Яе карысныя ўласцівасці залежаць ад спосабу гатавання. Вараная бульба добра праяўляе сябе, калі мы клапоцімся пра здаровую фігуру, а вось бульба-фры мае адваротны эфект. Ужыванне бульбы можа паўплываць на нашу памяць і канцэнтрацыю. Тое, як вы яе прыгатуеце, будзе вызначаць ступень уплыву на арганізм, піша Onet.pl.
Бульба займае важную ролю ў беларускай кухні. Многія людзі не ўяўляюць сабе вячэру без гэтай гародніны. Што адбываецца ў нашым арганізме, калі мы яе ядзім? Аказваецца, усё залежыць ад таго, у якім выглядзе мы спажываем караняплод.
Бульба ў дыеце для пахудзення
Магчыма, у гэта цяжка паверыць, але бульба можа стаць нашым хаўруснікам у барацьбе з лішняй вагой. Адварная бульба — нізкакаларыйная і сытная. Яна змяшчае шмат вугляводаў, харчовых валокнаў, а таксама з'яўляецца крыніцай калію, вітаміну С, вітамінаў В6 і B4 і фоліевай кіслаты. Яшчэ забяспечвае арганізм вітамінамі групы PP і цынкам.
Вараная бульба лічыцца адной з самых сытных страў. У даследаванні 2018 года пад назвай «Суб'ектыўнае пачуццё сытасці пасля ежы, якая змяшчае рыс, макароны і бульбу», даследчыкі параўноўвалі адчуванні ўдзельнікаў, якія елі розныя групы прадуктаў, і прыйшлі да высновы, што пасля ежы, якая змяшчае бульбу, пачуццё сытасці трымалася даўжэй, людзі былі менш галоднымі і былі больш задаволеныя, чым пры спажыванні іншых прадуктаў.
Аднак варта падкрэсліць, што гаворка ідзе пра адварную бульбу. Бульба-фры, смажаная бульба ці нават адварная, але пададзеная з тлустым соусам — не нашы саюзнікі ў захаванні здаровай фігуры.
Бульба для здаровых костак
Жалеза, кальцый, фосфар, магній і цынк, якія змяшчаюцца ў бульбе, станоўча ўплываюць на здароўе костак. Па гэтай прычыне добра ўключаць у свой рацыён адварную або запечаную бульбу. Недахопам бульбы ў рацыёне можа быць тое, што з-за высокага ўтрымання вугляводаў яна можа выклікаць праблемы з узроўнем цукру ў крыві, таму людзям, хворым на цукровы дыябет, варта быць асабліва ўважлівымі.
Бульба ў дыябетычнай дыеце
Рэгулярнае ўжыванне тэрмічна апрацаванай бульбы, напрыклад, бульбы-фры, можа павялічыць рызыку дыябету, высокага крывянога ціску і сардэчных захворванняў. Але калі замяніць порцыю бульбы-фры порцыяй адварной або запечанай бульбы і пакінуць яе астываць (потым можна яшчэ раз разагрэць), крухмал, які там змяшчаецца, ператворыцца ва ўстойлівы крухмал — ён будзе засвойвацца даўжэй, што азначае, што цукар будзе паступаць у кроў павольней.
Бульбу варта спалучаць з бялком — нятлустай ялавічынай, рыбай, курыцай або яйкам. Гэта спалучэнне дапамагае прадухіліць рэзкія скокі цукру ў крыві.
Бульба для зніжэння халестэрыну
Клятчатка, калій, вітаміны С і В6, якія змяшчаюцца ў бульбе, таксама станоўча ўплываюць на падтрыманне належнага ўзроўню халестэрыну ў крыві. Аптымальны ўзровень халестэрыну зніжае рызыку развіцця атэрасклерозу. Уключэнне ў рацыён адварной бульбы станоўча паўплывае на крывяносныя сасуды і можа знізіць рызыку сардэчных захворванняў.
Бульба для забеспячэння арганізма жалезам
Даследаванне навукоўцаў з Оксфардскага ўніверсітэта паказала, што бульба з'яўляецца сапраўды добрай крыніцай жалеза для нашага арганізма. Яны выявілі, што жалеза, якое змяшчаецца ў ежы з бульбы (у розных камбінацыях), пакрывае 33 працэнты сутачнай патрэбнасці ў жалезе для жанчын дзетароднага ўзросту.
Бульба, каб палепшыць памяць і канцэнтрацыю
У адной вялікай бульбіне змяшчаецца каля 57 мг халіну, які падтрымлівае памяць і канцэнтрацыю. Дарослыя мужчыны павінны атрымліваць 550 мг, а дарослыя жанчыны — 425 мг халіну за дзень. Ужыванне варанай або запечанай бульбы можа станоўча паўплываць на памяць і канцэнтрацыю ўвагі.
Калі адварная бульба пазітыўна ўплывае на наша здароўе, то смажаная ў фрыцюры прынясе нам больш шкоды, чым карысці. Даследаванні паказалі, што ўжыванне бульбы, смажанай у фрыцюры, а таксама іншых страў, прыгатаваных такім чынам, можа ўплываць на пагаршэнне канцэнтрацыі ўвагі, памяці і ўзмацняць запаленчыя рэакцыі ў мозгу.
«Найбольш ім цікавы Полк Каліноўскага і Офіс Ціханоўскай». КДБ вярбуе актывістаў унутры Беларусі1
Каментары