нетаньяху заявіў, што Іран, які ў аўторак вечарам нанёс масіраваны ўдар балістычнымі ракетамі па тэрыторыі Ізраіля, «здзейсніў вялікую памылку і заплаціць за яе», піша Бі-бі-сі.
«Іран зрабіў вялікую памылку сёння ўвечары — і ён заплаціць за гэта. Рэжым у Іране не разумее нашай рашучасці абараняць сябе і адпомсціць нашым ворагам, — сказаў ён. — Мы будзем прытрымлівацца ўстаноўленага намі правіла: хто б на нас ні напаў — мы нападзем на яго».
Прадстаўнік арміі абароны Ізраіля Даніэль Хагары таксама заявіў, што дзеянні Тэгерана будуць мець сур'ёзныя наступствы. Паводле яго слоў, ізраільскія і амерыканскія сістэмы СПА эфектыўна спрацавалі супраць запушчаных з Ірана ракет.
«Іран падштурхоўвае Блізкі Усход да эскалацыі. Гэтыя падзеі будуць мець наступствы», — сказаў ён. Праз некалькі гадзін пасля іранскага абстрэлу ізраільскія вайскоўцы нанеслі новыя ўдары па аб'ектах «Хезбалы» ў Бейруце.
Перад гэтым Армія абароны Ізраіля папярэдзіла мясцовых жыхароў аб неабходнасці эвакуявацца.
Дарадца прэзідэнта ЗША Джо Байдэна па нацыянальнай бяспецы Джэйк Саліван назваў удары Ірана «значнай эскалацыяй» і паведаміў, што агулам Тэгеран запусціў блізу 200 балістычных ракет (пазней такую ж лічбу агучыла дзяржаўнае тэлебачанне Ірана).
Саліван адмовіўся каментаваць магчымасць мер у адказ з боку Ізраіля або ЗША, але пацвердзіў, што амерыканскія эсмінцы дапамагалі Ізраілю збіваць Іранскія ракеты.
Як паведаміў на брыфінгу прадстаўнік Пентагона Пэт Райдэр, у адбіцці атакі ўдзельнічалі два эсмінцы ВМС ЗША, якія знаходзяцца ў Міжземным моры.
Па даных амерыканскага ваеннага ведамства, удары ў аўторак былі «ўдвая маштабнейшыя» за першую іранскую атаку на Ізраіль у красавіку гэтага года.
Прэзідэнт ЗША Джо Байдэн заявіў, што Вашынгтон цалкам падтрымлівае Ізраіль.
Са слоў Байдэна, паводле яго прамога ўказання амерыканскія вайскоўцы «актыўна падтрымлівалі абарону Ізраіля» падчас удару.
Ён таксама дадаў, што іранская атака была адбітая і была неэфектыўнай.
Віцэ-прэзідэнт і кандыдат у прэзідэнты ад Дэмакратычнай партыі на будучых выбарах Камала Харыс заявіла, што назірала за атакай у рэальным часе з Белага дома разам з Байдэнам.
Яна сказала, што цалкам падтрымала рашэнне Байдэна аддаць загад амерыканскім караблям збіваць ракеты, нацэленыя на Ізраіль.
Міністр абароны ЗША Лойд Осцін напісаў у ноч на сераду ў сацсетцы X, што Вашынгтон па-ранейшаму адданы дасягненню дыпламатычнага ўрэгулявання, але пры гэтым гатовы абараняць Ізраіль ад іранскай агрэсіі ў выпадку неабходнасці.
Ці можна 3 студзеня перанесці і зрабіць непрацоўным? Вось што адказалі ў Мінпрацы2
Каментары